Biełaruskaja pravasłaŭnaja carkva maje namier kananizavać śviatapakutnika Alaksieja Mahilnickaha – preśvitera Lelčyckaha, paviedamili ŭ Turaŭskaj jeparchii.
Płanujecca, što rašeńnie budzie pryniata na pasiadžeńni Śviatoha Sinoda BPC pad staršynstvam Mitrapalita Minskaha i Słuckaha, Patryjaršaha Ekzarcha ŭsioj Biełarusi Fiłareta 20 listapada ŭ Mazyry. Čakajecca, što liturhija z čynam kananizacyi budzie ździejśnienaja 21 listapada – u prastolnaje śviata Śviata-Michajłaŭskaha kafiedralnaha sabora Mazyra.
Alaksiej Mahilnicki ŭ pieršaj pałovie XX st. słužyŭ na terytoryi hetaj dyjacezii, jakaja tady nazyvałasia Minskaj i Turaŭskaj, a zatym Mazyrskaj. Jon naradziŭsia ŭ 1870 h. u Minsku, a ŭ 1892 h. skončyŭ Minskuju duchoŭnuju sieminaryju i praz hod u Śviata-Duchavym kafiedralnym sabory byŭ vyśviačany ŭ śviatara. Jamu daviałosia słužyć u roznych prychodach, u tym liku ŭ Śviata-Michajłaŭskim sabory Mazyra, a taksama ŭ sabory Najśviaciejšaj Trojcy ŭ Lelčycach.
U 1935 h. ułady začynili hety chram i stali vykarystoŭvać jak zbožžaschovišča.
Adnak śviatar praciahvaŭ ździajśniać treby i navat nabaženstvy ŭ siabie doma, ale byŭ aryštavany.
Jaho pasadzili ŭ turmu, jakaja raźmiaščałasia ŭ zhadanym Śviata-Michajłaŭskim sabory. U 1937 hodzie jamu, jak i mnohim inšym, byŭ vyniesieny śmiarotny prysud, jaki pryviali ŭ vykanańnie prama ŭ chramie.
Mahčyma, u najbližejšaj budučyni BPC kananizuje i inšych śviataroŭ-novapakutnikaŭ Turaŭskaj jeparchii, jakija paciarpieli ad represij.
