Siarhiej Ryžoŭ, jaki admoviŭsia balatavacca na prezydenckuju pasadu z toj pryčyny, što pad ciskam niepasrednaha kiraŭnictva jaho inicyjatyŭnaja hrupa nia zdoleła sabrać 100 tysiač podpisaŭ, siońnia atrymaŭ zahad na zvalnieńnie.
Spadara Ryžova zvolnili nibyta za prahuł. Jon raspavioŭ, što siońnia kiraŭnictva pładova-harodninnaha kambinatu «Noŭka», dzie jon pracavaŭ načalnikam sektaru źniešnieekanamičnych suviaziej, spačatku paraiła napisać jamu zajavu na zvalnieńnie pavodle ŭłasnaha žadańnia. Kali jon admoviŭsia, byŭ vydadzieny zahad na zvalnieńnie.
Pavodle Siarhieja Ryžova, pryčyna zvalnieńnia nadumanaja: administracyja pradpryjemstva
abvinavaciła jaho ŭ tym, što jon «prahulaŭ» try hadziny pracoŭnaha času 4 kastryčnika.
U toj dzień zranku, pavodle spadara Ryžova, jon vyklikaŭ dachaty ŭčastkovaha lekara, bo drenna pačuvaŭsia. Adnak balničny list jamu nie dali — lekarka prapanavała jamu ŭviečary źjavicca na kamisiju ŭ palikliniku. Da 12-j hadziny Siarhiej Ryžoŭ pajechaŭ u sud, dzie raźbirałasia sprava pra nieŭklučeńnie ŭ vybarčuju kamisiju pravaabaroncy Paŭła Levinava. Na toj čas patencyjny kandydat na prezydenckuju pasadu byŭ adnym z tych, chto rekamendavaŭ spadara Levinava, i tamu musiŭ być na pracesie ŭ jakaści śviedki.
Paśla sudu Siarhiej Ryžoŭ rušyŭ u palikliniku i prajšoŭ medyčny ahlad. Daviedku z palikliniki i pozvu ŭ sud jon pradstaviŭ kiraŭnictvu ŭ zakonnym paradku, ale try hadziny — ad vizytu lekara da pačatku sudovaha pracesu — jamu zaličyli jak prahuł. Eks-kandydat na ŭdzieł u prezydenckich vybarach kaža, što pahrozy pra mahčymaje zvalnieńnie čuŭ ad dyrektara kambinatu z taho samaha času, jak stała viadoma pra jaho namier balatavacca. Jon kaža taksama, što pad ciskam kiraŭnictva siońnia musiŭ zvolnicca i kiraŭnik jahonaj inicyjatyŭnaj hrupy Danił Hitcovič — jon pracavaŭ specyjalistam sektaru źniešnieekanamičnaj dziejnaści na tym samym kambinacie «Noŭka».
Radyjo Svaboda
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
