Samaja apošniaja častka artykuła 18 zakona ab palityčnych partyjach zapisana hetak:

Diejatielnosť niezariehistrirovannych libo nie postavlennych na učiet orhanizacionnych struktur političieskich partij na tierritorii Riespubliki Biełaruś zaprieŝajetsia.

Norma drennaja. Zabaraniŭšy rehistravać (stavić na ŭlik) partyjnyja arhanizacyi na pryvatnych kvaterach i abmiažoŭvajučy ich rehistracyju ŭ pryvatnych damach, zakanadaŭca (a my viedajem, chto ŭ nas zakanadaŭca) pazbaviŭ dziasiatki partyjnych arhanizacyj lehalnaha statusu. Składvajecca absurdnaja situacyja: pavodle statutu usie siabry partyi roŭnyja, ale nie ŭsie majuć prava adnolkava ŭdzielničać u palityčnym i navat u partyjnym žyćci.

Prymajučy da razhladu dakumienty abłasnych i Minskaj haradskoj partyjnych kanfierencyj, upraŭleńni justycyi adsočvali, kab siarod pravamocnych delehataŭ hetych kanfierencyj nie było pradstaŭnikoŭ haradskich i rajonnych partyjnych arhanizacyj, jakija nie zarehistravany abo nie stajać na ŭliku. I kali takija parušeńni zdaralisia, abłasnyja ŭpraŭleńni justycyi abviaščali kanfrencyi nielehitymnymi.

Tym bolš za vykanańniem hetaje normy zakona sačyła Ministerstva justycyi.

Užo niekalki źjezdaŭ zapar Biełaruskaja sacyjał-demakratyčnaja partyja (Hramada) praviała biez udziełu delehataŭ ad «nielehalnych» arhanizacyj. Tak było i sioleta. Na źjeździe adsutničali delehaty ad Homielskaj i Mahiloŭskaj abłaściej, bo tam niama zarehistravanych (pastaŭlenych na ŭlik) abłasnych partyjnych arhanizacyj, bo zakon zabaraniaje dziejnaść takich arhanizacyj, bo dahetul Miniust pilna sačyŭ, kab siabry takich arhanizacyj nie byli pradstaŭleny na źjeździe.

I raptam vyśviatlajecca, što «diejatielnosť niezariehistrirovannych libo nie postavlennych na učiet orhanizacionnych struktur političieskich partij na tierritorii Riespubliki Biełaruś» dazvalajecca, što hetyja arhanizacyi nie tolki majuć prava, ale abaviazkova pavinny być pradstaŭleny na partyjnym źjeździe. Navat bolš: kali hetyja («nielehalnyja») arhanizacyi nie pradstaŭleny na źjeździe, to sam źjezd nielehitymny.

Nie dumajcie, što z zakona vykinuta słova «zaprieŝajetsia». Nie, jano ćviorda staić na tym samym miescy (hladzicie tekst zakona na sajcie Ministerstva justycyi). Ale tyja, chto sočyć za vykanańniem zakona, majuć ciapier inšuju dumku nakont hetaj pravavoj normy i ličać, što jaje možna nie vykonvać.

Voś jak jano atrymlivajecca: u zakonie adno, a na praktycy druhoje. Adnak nichto nie harantuje, što zaŭtra tyja ž samyja čynoŭniki nie paviernucca na 180 hradusaŭ i znoŭ nie pamianiajuć svoj pohlad na apošniuju častku artykuła 18-ha.

Karaciej, u našaj demakratyčnaj i pravavoj dziaržavie žalezna dziejničaje tolki adno praviła. I hučyć jano tak: «zakon jak dyšła: kudy paviarnuŭ, tudy i vyjšła».

* * *

Zahałovak ad Redakcyi. Zahałovak aŭtara: «Manipulatary».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?