Apazicyjny palityk Uładzimir Malarčuk raskazvaje ab tym, jak jamu ŭdałosia patrapić u Vilejskuju rajonnuju kamisiju pa vybarach prezidenta.

Fota Siarhieja Makareviča.

Fota Siarhieja Makareviča.

«NN»: Sp. Uładzimir, jak atrymałasia, što vas, kiraŭnika abłasnoj filii AHP, dapuścili da praca vybarčaj kamisii?

UM: Ja prajšoŭ, bo staršynia Vilejskaha rajvykankama Siniła vykazaŭsia ŭ maju padtrymku. «Ja budu za jaho hałasavać», — skazaŭ jon. I amal usie prahałasavali za maju kandydaturu, akramia redaktara rajonnaj haziety Kuzaŭkinaj.

«NN»: Čamu mer horada «zastupiŭsia» za vas? Heta zahad źvierchu ci jaho ŭłasnaja inicyjatyva?

UM: Užo šasnaccać hadoŭ my nakiroŭvajem ludziej u kamisii i nikoli tudy nichto nie prachodziŭ. A tut taki padarunak. Ja mahu tolki zdahadvacca. Chutčej za ŭsio, heta byŭ zahad, bo pa Minskaj vobłaści našych ludziej dapuścili jašče ŭ Žodzinie i Klecku.

«NN»: Akramia vas jašče pretendenty ad apazicyi ŭ skład kamisii byli?

UM: Tak. Heta pradstaŭnik ad partyi BNF. Jon vyłučaŭsia šlacham zboru podpisaŭ. Ale jaho proźvišča vykinuli sa śpisu navat biez abmierkavańnia. Nas było piatnaccać čałaviek, a ŭ kamisiju patrabavałasia trynaccać. Vosiem čałaviek pretendavali ŭvajści ŭ kamisiju šlacham zboru podpisaŭ. I mienavita apazicyjaniera nie ŭklučyli. Možna ž było demakratyčnymi mietadami vyrašyć, chto lišni. Mnie adkazali tady, što hety čałaviek paźniej za astatnich padaŭ zajavu. Ale ž

kryteram nie źjaŭlajecca toje, chto pieršy dabiažyć da stała i pakładzie zajavu.

Heta łuchta.

«NN»: Kolki razoŭ źbirałasia kamisija na pracu?

UM: Tolki adzin raz. Čamu tak mała, ja nie viedaju. Ja navat nie ŭjaŭlaju, što naša kamisija moža rabić. Kali źbiaruć podpisy, pačniecca vialikaja praca pa ich praviercy. Ciapier, liču, dla členaŭ kamisii pavinny byli b pravieści sieminar.

«NN»: A čym zajmalisia na pieršym pasiadžeńni kamisii?

UM: Vybirali staršyniu, namieśnika, sakratarku. A prachodziła ŭsio nastupnym čynam. Kiraŭnik ideałahičnaha adździeła skazała, što były člen kamisii Čajkoŭskaja siabie dobra pakazała, tamu, maŭlaŭ, davajcie abiarom jaje staršynioj kamisii. Tolki padniali ruki, ja pačaŭ ich spyniać. Nichto ž nie pacikaviŭsia, ci jość inšyja prapanovy. Ja vystaviŭ svaju kandydaturu. Pahadzilisia hałasavać. Padnialisia ruki. Ja znoŭ pačaŭ ich spyniać. Kali ž u nas nie dyktatura, to davajcie hałasavać tajemna. Bo pry adkrytym hałasavańni ŭsie prahałasujuć «jak treba». Pastavili na hałasavańnie heta pytańnie. Ale, zrazumieła, mianie nie padtrymali. Namieśnikam taksama staŭ čałaviek ad ułady.

«NN»: Vy źbirajecie podpisy za Jarasłava Ramančuka. Jak u cełym usio prachodzić u Vilejcy?

UM: Tolki ŭ dvuch kvaterach admovilisia padpisacca, patłumačyŭšy tym, što buduć hałasavać za Łukašenku. Ale ŭ bolšaści vypadkaŭ ludzi da ŭsiaho adnosiacca abyjakava:

«A mnie ŭsio roŭna za kaho padpisvacca».

Narakajuć, što kandydataŭ šmat i ŭsio chodziać adzin za adnym zborščyki podpisaŭ. Siońnia ŭ mianie dva čałavieki admovilisia ad svaich podpisaŭ. Usieahulny strach prysutničaje. Čamu? Jany navat sami nie mohuć patłumačyć. Bajacca kanfliktaŭ na pracy. Ale z čaho być kanfliktam? Ludzi sami siabie zapužali.

«NN»: Jarasłaŭ Ramančuk — adzin ź piatnaccaci, za kaho ciapier źbirajuć podpisy. Ci bačycie vy niejki vychad na adzinaha kandydata ad apazicyi?

UM: Ja liču, što

surjoznych kandydataŭ — čaćviora: Kastusioŭ, Sańnikaŭ, Ramančuk, Niaklajeŭ.

Inšych ja nie ŭsprymaju. Paśla rehistracyi pytańnie ab adzinym paŭstanie. Nie toje, što adziny kandydat… Ja chacieŭ by, kab heta byŭ lidar, jaki vyviedzie nas na płošču i z płoščy ludziej nie ŭviadzie. Tolki ŭ takim rečyščy možna havaryć ab adzinym. Ciapier heta ciažka dajecca. Ambicyj va ŭsich šmat.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?