Što ŭ Biełarusi rasijskaje? 23

Jak Rasija pravodzić svaje intaresy za miažoj? Pavodle novaj daktryny, praz ekanamičnyja ryčahi. I Biełaruś tut — ekśpierymientalny palihon.

Ofis Łukojła ŭ Minsku. Fota Julii Daraškievič.

Łukašenkaŭskaja prapahanda padkreślivaje ekanamičnuju niezaležnaść krainy. Ale ŭžo siońnia składana znajści chacia b adnu halinu biełaruskaj haspadarki, u jakoj nie kruciacca rasijskija hrošy. «Krainu nie dali raściahnuć»? Ale 8 z 32 bankaŭ užo naležać rasijcam.

Usie vysokaprybytkovyja siehmienty rynku albo častkova akupavanyja ŭschodnim kapitałam, albo znachodziacca ŭ śfiery pilnaha intaresu susiedziaŭ. Ich kampanii nie tolki zarablajuć u Biełarusi. Jany źjaŭlajucca tut svojeasablivymi pravadnikami rasijskich kaštoŭnaściaŭ. Ahlad najiarčejšych pradstaŭnikoŭ biznesu Rasii na terytoryi našaj krainy.

Trubapravody i zapraŭki

Rasijskuju kampaniju «Hazprom», samuju prybytkovuju ŭ śviecie pa vynikach 2009, varta razhladać asobna ad inšych pradstaŭnikoŭ naftahazavaha biznesu, bo stolki dyviersifikavanaj majomaści niama ni ŭ koha inšaha.

Pa-pieršaje, «Hazpromu» naležać 50% akcyj «Biełtranshaza» razam z trubapravodami. Pa-druhoje — sietka aŭtazapravak «Hazpramnafty-Biełnaftapradukta». Urešcie, kampanija źjaŭlajecca suŭładalnikam akcyj Mazyrskaha naftapierapracoŭčaha zavoda, «Biełhazprambanka» i «Bresthazaaparata». Urešcie, hazapravod «Jamał-Jeŭropa»,

jaki prachodzić pa terytoryi Biełarusi, taksama hazpromaŭski.

Aproč profilnych aktyvaŭ, varta ŭzhadać i pra ideałahičnyja ryčahi «Hazproma». Telekampanija NTV, a značyć, u pryvatnaści, i «Chrosny Baćka» — sprava hazpromaŭskich ruk.

Nafta, haz, paliva

Bolš za 80 zapravak pa ŭsioj krainie maje «Łukojł» aliharchaŭ Vahita Alakpierava i Leanida Fieduna. Heta rekord dla pryvatnych kampanij. Abahnać ich pa kolkaści AZS choča «Tatnafta»,

intaresy jakoj łabiruje pasoł Rasii ŭ Biełarusi Alaksandr Surykaŭ. U tataraŭ u metach adkryćcio 150 zapravak, ale pakul nie vykananaja i tracina płanu.

«Juniviest-M», jaki ažyćciaŭlaje pastaŭki nafty z Jamała-Nianieckaj aŭtanomnaj akruhi ŭ Mazyr, a adtul u Jeŭropu, u papiarednija hady ŭvachodziŭ u trojku najbujniejšych padatkapłatnikaŭ krainy. Ciapier časy inšyja, i ŭnioski «Juniviesta» pamienieli.

Banki

Z 32 bankaŭ, zarehistravanych u Biełarusi, vosiem zasnavanyja na rasijskich hrošach.

Bank «Maskva-Minsk» uźnik na bazie «Maśbiznesbanka», jaki byŭ pryznany bankrutam. 66% akcyj naležyć uradu Maskvy i jaho daččynym kampanijam. Niezdarma kala hałoŭnaha ofisa banka niadaŭna adkryŭsia vieličny Dom Maskvy, budaŭnictva jakoha było całkam apłačana rasijskim bokam. Jašče kala 20% akcyj banka maje miljanier Andrej Baradzin.

«Biełhazprambank», jak vynikaje z nazvy, źjaŭlajecca daččynaj strukturaj rasijskaha «Hazprombanka». Uschodnim susiedziam naležyć bolš za 98% akcyj. Rešta dzielicca na dolu Dziaržaŭnaha kamiteta pa majomaści Biełarusi i «Biełtranshaza».

Rasijski «Vniešekonombank» kupiŭ biełaruski «Biełźniešekanombank»(98% akcyj u rasijcaŭ). I «Bank VTB» taksama na 71% naležyć rasijcam.

«MTBank» na 64% naležyć aŭtachołdynhu «Atłant-M», aficyjnamu dyleru kampanij «Ford» i «Falksvahien» u Biełarusi. Siarod suŭładalnikaŭ upłyvovaha chodynha, štohadovy abarot jakoha pieravyšaje $2 miljardy, jość i biełarus Aleh Chusajenaŭ, i rasijanin Ihar Malhin. Mienavita apošniamu prypisvajuć hałoŭnuju rolu ŭ kiraŭnictvie paśpiachovaj kampanijaj.

«Alfa-bank» znachodzicca va ŭłasnaści adnaho z najbahaciejšych rasijskich aliharchaŭ Michaiła Frydmana. U 2008 toj vykupiŭ u Nacbanka i niepalskich biznesoŭcaŭ dolu ŭ «Miežtorhbanku» i pierajmienavaŭ toj u adpaviednaści z nazvaj svajho kancerna «Alfa-hrup».

