Jahonaja ekanamičnaja prahrama horšaja za łukašenkaŭskuju.
«Rasijski kapitał pavinien skuplać tut toje, što i tak, pa sutnaści, zaležyć ad Rasii. I što, pa vialikim rachunku, akramia Rasii, nikomu nie treba», — zajaviŭ Niaklajeŭ, prezientujučy svaju zamiežnapalityčnuju płatformu. U jakaści prykładu jon pryvioŭ naftapravody, jakija, pavodle jaho słoŭ, patrabujuć «kapitalnaha ramontu, na jaki ŭ Biełarusi niama hrošaj». Jon taksama ŭzhadaŭ «tyja ž naftapierapracoŭčyja zavody, jakija pracujuć na rasijskaj syravinie. Kali rasijskija kampanii ŭvojduć tudy jak ułaśniki, to ź imi možna budzie lahčej vieści pieramovy, lahčej vyrašać pytańni, jakija na siońniašni dzień nie vyrašajucca», — adznačyŭ Niaklajeŭ.
Kiraŭnik vybarčaha štaba Niaklajeva Andrej Dźmitryjeŭ ŭdakładniŭ, što «ciapier kapitał nie maje nacyjanalnaj prynaležnaści». A palitołah Śviatłana Navumava dadała, što rasijski kapitał, jaki moža pryjści ŭ Biełaruś, nie abaviazkova budzie aliharchičnym.«U Rasii źjaviłasia «druhaja chvala» pradprymalnikaŭ i biźniesmienaŭ, jakija majuć namier vieści svoj biźnies prazrysta i adkryta», — vieryć jana.
I heta ŭ časie, kali ŭ rejtynhach karupcyi Rasija apuściłasia na apošnija pazicyi ŭ śviecie.
Zrešty, ci vieryć? Cynizmu ŭ vykazvańniach ideołahaŭ «Havary praŭdu» bolš, čym naiŭnaści.
Naprykład, adnačasova Niaklajeŭ abiacaje nablizić Biełaruś da jeŭrapiejskich standartaŭ, kab «razam z Rasijaj i Ukrainaj» zbližacca ź ES. Ale kožny paet viedaje, što Ukraina, niahledziačy na vializny cisk, admoviłasia puścić «Hazprom» u svaju enierhatranspartnuju sistemu.
Navat ES, zaležnaść jakoha ad rasijskich enierhanośbitaŭ nižejšaja, i dzie tranzit ŭ ekanomicy adyhryvaje mienšaje značeńnie, pieraściarohsia.
Jeŭrasajuz uvioŭ normu, pavodle jakoj transpartnyja sietki, naprykład, hazapravody, nie mohuć naležać vytvorcam, naprykład, «Hazpromu», kab nie ŭtvarałasia manapolija. A Biełaruś ža ŭ hetym pytańni našmat bolš uraźlivaja, čym ES.Biełaruś abaviazanaja być aściarožnaj z dopuskam rasijskaha kapitału, z ulikam taho, što Rasija i biez taho ŭžo vałodaje mahutnymi instrumientami ŭpłyvu na Biełaruś.
«Havary praŭdu» choča zachapić nišu prarasijskaj palityčnaj siły, stać bolš ruskimi za Alaksandra Łukašenku. Adsiul i hetaje prapanavańnie sastupki najkaštoŭniejšych ekanamičnych aktyvaŭ.Darečy, maje ŭražańnie, što kampanija nie taho lidara sabie abrała. Niaklajeŭ niedastatkova prarasijski dla tych dzieciukoŭ, jakija za im stajać.
Kulturnaja prahrama Niaklajeva lepšaja za łukašenkaŭskuju.U hetaj častcy palityčnaja ahitacyja «Havary praŭdu» niasie pazityŭ, bo admaŭlaje savietyzm i aŭtarytaryzm i prapanuje padtrymčyja miery dla biełaruskaj kultury, choć i z zachavańniem rasiejskaj movy ŭ jakaści dziaržaŭnaj.
Ekanamičnaja prahrama Niaklajeva horšaja za łukašenkaŭskuju. Realizacyja takoj prahramy pryviała b da rostu karupcyi i sacyjalnaj dehradacyi.Da taho samaha, da čaho jana pryviała ŭ samoj Rasii. Łukašenka, prynamsi, nie stavić prahramnaj zadačy prodažu biełaruskaha rodavaha srebra — zavodaŭ i naftapravodaŭ — Rasii.
Navat kali palityčnaja vaha Niaklajeva źnikomaja, jahonaja rytoryka prabudžaje apietyty rasijskaha kapitału.
