Bieły miadźviedź, na jakoha premjer Uładzimir Pucin viasnoj hetaha hoda nadzieŭ spadarožnikavy našyjnik, pazbaviŭsia ad prybora, i navukoŭcy byli vymušanyja spynić nazirańnie za jaho ruchami.
Paviedamleńnie ab hetym źjaviłasia jašče 19 kastryčnika na sajcie premjera, a roŭna praź miesiac hetuju navinu zaŭvažyli ŚMI, u pryvatnaści, sajt «Vieści».

Uradavy sajt, što abaviazany sačyć za padapiečnym premjera, paviedamiŭ, što spadarožnikavy našyjnik skinuty jašče ŭ kancy žniŭnia 2010 hoda. Z tych časoŭ, miarkujučy pa ŭsim, nijakich mier nie pryniata, i navukoŭcy pierastali adsočvać pieramiaščeńnia biełaha miadźviedzia ŭ ramkach prahramy pa adnaŭleńni jaho papulacyi. Zrešty, viadoma, što spadarožnikavy našyjnik, skinuty miadźviedziem, praciahvaje padavać sihnały. Heta dazvalaje navukoŭcam adsočvać pieramiaščeńnie vielmi ruchomych ŭ hety čas hoda arktyčnych ldoŭ.

Navukoŭcy ź Instytuta prablem ekałohii i evalucyi ličać, što strata našyjnika — «całkam naturalnaja situacyja, źviazanaja z rostam arktyčnaha źviera».

Razam z tym, havorycca ŭ paviedamleńni, padčas nastupnych ekśpiedycyj navukoŭcy ź Instytuta prablem ekałohii i evalucyi i ich kalehi majuć namier znoŭ nadzieć niekalki ašyjnikaŭ sa spadarožnikavymi pieradatčykami na biełych miadźviedziaŭ, kab praciahnuć vyvučeńnie ich papulacyi.

Uładzimir Pucin nadzieŭ našyjnik na šyju źviera padčas vizitu na ziamlu Franca-Josifa ŭ krasaviku 2010 hoda. A ŭžo ŭ lipieni Ministerstva pryrodnych resursaŭ i ekałohii pryniało stratehiju zachavańnia biełych miadźviedziaŭ, nahadvaje BFM.ru.

Pad asabistym kantrolem kiraŭnika ŭrada znachodziŭsia nie tolki miadźviedź, ale taksama białucha Daša i amurski tyhr Sierha.
Uładzimir Pucin braŭ udzieł u navukovych ekśpiedycyjach pa vyvučeńni hetych žyvioł i kožny raz sam uździavaŭ na žyviolinu prybor, jaki dazvalaje adsočvać jaho pieramiaščeńnie.

Darečy, z pola zroku hramadskaści źnik nie tolki miadźviedź, ale i zhadanaja Daša, jakuju złavili ŭ Achockim mory. Zarad batarei spadarožnikavaha pieradatčyka, jaki na Białusie zamacavaŭ premjer, byŭ raźličany na adsočvańnie jaje ruchaŭ na praciahu 9–12 miesiacaŭ. 15 vieraśnia hetaha hoda pieradatčyk skončyŭ svaju pracu. Navukoŭcy padkreślivajuć, što «adpracavany pieradatčyk adšpilvajecca aŭtamatyčna i šnary na ciele žyvioliny ad niejłonavych štyrkoŭ, na jakich macujecca prybor, hojacca na praciahu dvuch-piaci tydniaŭ».

Rasiejskaja karykatura: «Moža, i mnie ŭdasca?»

Rasiejskaja karykatura: «Moža, i mnie ŭdasca?»

Adznačym, što navina ab vyzvaleńni miadźviedzia, dziakujučy niekatorym paciešnym suhuččam, znajšła vodhuk u internecie. U pryvatnaści, vydańnie Polit.ru publikuje karykaturu Jołkina.
Na joj namalavany piersanaž, padobny da inšaha ŭdzielnika kiraŭničaha tandemu, na im taksama nadziety ašyjnik z nadpisam «Pucin». Na svaim manitory hety piersanaž čytaje navinu ab biełym miadźviedziu i zapytvaje: «Moža, i mnie ŭdasca?»
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?