Pakul pra svaje prezidenckija ambicyi ŭ hołas zajavili tolki mužčyny. Ale ŭ adnoj ź minułych prezidenckich kampanij prymała ŭdzieł i eks-deputatka pałaty pradstaŭnikoŭ Natalla Mašerava. Sacyjołahi tady adznačali, što jaje rejtynh amal imhnienna nabliziŭsia da 30 pracentaŭ. I sprava była nie tolki ŭ proźviščy znakamitaha baćki Natalli Piatroŭny… Ci maje namier Natalla Mašerava znoŭ pajści ŭ prezidenty? Što jana dumaje pra tych, chto ŭžo abviaściŭ pra svoj namier zamianić Alaksandra Łukašenku? I kali jana sama nie pojdzie ŭ prezidenty, to ci budzie niekaha padtrymlivać?

— Natalla Piatroŭna, raskažycie, ci źbirajeciesia vy prymać udzieł u prezidenckich vybarach?

— Nie, nie źbirajusia. Ščyra kažučy, ja navat nie viedaju, chto kankretna ŭžo zajaviŭ ab namiery pajści na vybary. Nie saču za palitykaj i palitykami. A iści samoj… Takoha navat i ŭ dumkach niama.

— A čamu vy tak raptoŭna syšli z palityčnaha niebaschiłu?

— Pryčyn šmat, ale ciapier heta ŭžo nie vielmi cikava. Siońnia zusim inšaja realnaść. Čaho da hetaha viartacca?

— Nakolki ja razumieju, z palityki vy syšli nazaŭsiody?

— U prezidenty dakładna nie pajdu. Ale ž palityka składajecca nie tolki z ułady.

— Mnie padajecca, što vy krychu chitrujecie, kažučy, što ciapier naohuł nie cikaviciesia palitykaj.

— Absalutna ščyra kažu! Pasady — heta nie samaje hałoŭnaje ŭ palitycy. U žyćci našaj krainy ja źviartaju ŭvahu na absalutna inšyja rečy. Naša z vami žyćcio, budučynia — voś što mianie cikavić. A baraćba za pasadu — nie. Darečy, i nikoli nie cikaviła. Nie dziela ž prezidenctva ŭdzielničaješ u palitycy i navat u prezidenty idzieš. (Nu, heta ja pra siabie kažu.)

Cikava atrymlivajecca: mnohija telefanujuć, kamientary niejkija prosiać, a vy — małajčyna, naŭprost zapytalisia, idu ja na vybary ci nie…

— Darečy, kali telefanujuć, moža, prosiać padtrymać niekaha z kandydataŭ?

— Nie. A navošta? Ja tolki škodu naniasu, bo zanadta adyjoznaja fihura. Dyj tym ludziam, jakija da ŭłady rvucca, ja nie patrebna…

Mnie niadaŭna patelefanavali i skazali, što na vybary ŭžo byccam by zajavilisia dziesiać mužčyn. A ja navat tołkam nie viedaju, chto i što. Muž sprabuje niešta raspavieści, a ja hladžu na jaho takimi vačyma, što jon navat nie advažvajecca znoŭ uźnimać hetuju temu. Mnie prosta niecikava heta…

Niachaj hety kacioł kipić. Ja ŭpeŭniena, što ad jaho ničoha nie zaležyć. Mo zaŭtra situacyja i źmienicca, a siońnia…

— Moža, treba, jak kažuć francuzy, pašukać žančynu? Hladziš, i prezidenckaja kampanija prajšła b bolš cikava…

— Nie dumaju. Nie naśpieŭ čas.

I hramadstva naša, jak mnie padajecca, nie hatova dla taho, kab abrać prezidentam žančynu.
My siońnia, tak by mović, na pierachodzie ad adnoj krainy da inšaj. I ŭ nas zmahajucca za ŭładu. A tam, dzie mužčyny bjucca, žančynie prosta nie znachodzicca miesca. I nie tamu, što nie vyłučajuć, što niama hodnych žančyn — prosta niama miesca. A 
pry takoj sistemie žančyna nie moža być zapatrabavana. Jana moža stać prezidentam u stabilnym hramadstvie. Spantanna ŭ Biełarusi žančyna na pasadu prezidenta nie pryjdzie, a inšych varyjantaŭ pakul nie pradbačycca. U žančyny zusim inšaja psichałohija.
Jana bolš stvaraje, čym razburaje. Dla hetaha nieabchodna, kab zorki syšlisia. Ale Biełaruś pakul nie hatova dla taho, kab abrać prezidentam žančynu. Dyj žančyna nie hatova stać tut prezidentam…

— Vychodzić, što ciapier Natalla Mašerava skancentravałasia na samoj sabie, siamji i domie?

— Vy viedajecie, kolki ŭ mianie ŭnukaŭ? Siamiora! Starejšym — 20–21, małodšym — dva hady i 11 miesiacaŭ (syn padaryŭ mnie ŭnukaŭ-bliźniataŭ). Tamu sumavać niama kali.

Majo žyćcio składajecca z peŭnych etapaŭ, i jany vielmi vyrazna padzieleny. Ja navat kažu, što pražyła nie adno žyćcio, a adrazu niekalki, pryčym kožnaje — vielmi cikavaje. I kožny kavałak žyćcia dyktuje svaje pryjarytety. Albo ja sama ich adšukvaju. I zaraz ja vam vielmi ščyra kažu: nie chaču ŭ palityku, nie paviornuta ŭ toj bok. Inšyja prablemy vyrašaju…

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?