Łukašenkaŭskaje ahienctva BIEŁTA razhortvaje kampaniju suprać rasijskaha kiraŭnictva. 8 lipienia na sajcie BiełTA źjaviŭsia artykuł pad zahałoŭkam «Z kožnym hodam usio bolš rasijcaŭ bačać u Rasii prykmiety kultu asoby Uładzimira Pucina».

Pry hetym materyjały BIEŁTA pieradrukoŭvaje bolšaść łukašenkaŭskich centralnych i rajonnych haziet. Pryvodzim poŭny tekst artykuła.

Z kožnym hodam usio bolš rasijcaŭ bačać u Rasii prykmiety kultu asoby Uładzimira Pucina. Pra heta piša «Hazieta. Ru» sa spasyłkaj na sacapytańnie Levada-centra ad 2–5 lipienia.

Kult asoby prem'jer-ministra Uładzimira Pucina bačyć kožny čaćvierty rasijec.
Pavodle apytańnia, 27% rasijcaŭ ličać, što «ŭsie prykmiety kultu asoby Pucina ŭ najaŭnaści». Jašče 28% miarkujuć, što kultu asoby pakul niama, ale «pieradumovaŭ dla jaho ŭsio bolš i bolš». Tracina respandentaŭ (33%) ličyć, što «nijakich prykmietaŭ takoha kultu niama». Narešcie, nie zmahli adkazać 12%.
Sacyjołahi adznačajuć, što dla bolšaści rasijcaŭ kult asoby pierastaŭ być strašnym i niehatyŭnym.
Jašče čatyry hady tamu kult asoby Pucina zaŭvažali tolki 10%. «Rost sapraŭdy ŭražlivy», — pryznaje kiraŭnik adździełu sacyjalna-palityčnych daśledavańniaŭ

Levada-centra Barys Dubin.

Miarkujučy pa dadzienych sacapytańnia, kult asoby z kožnym hodam bačyć usio bolš i bolš ludziej. U sakaviku 2006 «usie jaho prykmiety byli ŭ najaŭnaści» dla 10%, u kastryčniku 2007 — užo dla 22%, jašče praz dva hady — dla 23%, a jašče praź mienš čym hod hety pakazčyk vyras da 27%. Kolkaść rasijcaŭ, jakija nie bačać nijakich prykmiet kultu asoby, źniziłasia z 57% da 33%.

«Sprava ŭ tym, što samo paniaćcie kultu asoby bolš nie źjaŭlajecca takim niehatyŭnym, jak było paśla vykryćcia Stalina. Ciapier heta chutčej pazityŭnaja acenka ludziej, jakija nie bačać ničoha strašnaha ŭ kulcie asoby», — skazaŭ Barys Dubin.

Jak patłumačyŭ sacyjołah, «za hady kiravańnia Pucina skłałasia takaja bolšaść rasijskaha nasielnictva, jakoje ŭ cełym uchvalaje isny paradak i ŭpeŭnienaje, što mienavita Pucin źjaŭlajecca harantam paradku i stabilnaści». U asnoŭnym heta ludzi z adnosnym dastatkam, siaredniaha ŭzrostu, jakija zachoŭvajuć aktyŭnaść, u tym liku palityčnuju, jakija žyvuć u siarednich i małych haradach. Mienavita hetaja hrupa ludziej ličyć, što kancentracyja ŭsioj ułady ŭ rukach Pucina i kult jaho asoby karysnyja dla Rasii.

Sapraŭdy, bolš za pałovu rasijcaŭ (52%) ličać, što Rasii «idzie na karyść» toje, što ŭ rukach Uładzimira Pucina skancentravanaja praktyčna ŭsia ŭłada ŭ krainie. Tolki 22% dumajuć, što absalutnaja ŭłada premjera «ničoha dobraha Rasii nie abiacaje».

Amal 80% rasijcaŭ ličyć, što Rasii patrebny kiraŭnik — «mocnaja ruka».

44% rasijcaŭ ličać, što «mocnaja ruka» patrebnaja Rasii «pastajanna», a jašče 33% miarkujuć, što «byvajuć takija situacyi (naprykład, ciapier), kali treba zasiarodzić usiu ŭładu ŭ adnych rukach». Suprać taho, kab addać usiu ŭładu adnamu čałavieku, vystupaje tolki 18%. «Heta taksama tendencyja 2000-ch hadoŭ. Bolšaść raniej ličyła, što nie treba kancentravać uładu ŭ adnych rukach, a ciapier ličyć pa-inšamu», — adznačyŭ Barys Dubin.

Supraćstajać kultu asoby pa idei pavinna palityčnaja apazicyja. Adnak tolki 11% rasijcaŭ ličać, što ŭ Rasii «dakładna» jość apazicyja. Jašče 38% dumaje, što jana «chutčej jość, čym niama».

Sumniajucca ŭ isnavańni apazicyi jašče 30%, a 8% upeŭnienyja, što jaje niama. Heta nie dziŭna, bo 68% rasijcaŭ u chodzie apytańnia ŭpieršyniu pačuli pra hałoŭnuju akcyju apazicyi apošniaha hodu — «Stratehii-31».

Dobra znajomyja z sutnaściu akcyi i viedajuć, što takija akcyi zabaraniajucca ŭładami i razhaniajucca milicyjaj, tolki 3%. Mahčyma, tamu całkam suprać akcyi vystupajuć tolki 4%, a chutčej suprać — 11%. Pry hetym bolš za dźvie traciny ličyć, što apazicyja patrebnaja (23% — «dakładna tak»; 44% — «chutčej tak»).

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?