Z kastryčnika hetaha hoda ŭ Biełarusi źjaviŭsia novy vid nieruchomaści — mašyna-miesca. «U metach prastaty i dastupnaści pracedury afarmleńnia takich abjektaŭ i pravoŭ na ich praduhledžvajecca, što mašyna-miescy buduć padlahać dziaržaŭnaj rehistracyi. Heta dazvolić spraścić miechanizm prodažu mašyna-miescaŭ i pavysić ich pryvabnaść dla pakupnikoŭ», — havorycca ŭ aficyjnym kamientary da adpaviednaha ŭkaza. Kupić miesca dla mašyny stała lahčej, ale nie tańniej.
Havorka viadziecca pra padziemnuju parkoŭku, jakuju ŭładalnik aŭtamabila vykuplaje ŭ svaju ŭłasnaść. Takaja mahčymaść jość u žycharoŭ daloka nie kožnaha doma — padziemnyja stajanki jość tolki ŭ darahich novabudoŭlach. Naprykład,
kampanija «Inviest-Sistem», jakaja buduje dom na praśpiekcie Dziaržynskaha ŭ Minsku, pradaje 63 miescy na padziemnaj stajancy. Cana kožnaha pieravyšaje 83 miljony rubloŭ. Heta kala $28 tysiač!Va ŭłasnaść pierachodzić niekalki kvadratnych mietraŭ zaasfaltavanaha pakryćcia. Heta navat nie haraž, jaki možna vykarystoŭvać dla zachoŭvańnia niejkich rečaŭ. Čamu ž tak doraha? «Našyja ekanamisty vyličyli mienavita takuju sumu. Sistemy achovy i pažaratušeńnia, śpiecyjalnaje pakryćcio patrabujuć vialikich vydatkaŭ», — kažuć pradstaŭniki kampanii.
U pieršym biełaruskim chmaračosie «Vietraź», što budujecca na skryžavańni vulic Kalvaryjskaj i Kłary Cetkin, mašyna-miesca kaštuje $25 tysiač.Na 204 kvatery praduhledžana 203 parkovačnyja miescy.«Našyja klijenty — zabiaśpiečanyja ludzi. Jany mohuć dazvolić sabie takija vydatki, tym bolš što dom znachodzicca ŭ centry horada, dzie znajści inšuju stajanku prablematyčna», — kamientujuć u ofisie zabudoŭščyka.
Kali šukać biudžetny varyjant, to možna znajści košt $16 tysiač. Stolki kaštuje miesca ŭ domie na Hrušaŭcy ad kampanii «Łada-Inviest». Dla paraŭnańnia,
košt padziemnych parkovačnych miescaŭ u centry Maskvy dasiahaje $200 tysiač!Siaredni «biudžetny» varyjant u spalnym rajonie rasijskaj stalicy kaštuje $43 tysiačy.
Cikava paraŭnać košt minskaha mašyna-miesca z cenami na druhasnym rynku žylla. Pavodle infarmacyi z sajta Realt.by, na prodaž vystaŭlenyja niedarahija adnapakajovyja kvatery koštam $32—33 tysiačy. Płošča takich kvater składaje kala 30 kvadratnych mietraŭ.
