Temie biełaruska-rasijskich adnosin była pryśviečanaja prahrama «Odnako» na Pieršym kanale, jakaja vyjšła ŭ efir 1 lipienia. Viadučy prahramy — łajalny da Kramla žurnalist Michaił Lavonćjeŭ. Pryvodzim stenahramu prahramy:

«Adnak, dobry viečar!

Značycca, Alaksandr Ryhoravič Łukašenka, jak daśviedčany, možna skazać, zakaranieły kiraŭnik, zahadzia rychtujecca da vybaraŭ. Boh ź im, što hazavy kanflikt skončyŭsia patam. Ničym inšym, ułasna, i nie moh skončycca. Heta zusim nie padstava dla spynieńnia rytoryki z dalokimi nastupstvami. Alaksandr Ryhoravič praciahvaje skardzicca na Rasiju. Hetym razam — amierykancam.

„Maskvie nieabchodny čas, kab pryvyknuć da dumki, što Biełaruś — heta suvierennaja i niezaležnaja dziaržava, — zajaviŭ Łukašenka ŭ intervju CNN. — U advarotnym vypadku Rasija ryzykuje stracić najbližejšaha sajuźnika, i heta budzie niezamiennaja strata“.

Boh śviedka: Maskva jakraz i sprabuje razmaŭlać ź Biełaruśsiu jak ź niezaležnaj i suvierennaj dziaržavaj.

U toj čas jak Łukašenka ŭparta błytaje paniaćci sajuźnika i nachlebnika.
U hetym, ułasna, niama ničoha novaha. Novaje ŭ tym, što Łukašenka, jaki zaŭsiody ličyŭsia žorstkim i aščadnym hulcom, ciapier, padobna, blafuje, nie majučy na rukach uvohule nijakich kart. Heta ŭžo nie hulnia. Heta isteryka.

Tavaryš hrosmajstar, koń tak nie chodzić. Uźnikaje mižvolnaje padazreńnie, što heta, mahčyma, nie hrosmajstar.

«Vy pavinny mieć na ŭvazie: u nas vielmi šmat nadziejnych siabroŭ. Akramia Rasii, Jeŭrapiejskaha Sajuza ŭ nas vydatnyja adnosiny ź Vieniesuełaj, Iranam, paŭnočnaafrykanskimi dziaržavami, krainami Blizkaha Uschodu, u tym liku Izrailem. I navat amierykancy inviestujuć u Biełaruś, — paviedamiŭ Łukašenka ŭ efiry CNN. — I ŭ nas jość jašče adzin vielmi surjozny partnior i vielmi vialiki siabar — Kitajskaja Narodnaja Respublika».

Nie maj sto rubloŭ! Pryjaciela ŭ niaščaści paznaješ.

Nie daj Boh Alaksandru Ryhoraviču paznać u niaščaści svaich kitajskich i izrailskich siabroŭ, a tym bolš amierykanskich inviestaraŭ!
Kali surjozna: stabilnaść biełaruskaj ekanomiki i biełaruskaj palityčnaj madeli zabiaśpiečvałasia datacyjaj. Hetaja rasijskaja — nie kitajskaja i nie iranskaja! — datacyja niaŭchilna źmianšajecca i pahražaje ŭ najbližejšaj budučyni źmienšycca da nula. Zadačaj Łukašenki zaŭsiody było zachavać datacyju. Ale nie canoj choć jakoha abmiežavańnia ŭłasnaj ułady. Bo kamu ž tady datacyja?

«Kali vy dumajecie, što zaŭtra hetyja tak zvanyja rasijskija subsidyi syduć, i my tut ža abryniemsia — dyk ničoha takoha, — zajaviŭ Łukašenka CNN. — My narmalna staim na nahach».

Nie narmalna, i nie staicie. U hetym i štuka. Heta značyć, što nasamreč Łukašenku niama čaho stračvać. Lepš pamierci stojačy, čym pamierci na kaleniach.

Pamiatajecie, jak u krachu kirhizskaha Bakijeva Alaksandr Ryhoravič razhledzieŭ svoj los? Jon zajaviŭ tady, što «narod zrobić najhrubiejšuju pamyłku, kali zdradzić svajmu prezidentu».

Alaksandr ŁUKAŠENKA: «Niachaj mianie asudžajuć, ale zdradžvać ludziam — heta samaje haniebnaje, što moža być u hetym śviecie».

Pytańnie ŭ tym, kaho Alaksandr Ryhoravič ličyć ludźmi, a kaho nie. Pažadana abviaścić uvieś śpis.

Adnak, da spatkańnia!»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?