«NN»: Siońnia stała viadoma ab supolnym vizicie ministraŭ zamiežnych spraŭ Polščy i Niamieččyny ŭ Miensk. Na Vašu dumku, ab čym jany buduć razmaŭlać z Łukašenkam?

Alaksandr Milinkievič: Ja dumaju, što ŭ ES zaraz jość rasčaravańnie ad adnosinaŭ ź Biełaruśsiu. Była nadzieja, što ich udasca značna palepšyć, ale hetaha nie adbyłosia. Ź inšaha boku palapšeńnie stasunkaŭ z našaj krainaj pa-raniejšamu zastajecca dla Jeŭropy važnym nakirunkam. Najchutčej, razmova budzie datyčyć vybaraŭ. I ES, i my ŭsie nastojvajem na tym, što pakul u krainie niama prazrystych i volnych vybaraŭ, nielha budavać demakratyju.

Na maju dumku, u taki momant nielha taksama zabyvać na pravy čałavieka. U Biełarusi jość palitviaźni, pastajanna parušajucca pravy asoby, ab hetym taksama treba havaryć.

«NN»: Ci hatovaja Jeŭropa da taho, kab pryznać Łukašenku?

AM: Ja prytrymlivajusia dumki, što pryznańnie prezidenckich vybaraŭ lehitymnymi mahčymaje. Adnak nie dumaju, što mahčymyja niejkija sastupki dla Łukašenki z boku ES i Zachadu. Uvajści ŭ Jeŭropu z čornaha chodu nie ŭdasca. Intehracyja, značnaje palapšeńnie adnosinaŭ mahčymaje tolki pry vykanańni ŭmovaŭ, ja kija daŭno ahučanyja i ŭsim viadomyja.

«NN»: Niadaŭna ŭ Varšavie adbyłasia sustreča R.Sikorskaha ź ministram zamiežnych spraŭ Rasii Siarhiejem Łaŭrovym. Akurat napiaredadni vizitu pieršaha ŭ Miensk. Ci nie śviedčyć heta ab isnavańni damoŭlenaściaŭ pamiž ES i Rasijaj na temu Biełarusi?

AM: Ja liču, što Biełaruś — nie nastolki važnaje miesca ŭ Jeŭropie, kab takija sustrečy datyčyli tolki nas. I navat u adnosinach našych susiedziaŭ my zajmajem nie samaje hałoŭnaje miesca.

Jeŭrapiejski Sajuz zaraz prykładaje namahańni dla raźvićcia adnosinaŭ z Rasijaj i sustreča ŭ Varšavie dobra ab hetym śviedčyć.

Viadoma, temu Biełarusi mahli abmiarkoŭvać, ale ab isnavańni kankretnych damoŭlenaściaŭ pamiž ES i Rasijaj na temu Biełarusi havaryć nie varta.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?