Rasijska-francuzskaj ustanovaj možna nazvać «Biełrasbank». 100% jaho akcyj skancentravanyja ŭ rukach «Rasbanka», kantrolny pakiet akcyj jakoha, u svaju čarhu, naležyć francuzskaj infiestycyjnaj hrupie, a rešta — aliharchu Uładzimiru Pataninu.

Adna z hałoŭnych nahod dla honaru biełaruskich uładaŭ — pryvatyzacyjny prodaž «Biełprambudbanka». Jahony pakupnik, rasijski «Śbierbank», zapłaciŭ u kancy minułaha hodu $280 miljonaŭ za 93% akcyj i ciapier źbirajecca vykupać astatnija doli ŭ drobnych akcyjanieraŭ.

Budaŭnictva

Pieršy minski chmaračos «Vietraź», «Minsk-Sici», žyłyja kvartały — rasijskija prajekty chodziać u favarytach u Alaksandra Łukašenki.

«Itera» aliharcha Ihara Makarava budzie mieć 70% akcyj u sprajektavanym «Minsk-Sici». Niahledziačy na prezidenckija pahrozy, prava na budaŭnictva elitnaha rajona ŭ rasijcaŭ pakul što zastajecca. Voś tolki sama «Itera» nie nacelvajecca na elitnaść žylla — «Minsk-sici» budzie «ŭpryhožany» panelnymi šmatpaviarchovikami. Padviali rasijcy i pry budaŭnictvie chmaračosa «Vietraź». Jany abiacali ŭźvieści praz darohu ad žyłoha doma jašče i biznes-centr, ale ŭ apošni momant stali nienaviaźliva prapanoŭvać pabudavać zamiest jaho jašče adzin šmatkvaternik.

A voś

rajony «Maskoŭski» i «Lebiadziny» — supolnaja inicyjatyva biełaruskich uładaŭ i mera Maskvy Juryja Łužkova. «Maskoŭskaja inviestycyjnaja budaŭničaja kampanija» atrymała prestyžnyja kavałki ziamli pad žyłyja damy. Budaŭnictva pieršaha z rajonaŭ užo zakančvajecca.

Mabilnaja suviaź

Hałoŭny hulec na mabilnym rynku Biełarusi — kampanija MTS. Jaje nielha nazvać vyklučna rasijskaj, bo AAT «MTS» na čale z aliharcham Uładzimiram Jeŭtušenkavym vałodaje 49% akcyj mabilnaha apieratara. Kantrolny pakiet tryvała trymaje ŭ svaich rukach biełaruskaja dziaržava. I zusim nie źbirajecca rasstavacca sa svajoj dolaj, niahledziačy na šmatlikija zachady rasijskaha boku.

Naŭprostaje dačynieńnie da mabilnaj suviazi majuć sietki sałonaŭ suviazi. Uładalnik hrupy kampanij «Suviazny» Maksim Nahatkoŭ pryjšoŭ na biełaruski rynak u 2007 na miesca miascovaj sietki «Miehaplus». Ciapier jahony biznes u krainie pradstaŭleny 24 sałonami ŭ stalicy. Pa ŭsioj krainie ich kolkaść pieravyšaje sotniu. Dziejnaść ažyćciaŭlajecca pad ściaham ZAAA «Biełaja Vieža».

Pradstaŭnictva «Jeŭrasietki» ŭ Biełarusi z pakazalnym rasijskim ściaham na šyldzie zaŭsiody było ŭ centry hramadskaha abmierkavańnia. To kampanija nie parazumiełasia z MTS, to abviaščała pra mahčymy sychod ź biełaruskaha rynku. Skandały skončylisia adrazu paśla taho jak epatažny aliharch Jaŭhien Čyčvarkin pradaŭ biznes «Alfa-hrupie» Michaiła Frydmana. Ciapier rasijcy nie naradujucca na biełaruskaje pradstaŭnictva, nazyvajučy jaho samym paśpiachovym. Zakład prybytkovaści kampanii ŭ tym, što jana pieršaj stała pracavać z usimi tryma apieratarami mabilnaj suviazi farmatu GSM — MTS, «Viełkomam» i «Łajfam».

Markiety

Pradstaŭnictva Rasii ŭ biełaruskim rytejle pakul nie mocnaje, ale raście. Z hipiermarkietaŭ, aproč sumiesnaha «Prastora», uschodnija hrošy kruciacca tolki ŭ hrodzienskim «Ałmi».

I toje jaho ŭznačalvaje biełarus pa pachodžańni Alaksandr Zarybka, jaki źjaŭlajecca adnym z suŭładalnikaŭ rasijskaj hrupy kampanij «Viktoryja».

Kapitał staličnych hipiermarkietaŭ «Prastor», jaki pryniata ličyć votčynaj biarozaŭca Juryja Čyža, pa¬dzieleny pamiž im i rasijskim «Siomym kantynientam». Rasijskaja kampanija pieražyvaje nie najlepšyja časy. Jaje daŭhi pieravyšajuć $300 miljonaŭ, i da adkryćcia novych «Prastoraŭ» u spalnych rajonach Minska rasijcy dačynieńnia nie mieli.

Sietka ŭniviersamaŭ «Biełmarkiet» apieruje mienšymi ličbami tavaraabarotu. Jana pačała zavajoŭvać biełaruski rynak z Žodzina i Mahilova. Uładalnik — usio taja ž frydmanaŭskaja «Alfa-hrup».

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH