Seks, zdajecca, — jon i ŭ Paŭdniovaafrykanskaj Respublicy seks. Usiudy jon maje adnolkavuju sutnaść i adpaviedna prablemy, źviazanyja ź im, pa ŭsim śviecie musiać być identyčnyja. «Nie i jašče raz nie!», — zapiarečyć hetamu ćvierdžańniu biełaruski seksołah.
Na Nieaficyjnym sajcie seksołahaŭ Minska, placoŭcy dla sustrečy ajčynnych luboščaviedaŭ, na vypadkach z praktyki papularna davodzicca, što ŭ spravie połavych prablemaŭ prysutničaje i čysta biełaruskaja śpiecyfika. Takim paradkam, najbolš dziŭnyja, vybačajcie, aŭtentyčnyja prośby na pryjomie ŭ biełaruskaha seksołaha.
Pieršaja ŭ našym śpisie — žančyna, jakaja pryjšła na pryjom da seksołaha z nahody muža i paprasiła dać tabletak — a ciapier uvaha — DLA IMPATENCYI. Arhumientacyja dosyć pierakanaŭčaja — «kab hety zalotnik nie vałačyŭsia za inšymi». Treba, maŭlaŭ, šanoŭny spadar seksołah, vyratavać i abaranić siamju. Nu, što tut skazać— chiba što ničoha.
Z prośbaj tabletak dla, a nie suprać, impatencyi jość i duža padobny vypadak. Chiba ŭžo hałoŭnym intaresantam u im fihuruje padžyłaja kabieta, maci darosłaha syna. I arhumientacyja krychu inšaja: «Harotnaja niaviestka nie vytrymlivaje synavych dakučańniaŭ». Pytańniu seksołaha, jakaja častata seksualnych kantaktaŭ pamiž jaje synam i niaviestkaj, kłapatlivaja śviakrucha rady nie dała, bo była źlohku nie ŭ kursie. Adkazam seksołaha było ćviordaje «nie», bo całkam vierahodna, što takich kantaktaŭ nie było ŭvohule. I całkam vierahodna, što syn tolki toje i rabiŭ, što seksualna dakučaŭ, nie atrymlivajučy ničoha naŭzamien.
U hetych dvuch vypadkach biełaruskaha seksołaha najbolš uražvaje harotnaść losu biełaruskich mužčyn, jakija navat nie zdahadvajucca, jakija žarści virujuć za ich śpinami i jakija žudasnyja pahrozy łunajuć nad ichnimi hałovami.
Adnak niekatoryja biełaruskija mužyny ździŭlajuć sami. Heta my vyśvietlili z nastupnych prośbaŭ. Na pryjomach u biełaruskaha seksołaha pieryjadyčna prakidvajucca ŭprošvańni vydać balničny z pryčyny połavaj niamohłaści (impatencyi). Toje asabliva cikava, kali viedać, što balničny list — heta kanstatacyja faktu časovaj niepracazdolnaści. Biełaruski seksołah całkam dapuskaje, što taki balničny list maje prava na isnavańnie, ale nie raniej za toj čas, kali ŭ Respublicy Biełaruś lehalizujuć prastytucyju i pornabiznes. I mienavita tady impatencyja zrobicca dastatkovaj pryčynaj dla nieprychodu na pracoŭnaje miesca. A pakul što, ščyra pieraprašajem, kateharyčnaje «nie».
Uznačalvaje naš top-4 najbolš dziŭnych prośbaŭ na pryjomie ŭ biełaruskaha seksołaha prośba vypisać vijahru… jakim čynam by vy dumali? Słušna, pa ilhocie!!! Adpaviedna, za 10 adsotkaŭ ad poŭnaha koštu preparatu abo ŭvohule zadarma. I kryŭdujuć ža pacyjenty, pačuŭšy ad biełaruskaha seksołaha stalovaje «nie». Bolš abhruntavanaja admova? Kali łaska. Hety vydatny srodak nie ŭvachodzić u pieralik žyćciova nieabchodnych preparataŭ (mienavita hetak nazyvajecca toj ilhotny śpis). Chacia, jak dadaje biełarusi seksołah, jak pahladzieć: luboščy padaŭžajuć žyćcio mužčyny, i, adpaviedna, miedykamientoznaje naładžvańnie hetaj funkcyi arhanizmu možna ličyć žyćciova nieabchodnym.
