Kantraforsy razabrali i vykłali z novaj cehły.
Dva hady tamu zvanicu pry carkvie ŭpryhožyli «cybulinaj». Kastryčnik 2010.
Nad novymi dźviaryma źjaviłasia treščyna. Kastryčnik 2010.
Pa bakach ad dźviarej paškodžanyja ścieny. Kastryčnik 2010.
Kantraforsy razabrali i vykłali z novaj cehły. Kastryčnik 2010.
Staraja cehła lažyć druzam pobač. Kastryčnik 2010.
Pracy ŭ Synkavičach musiać skončycca ŭ śniežni. Kastryčnik 2010.
U Synkavičach Zelvienskaha rajona ramantujuć carkvu Śviatoha Michaiła pačatku XVI st. U redakcyju «NN» trapili zroblenyja miesiac tamu zdymki, ź jakich bačna, jak ramantujecca chram. Nad novymi dźviaryma pa ścianie da samaha vakna papaŭzła vializnaja treščyna. Pa bakach ad dźviarej paškodžanyja ścieny — ababity tynk, a miescami paciarpieła cahlanaja kładka. Zvonku chrama razabrali kantraforsy i vykłali novyja z sučasnaj cehły. Staraja cehła lažyć druzam pobač.
Chto ž zajmajecca kapitalnym ramontam Synkavickaj carkvy? Zamoŭcam pracaŭ vystupaje Upraŭleńnie kapitalnaha budaŭnictva Hrodzienskaha abłvykankama, hienpadradčykam — UP «Hrodnaabłsielbud», padradčykam — AAT «Brestrestaŭracyja». Navukovy kiraŭnik restaŭracyjnych pracaŭ — Hienadź Łaŭrecki, toj samy, što zajmajecca hrodzienskaj Kałožaj i carkvoj Barysa i Hleba ŭ Navahrudku.
Na siońnia ŭ Synkavičach zaviaršajucca pracy pa kapitalnym ramoncie dachu i restaŭracyi fasadu chrama. Arhanizatary pracaŭ narakajuć na niastaču hrošaj, vydzielenych z respublikanskaha biudžetu. Ich chapiła tolki na ramont dachu i niekatoryja kaśmietyčnyja pracy. A zhodna płanaŭ da kanca hoda treba skončyć adnaŭleńnie i kansiervacyju viežaŭ carkvy-krepaści. Miascovyja vierniki mała čym mohuć dapamahčy carkvie, bo prychod składajecca z troch nievialikich viosak. Zrešty, było b dziŭnym, kali b adnoj ź pieršych hatyčnych pravasłaŭnych cerkvaŭ musili apiekavacca vyklučna jaje vierniki.
Ramont synkavickaj carkvy vyklikaje pytańni, słušnyja i ŭ dačynieńni da inšych padobnych pa kaštoŭnaści architekturnych abjektaŭ. Čamu pracy ŭ carkvie, pomniku nulavoj katehoryi, vykonvaje ŭnitarnaje pradpryjemstva «Hrodnaabłsielbud»? Čamu pry hetym vykarystoŭvajucca sučasnyja budaŭničyja materyjały? Staršynia Tavarystva achovy pomnikaŭ Anton Astapovič tłumačyć, što zhodna zakanadaŭstva ŭ Biełarusi ŭ budaŭničaj śfiery niama takoha vidu licenzijnaj dziejnaści, jak restaŭracyja. Inšymi słovami, lubaja budaŭničaja arhanizacyja, jakaja maje licenziju na pracy, moža vykonvać ramont i restaŭracyju na abjektach luboj katehoryi. Kolkaść budaŭničych arhanizacyj, jakija zajmajucca restaŭracyjaj, u krainie možna pieraličyć na palcach adnoj ruki.
***
Carkva Śviatoha Michaiła ŭ Synkavičach — pačatak XVI st. Pomnik nulavoj katehoryi. Adzin ź pieršych abarončych chramaŭ VKŁ, vykanany ŭ hatyčnym styli. Pa adnoj ź viersij, fundataram carkvy źjaŭlaŭsia hietman VKŁ Kanstancin Astrožski. U 20-ja hady XX stahodździa byŭ pierarobleny ŭ katalicki kaścioł. U 1990 h. viernuty pravasłaŭnym viernikam. Na siońnia prychod carkvy abjadnoŭvaje try navakolnyja vioski.
