Fest čakajuć źmieny: bar pieratvorycca ŭ piasčany bierah, namiotavy haradok paŭstanie ŭ inšym miescy, źjavicca kina-scena, a taksama praduhledžany «niefarmalny treci dzień» festu.

 N.R.M. na Basoviščy-2009. Fota Alesia Pileckaha.

N.R.M. na Basoviščy-2009. Fota Alesia Pileckaha.

Da festyvalu «Basovišča-2010» zastałosia čatyry tydni. Arhanizatary narešcie sfarmavali kančatkovuju prahramu, a taksama raspaviali Generation.by, jakija cikavostki čakajuć 21-y fest. Bar pieratvorycca ŭ piaščany bierah, namiotavy haradok paŭstanie ŭ inšym miescy, źjavicca kina-scena, a taksama praduhledžany «niefarmalny treci dzień» festu. Siabry žury zaviaršajuć adbor kankursantaŭ dla finału konkursa «Basovišča-2010».

Konkursnaja častka

Arhanizatary «Basovišča», «Biełaruskaje abjadnańnie studentaŭ» (BAS) u Polščy, trymali prychilnikaŭ festu biez navinaŭ roŭna miesiac. U kancy traŭnia zaviaršyŭsia pryjom zajavak na tradycyjny konkurs festu, u jakim sioleta prymajuć udzieł 20 hurtoŭ ź Biełarusi i Polščy.

Jak paviedamiła siońnia generation.by staršynia BAS Kasia Kuźmič, u składzie žury sioleta try asoby: Boban (hurt Zero-85), reper Kroŭ i muzyčny błohier Viačasłaŭ Radzivonaŭ. Žury pracuje nad vybaram 5-ci hurtoŭ z 20-ci, jakija i prymuć udzieł u finale festyvalu — na scenie 21-ha Basovišča 16—17 lipienia.

«Vybar nia prosty. Ikniemsia da taho, kab muzyčny ŭzrovień konkursu byŭ vysoki», — kamentuje Kasia Kuźmič.

Hałoŭnaja ŭznaharoda «Basovišča-2010» — heta 10 hadzinaŭ zapisu ŭ studyi Rembrandt (Polšča) i 1000 $.

Miesca praviadzieńnia

Paśla jubilejnaha 20-ha Basovišča arhanizatary vyrašylisia na źmieny ŭ tradycyjnaj schiemie raźmiaščeńnia namiotavaha haradka, inšych miescaŭ adpačynku dy kramaŭ.

«U krytaj draŭlanaj placoŭcy planujecca žoŭty piasok, kalarovyja ležaki, palmy dy ananasy. Budzie taki «svabodny horad», dzie možna budzie palažać, papić piva dy pahladzieć/pasłuchać kancerty», — raspaviadaje staršynia BAS.

Namiotavy haradok sioleta paŭstanie ŭ inšym miescy, ale, jak kažuć basaŭcy, u »starym» — tam, dzie jon stvaraŭsia ŭ pačatku 90-ch — u 150 metrach ad sceny. Tam našmat bolšaja prastora i hetak ža dobra čuvać muzyku.

Tam ža planujecca raźmiaścić paviljon-šop, u jakim možna budzie nabyć namiot, spalnik, dyvanok dy inšyja rečy, jakija mohuć spatrebicca dla načovak.

Košt abanementu ŭ namiotavy haradok składzie 20 PLN (kala 6 dalaraŭ) niezaležna ad času prybyvańnia ŭ im. Haradok pačnie pracu z 15 lipienia.

Prahrama Basovišča-2010: na 21-m feście 21 hurt

Tradycyjna prahrama festu składajecca z troch častak: konkurs, volnaja scena i vystupy haściej. Tak budzie i hetym razam. Muzyčnuju častku pieršaha dnia adčynić konkurs.

Volnaja scena projdzie ŭ druhi dzień. U miežach jaje vystupiać hurty: CherryVata (Biełaruś), Open Space (Biełaruś), The Spouds (Varšava), Kuba Rozpruwacz (Polšča, Hajnaŭka).

Vystupy haściej. Pieršy dzień: Zatochka (Biełaruś), Schody (Polšča), Re1ikt (Biełaruś), Addis Abeba (Biełaruś), Rima (Polšča), Lipali (Polšča), unačy prahrama praciahniecca dy-džejami. U druhi dzień scenu całkam akupujuć hurty ź Biełarusi: Termin X, Litvintroll, Troitsa, Gurzuf, :B:N:, Lyapis Trybetskoy. Noč praciahniecca setam ad viadomych polskich dy-džejaŭ Hungry Hungry Models.

Taksama ŭ prahramie značacca fotavystavy, sustrečy z tvorčymi ludźmi, pakaz filmaŭ — dla heta pastaviać admysłovy namiot. Viadučymi festu vystupiać Kroŭ i Aleś Tabolič (hurt Znich).

«Viedajem, što šmat ludziej zastajecca na treci dzień u boryku. Admysłova dla ich padrychtavali niefarmalny «treci dzień» Basovišča. Užo nie na hałoŭnaj scenie, a ŭ budynku pry namiotavym haradku praduhledžanyja nievialikija kancerty, pakazy filmaŭ, teatralnyja pastanoŭki dy inšaje», — raspaviadajuć basaŭcy.

«Basovišča-2010» projdzie 16—17 lipienia ŭ Haradku (Polšča), što niedaloka ad biełaruskaj miažy. Da samaha staroha biełaruskaha štohadovaha rok-festu zastałosia 4 tydni. Praca ŭ samym razhary. Festyval arhanizujecca etničnymi biełarusami ŭ Polščy — polskimi studentami, jakija vyznajuć siabie biełarusami.

Dla biełaruskich naviedvalnikaŭ aproč niepasredna prahramy adno z samych aktualnych pytańniaŭ — dajezd na Basovišča, sam festyval tradycyjna biaspłatny. Tamu najpierš varta zabiaśpiečyć siabie vizaju. Na žal, na siońnia, pa słovach staršyni BAS Kasi Kuźmič, niama dakładnaj infarmacyi pra pradastaŭleńnie biaspłatnych vizaŭ dla biełaruskich hledačoŭ — pieramovy z polskimi kansulatami ŭ Biełarusi praciahvajucca. U toj ža čas basaŭcy damaŭlajucca na biaspłatny prajezd dla hledačoŭ z Kuźnicy Biełastockaj da Haradku, a taksama planujecca puścić ciahnik ź Biełastoku da Haradka.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?