Alaksandr Łukašenka zapatrabavaŭ zaviaršyć zabudovu Parku vysokich technałohij u Minsku da kanca 2013 hoda. Pra heta jon zajaviŭ 18 listapada, naviedvajučy PVT, paviedamiła pres-słužba prezidenta.

«Usio pavinna być zabudavana da 1 studzienia 2014 hoda. I heta mahčyma», — skazaŭ Łukašenka.

Jon raskrytykavaŭ urad i naziralny saviet PVT za toje, što paśla piaci hadoŭ z momantu vydańnia im dekreta ab Parku vysokich technałohij faktyčna na terytoryi PVT zroblena značna mienš, čym płanavałasia. «My vyznačali, što budziem tut budavać haradok dla prasunutych ludziej, kab stvaryć im narmalnyja ŭmovy dla pracy, žyćcia i adpačynku. Piać hadoŭ prajšło, a vy faktyčna adzin budynak tolki ŭ paradak pryviali», — adznačyŭ biełaruski kiraŭnik.

Jak paviedamiŭ dyrektar administracyi PVT Valeryj Capkała, na rekanstrukcyju budynka było zraschodavana 3,8 młrd. rubloŭ ź dziaržbiudžetu i kala 50,7 młrd. srodkaŭ inviestaraŭ. «Łukašenku prainfarmavali, što prykładna dva hady tamu 50 ha terytoryi PVT byli pieradadzieny zamiežnamu inviestaru dla prajektavańnia i zabudovy. Adnak z-za abjektyŭnych i subjektyŭnych pryčyn inviestar nie spraviŭsia z uziatymi na siabie abaviazacielstvami. Adnoj z pryčyn, u pryvatnaści, stała padzieńnie cen na nieruchomaść u 2009 hodzie, i cikavaść inviestara da prajekta pačała zhasać», — adznačajecca ŭ paviedamleńni.

Na heta Łukašenka zajaviŭ: «U ich što, abaviazacielstvaŭ nijakich nie było? Pačała zhasać, nu i što? Jany pravalili — tady treba patrabavać ź ich…

Mianie nie cikavić, jakija ŭ vas uźnikli składanaści i navat fors-mažor. Mianie chvaluje adno: što zroblena za piać hadoŭ?»

Ciapier asnoŭnyja funkcyi pa prajektavańni i zabudovie na terytoryi PVT buduć ažyćciaŭlać haradskija ŭłady sumiesna z samim parkam. Razam z tym inviestar i dalej budzie mieć mahčymaść praciahvać dziejnaść na hetaj terytoryi i ŭdzielničać u cikavych jamu prajektach.

Pavodle słoŭ Łukašenki, stvareńnie PVT patrebna ŭ pieršuju čarhu dla taho, kab dać mahčymaść dla samarealizacyi ŭ krainie ludziam, jakija pracujuć u hetaj śfiery. «Jany pavinny pracavać tut. My stracić hetyja rozumy nie pavinny», — zajaviŭ prezident.

***

Na 1 listapada 2010 hoda ŭ PVT zarehistravana 88 rezidentaŭ, ź jakich 56 — novaŭtvoranyja kampanii i dva biźnies-prajekty. Biełaruskimi inviestarami stvorana 45 rezidentaŭ PVT, zamiežnymi — 23, sumiesna biełaruskimi i zamiežnymi — 20. Ahulnaja štatnaja kolkaść rabotnikaŭ kampanij — rezidentaŭ PVT na 1 kastryčnika skłała bolš za 8,2 tys. čałaviek. U 2006–2010 hadach u PVT stvorana bolš jak 5,2 tys. novych pracoŭnych miescaŭ.

Siaredniaja zarabotnaja płata supracoŭnikaŭ za dzieviać miesiacaŭ 2010 hoda skłała 3 młn. 353 tys. rubloŭ.

Abjom realizacyi tavaraŭ (rabot, pasłuh) u PVT za dzieviać miesiacaŭ hetaha hoda dasiahnuŭ 354,5 młrd. rubloŭ i ŭ paraŭnańni z anałahičnym pieryjadam 2009 hoda pavialičyŭsia ŭ 1,4 razu. Kampanii — rezidenty PVT raspracavali ekspartnaha prahramnaha zabieśpiačeńnia na 94,4 młn. dołaraŭ, što ŭ 1,3 razu bolš, čym za adpaviedny pieryjad minułaha hoda. Dola ekspartu ŭ ahulnym abjomie vytvorčaści skłała 80%.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?