Uračystaje adkryćcio fiestyvalu «Słavianski bazar» projdzie siońnia na scenie Letniaha amfiteatra ŭ Viciebsku.

Kala 5 tys. haściej z 34 krain śvietu voźmuć udzieł u XIX forumie mastactvaŭ. Upieršyniu na fiestyval pryjeduć pradstaŭniki Čarnahoryi, Panamy i Kuby. U prahramie «Słavianskaha bazaru» zajaŭlena 70 tvorčych prajektaŭ, dla praviadzieńnia jakich buduć zadziejničanyja 16 kancertnych i tvorčych placovak horada. Tolki na hałoŭnaj scenie — u Letnim amfiteatry — projdzie 19 kancertaŭ. Upieršyniu abnoŭlenaja płošča Pieramohi stanie miescam praviadzieńnia adrazu dvuch kancertaŭ.

XIX Mižnarodny fiestyval mastactvaŭ «Słavianski bazar u Viciebsku» zachavaje tradycyjnuju strukturu i znoŭ padoryć sustrečy z majstrami mastactvaŭ Biełarusi, Rasii i Ukrainy, darosły i dziciačy piesiennyja konkursy, a taksama zvykłuju kina- i teatralnuju prahramu.

Zornym internacyjanalnym składam udzielnikaŭ budzie admietny kancert uračystaha adkryćcia: Dźmitryj Chvarastoŭski, Mikałaj Baskaŭ, Łarysa Dolina, Juryj Antonaŭ, Stas Michajłaŭ, Alena Vajenha, Ina Afanaśjeva, ansambli «Pieśniary» i «Siabry», Taisija Pavalij, Tomas Anders, Čeni i Nieviehryn, Chielena Vondračkava.

U kancertnych afišach fiestyvalu taksama paznačanyja imiony Alaksandra Siarova, Valeryi, Dzimy Biłana, Tota Kutuńjo. Arhanizatary fiestyvalu nie zabylisia i ab spraktykavanaj publicy. Dla muzyčnych hurmanaŭ vystupiać Nino Katamadzie i hrupa «Insight», džaz-kabare Siarhieja Skrypki i kabare-bend «Siarebranaje viasielle». Znaŭcy vakalnaha mastactva, biez sumnieńnia, buduć udziačnyja za solnyja kancerty Dźmitryja Chvarastoŭskaha i Siarhieja Zacharava. Nie zastalisia biez padarunka i teatrały. Dla ich svaje śpiektakli pryviazuć Maskoŭski teatr na Paŭdniovym Zachadzie, Sankt-Pieciarburhski dziaržaŭny moładzievy teatr na Fantancy. Śviatłana Kručkova budzie čakać svaich pakłońnikaŭ na tvorčym viečary. U kinaprahramie «Słavianskaha bazaru» — biełaruskija, rasijskija i ŭkrainskija filmy. Viadomaja aktrysa Viera Hłaholeva pryviazie ŭ Viciebsk svaju režysiorskuju rabotu — film «Adna vajna».

U fiestyvalnuju mituśniu ŭniasuć intryhu darosły i dziciačy konkursy vykanaŭcaŭ estradnaj pieśni. U mižnarodnym konkursie maładych vykanaŭcaŭ voźmuć udzieł 19 kankursantaŭ z 19 krain, upieršyniu ŭklučycca ŭ baraćbu za Hran-pry pradstaŭnik Kuby. Biełaruś na mižnarodnym konkursie vykanaŭcaŭ estradnaj pieśni «Viciebsk-2010» budzie pradstaŭlać Dzianis Viaršenka — uładalnik Hran-pry mižnarodnaha fiestyvalu-konkursu sceničnaha mastactva «Na vysokaj chvali-2009» (RF), ad Rasii zajaŭlenaja Hanna Małyšava, pryznanaja najlepšaj na Usierasijskim konkursie-fiestyvali estradnaha mastactva imia B. Brunova. Žury darosłaha konkursu ŭznačalić zorka ŭkrainskaj estrady Taisija Pavalij — uładalnica Hran-pry konkursu maładych vykanaŭcaŭ «Viciebsk-1993» na «Słavianskim bazary».

Na dziciačym piesiennym konkursie, jaki projdzie 8-y raz, buduć pradstaŭlenyja 22 udzielniki z 19 krain, u tym liku pieršy raz junyja artysty ź Niderłandaŭ i Čarnahoryi. Za Biełaruś vystupiać Złata Łarčanka i Ania Zajcava.

Amal 900 ramieśnikaŭ i mastakoŭ stanuć udzielnikami Horada majstroŭ na «Słavianskim bazary ŭ Viciebsku». Tradycyjnymi placoŭkami dla raźmiaščeńnia narodnych majstroŭ i ramieśnikaŭ budzie vulica Čajkoŭskaha, viadučaja da centra «Dźvina», i placoŭki kala kancertnaj zały «Viciebsk». Staradaŭnija vulicy Tałstoha i Suvorava, jakija stali niadaŭna piešachodnymi, pieratvoracca ŭ sałon pad adkrytym niebam, dzie svaje tvory vystaviać amal 100 mastakoŭ.

Dla tych, chto nie zmoža pabyvać na fiestyvali, Nacyjanalnaja dziaržaŭnaja teleradyjokampanija Respubliki Biełaruś — hałoŭny viaščalnik fiestyvalu — budzie vieści tranślacyi na praciahu ŭsich śviatočnych dzion. Pačynajučy z 9 lipienia hledačy Pieršaha kanała i telekanała «Ład» zmohuć ubačyć bolšuju častku ŭsich kancertaŭ fiestyvalu. Jak čakajecca, aśviatlać «Słavianski bazar» pryjeduć kala 400 žurnalistaŭ — pradstaŭnikoŭ drukavanych i elektronnych ŚMI z roznych dziaržavaŭ.

Uračystaje zakryćcio fiestyvalu projdzie 15 lipienia.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?