Staršynia CVK Lidzija Jarmošyna padzialiłasia z žurnalistami vynikami etapu zboru podpisaŭ patencyjnymi kandydatami na pasadu prezidenta.

Niaklajeŭ i Sańnikaŭ u lidarach

Pa jaje słovach, nieabchodnyja sto tysiač u CVK zdali adzinaccać kandydataŭ. «U mianie jazyk nie pavaročvajecca skazać, što pretendenty sabrali podpisy, tamu ja i kažu, što zdali», — kaža Ł.Jarmošyna.

«Navat pry pieršasnym ahladzie kidajecca ŭ vočy šmatlikija parušeńni», — praciahvaje kiraŭnica vybarkamu. Najpierš jana kaža, što niekatoryja kandydaty padavali nie aryhinalnyja podpisy, a ksierakopii, što zabaroniena. Chto mienavita z kandydataŭ rabiŭ tak, spn.Jarmošyna nie adkazała.

Pravierka padpisnych listoŭ budzie prachodzić da 8 listapada.

Kali brać dakładnyja ličby pa kožnamu z kandydataŭ, to jany vyhladajuć nastupnym čynam:

Alaksandr Łukašenka — 1 113 014 podpisaŭ;

Uładzimir Niaklajeŭ — 161 824;

Andrej Sańnikaŭ — 150 168;

Jarasłaŭ Ramančuk — 128 699;

Viktar Ciareščanka — 122 520;

Aleś Michalevič — 120 531;

Mikoła Statkievič — 117 989;

Dźmitryj Us — 110 753;

Uładzimir Pravalski — 109 338;

Ryhor Kastusioŭ — 107 083;

Vital Rymašeŭski — 105 318.

Cikava, što pradprymalnik Uładzimir Pravalski sabraŭ usie svaje podpisy na terytoryi adnaho rajonu — Pieršamajskaha ŭ Viciebsku. Ahułam tam vybarcaŭ 115 tysiač. Tolki 6 tysiač nie padpisali.

Lidzija Jarmošyna kaža, što rekordnuju kolkaść zarehistravanych kandydataŭ nie treba vyklučać. «Padychod budzie zakonnym. Na chłuśniu vočy zapluščvać nie budziem», — kaža staršynia CVK.

Što možna BRSM, partyjam nielha

Skončyłasia vyłučeńnie pradstaŭnikoŭ u skład učastkovych vybarčych kamisii. Ich było sfarmiravana 6390. Dla pracy ŭ ich padało zajavy 83 960 čałaviek.

Jarmošyna kaža, što zadavolić usie zajaŭki, naturalna, budzie niemahčyma. Na heta karespandent radyjo «Svaboda» Uładzimir Hłod zaznačyŭ, što jak tady možna na 100% uklučać usich vyłučencaŭ ad BRSM, jak było zroblena pry farmavańni terytaryjalnych kamisii.

Jarmošyna nie razhubiłasia: «Značyć, ludziej dobrych vyłučyli».
Na dumku Jarmošynaj, u lubym vypadku vyrašać heta buduć miascovyja ŭłady. «Važnym źjaŭlajecca nakolki hetyja ludzi zdolnyja pracavać u kamandzie. A mnohija apazicyjaniery nie mohuć isnavać u kalektyvie».

Siarod partyj najbolšuju kolkaść vyłučencaŭ zrabiła Kamunistyčnaja partyja — 700 čałaviek. Z apazicyjnych — AHP, 505.

Ad prafsajuzaŭ vyłučana 10 tysiač pradstaŭnikoŭ, ad «Biełaj Rusi» — 4 300.

Prazrystych skryniaŭ nie budzie

Misiju ABSIE znoŭ uznačalić pasoł Hiert Arens. Niamiecki dypłamat užo pracavaŭ na vybarach u Biełarusi ŭ 2006 i 2008. Tyja vybary byli pryznanyja niesvabodnymi. Misija ABSIE fiksavała šmatlikija parušeńni.

Zaraz pry ŭčastkach akredytavana 388 naziralnikaŭ. Ad nastupnaha tydnia pracu ŭ krainie pačnie misija ABSIE.

Cikava, što misiju SND pa Mahiloŭskaj vobłaści ŭznačalvaje Jury Kułakoŭski. Cikava, što hety čałaviek byŭ deputatam łukašenkaŭskaj pałaty pradstaŭnikoŭ.

Jarmošyna kaža, što heta nie supiarečyć dziejnamu zakanadaŭstvu.

A voś debaty ŭ žyvym efiry ŭsio ž nie płanujucca. Staršynia CVK kaža, što nivodzin z kandydataŭ z padobnaj prapanovaj nie vychodziŭ.

Što datyčyć prazrystych skryniaŭ, jakija prapanoŭvaŭ kandydat Uładzimir Niaklajeŭ, to prymać ich nie buduć. «Padčas vybaraŭ nie moža akazvacca humanitarnaha dapamoha z‑za miažy», — kaža Jarmošyna.

Tym nie mienš, jana kaža, što jość rekamiendacyja na ŭčastkach, dzie nabyvajecca novy ryštunak, kuplać mienavita prazrystyja skryni. U Minsku, pa jaje słovach, takich učastkaŭ dosyć šmat.

A što tyčycca słovaŭ Mikałaja Łazavika ab pryjomie skryniaŭ ad Niaklajeva, to adkaz byŭ: «Jon, napeŭna, prosta pažartavaŭ».

«Pakazańni Kazłova — staraja pravakacyja»

Byli zakranutyja skandalnyja pakazańni padpałkoŭnika milicyi Mikałaja Kazłova. Jon śćviardžaŭ pra falsifikacyi na adnym ź minskich učastkaŭ padčas parłamienckich vybaraŭ 2008.

«Da nas nichto pa fakcie hetaj publikacyi nie źviartaŭsia. Hetaja publikacyja — staraja pravakacyja. Padniataja, bo nie było nijakich inšych temaŭ», — skazała Jarmošyna.

Jana zaznačyła, što hety vypadak nie ŭvajšoŭ u vynikovuju spravazdaču misii ABSIE, a sam Anatol Labiedźka taksama nie vielmi čaplaŭsia za jaho, što pakazalna.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?