Siońnia źjavilisia źviestki, što orhany apieki pryjšli ŭ sadok pa trochhadovaha syna Iryny Chalip i Andreja Sańnikava. Babula i dziadula Daniły ŭ hety čas stajali ź pieradačami dla svaich dziaciej la izalataru KDB. Kali babula prybiehła pa ŭnuka, joj na miescy prapanavali aformić apieku nad unukam. Ale kab zrabić heta, treba prajści składanuju praceduru afarmleńnia papieraŭ, jakaja zojmie niamała času. Dzie hetym časam budzie znachodzicca chłopčyk?

Ja dobra viedaju, jak pracuje dekret № 18, u adpaviednaści ź jakim orhany apieki mohuć zabirać dzicia ź siamji biez pastanovy sudu. Jašče paru miesiacaŭ tamu, rabiŭšy pra heta pieradaču dla Radyjo Svaboda i razmaŭlajučy ź siemjami, jakija paciarpieli ad dziejańnia hetaha ŭkazu, ja ŭ strašnym śnie nie mahła ŭjavić, što jon u poŭnaj miery budzie prymianiacca suprać palityčnych apanentaŭ ułady. Ale ŭ adpaviednaści z našym zakonam i sapraŭdy žudasnaj praktykaj jaho prymianieńnia,

dziaciej mohuć zabrać ź luboha miesca, źmiaścić u prytułak i navat nie paviedamić pra heta svajakam i rodnym.
Samaje horšaje — što hetymi miescami akazvajucca dziciačy sadok, škoła, paliklinika. Usie tyja ŭstanovy, jakim my vymušanyja daviarać svaich dziaciej. Bolš za toje — isnuje plan pa vykanańni dekretu № 18 i pa spahnańni hrošaj z baćkoŭ, jakija «nieadpaviedna vykonvajuć svaje baćkoŭskija abaviazki». U našaj dziaržavie losy dziaciej pryraŭnavanyja da vytvorčaści hajek i traktaroŭ «Biełaruś», i čynoŭniki nižejšaha ŭzroŭniu vykonvajuć hetyja plany lubymi sposabami.

Bohna Chmialeŭska z Chelsynskaj fundacyi pravoŭ čałavieka tady ŭ razmovie sa mnoju skazała, što ŭ Polščy nikoli nie było takoha navat u samy ciažki čas i, kali ŭ Biełarusi heta jość, treba kryčać pra heta na ŭvieś śviet. Davajcie kryčać!

Prezydent Łukašenka hod tamu publična skardziŭsia hubernataru Leninhradzkaj vobłaści na abrazy z boku apazycyi: «Prezydent — idyjot i dzieci ŭ jaho nienarmalnyja, machlary i prajdziśviety. Dajšło da taho, što piacihadovaha małoha skramsali ŭzdoŭž i ŭpopierak».

Čym ža dzieci tych 19 aryštavanych i siami socień zatrymanych horšyja za vašych?

Niama inšaha paraŭnańnia, jak sa stalinskimi dziciačymi damami, kryminalnymi spravami suprać małaletnich dziaciej za špijanaž i niasvoječasovaje raskryćcio vorahaŭ — ułasnych baćkoŭ. Ja viedaju hety strach, kali addaješ dzicia ŭ sadok i nia peŭny, ci zabiareš jaho ŭviečary dachaty. Ničoha bolš žudasnaha nie davodziłasia pieražyvać.

Tak łamajuć svaich vorahaŭ — i ničoha bolš nizkaha, niedaravalnaha, ahidnaha nielha sabie ŭjavić.

Davajcie kryčać!

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?