Na «Słavianskim bazary ŭ Viciebsku» adkryłasia vystava skrep-arta — unikalnych rabot, vyrablenych z utylu.

Padčas fiestyvalu «Słavianski bazar u Viciebsku» ŭ abłasnym krajaznaŭčym muziei 8 lipienia adkryłasia vystava art-miechanizmaŭ «Ruch fantazij» Mižnarodnaj hildyi majstroŭ z Sankt-Pieciarburhu — tvorčaha abjadnańnia kavaloŭ, dyzajnieraŭ, architektaraŭ, žyvapiscaŭ i inšych majstroŭ, źviazanych z mastactvam i ramiostvami.

U ekspazicyju ŭvajšli 68 tvoraŭ majstroŭ Ihara Ivanova, Taćciany Šubinaj i Volhi Ardoŭskaj z Sankt-Pieciarburhu, jakija pracujuć u adnym z samych cikavych kirunkaŭ u sučasnym mastactvie — skrep-art (z anhł. scrap — łom, pradmiet utylu, vykarystanaja reč). Čaroŭnaje, tvorčaje pieratvareńnie vykinutych pradmietaŭ u art-abjekt — hałoŭnaje ŭ paniaćci skrep-arta. Heta niešta nakštałt reinkarnacyi žaleza.

Art-miechanizmy mastačak Šubinaj i Ardoŭskaj vyrablenyja ź miechanizmaŭ, detalaŭ i kuchonnych pradmietaŭ — hajek, nakryvak, kołaŭ, łyžak, drušlakoŭ, šruboŭ, ščotak, kranaŭ, śpidomietraŭ, spružyn, far i inšaha mietaličnaha łomu, jakija adsłužyli svoj termin. Z dapamohaj hetych vykinutych praź niepatrebnaść rečaŭ mastački stvarajuć niezvyčajnyja vobrazy — žaleznych sabak, koz, nasiakomych, ptušak, ryb, koniej i ludziej. U niekatorych rabotach jość elemient miechaniki: ptuški abo nasiakomyja machajuć kryłami, kačajuć hałavoj, varušać kancavinami, u inšych rabotach adčyniajucca dźviercy, možna zapalić lichtaryki i h.d.

Vystava pieciarburhskich majstroŭ art-miechanizmaŭ budzie pracavać u Viciebskim abłasnym krajaznaŭčym muziei i paśla fiestyvalu «Słavianski bazar», da 15 žniŭnia.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?