Pazicyja Biełarusi pa pytańni padpisańnia Mytnaha kodeksa Mytnaha sajuza nie źmianiłasia. Pra heta zajaviŭ 17 červienia na bryfinhu ŭ Minsku pres‑sakratar biełaruskaha MZS Andrej Savinych.

«My praciahvajem pracavać na ŭsich uzroŭniach i naceleny na pošuk uzajemaprymalnych rašeńniaŭ», — padkreśliŭ Savinych.

Jon paviedamiŭ, što 18 červienia ŭ Sankt‑Pieciarburhu projdzie čarhovaje pasiadžeńnie Kamisii Mytnaha sajuza (MS) Biełarusi, Kazachstana i Rasii. Biełaruskuju delehacyju na pieramovach uznačalić vice‑premjer Andrej Kabiakoŭ.

«Płanujecca abmierkavańnie šyrokaha koła pytańniaŭ u śfiery mytnaha, taryfnaha, nietaryfnaha i techničnaha rehulavańnia, prymianieńnia sanitarnych, vieterynarnych i fitasanitarnych mier, a taksama prymianieńnia śpiecyjalnych achoŭnych, antydempinhavych i kampiensacyjnych mier na adzinaj mytnaj terytoryi», — skazaŭ pres‑sakratar.

Kamisija MS, pavodle jaho słoŭ, taksama praanalizuje farmiravańnie dahavorna‑pravavoj bazy, jakaja rehuluje paradak pieramiaščeńnia fizičnymi asobami tavaraŭ dla ŭłasnaha karystańnia. Na pasiadžeńni buduć abmiarkoŭvacca vyniki pracy ŭ testavym režymie sistemy pa zaličeńni i raźmierkavańni ŭvaznych mytnych pošlin. «Asablivaja ŭvaha budzie nadadziena pierachodnamu pieryjadu pry źbirańni ŭskosnych padatkaŭ pry eksparcie i imparcie tavaraŭ», — padkreśliŭ Savinych.

Na pasiadžeńni taksama budzie pradstaŭlena infarmacyja ab vykanańni Płana dziejańniaŭ pa farmiravańni Adzinaj ekanamičnaj prastory i paradku dnia čarhovaha pasiadžeńnia vyšejšaha orhana MS na ŭzroŭni kiraŭnikoŭ dziaržaŭ.

Ab stvareńni Mytnaha sajuza Biełarusi, Kazachstana i Rasii było abjaŭlena ŭ listapadzie 2009 hoda na samicie ŭ Minsku. 1 lipienia pavinien nabyć moc adziny Mytny kodeks MS.

Miž tym, 21 maja na sustrečy z Sankt‑Pieciarburhu kiraŭniki ŭradaŭ troch krain nie zmahli ŭrehulavać roznahałośsi pa pryncypach farmiravańnia MS.

U vyniku 28 maja premjer‑ministry Rasii i Kazachstana damovilisia ab uviadzieńni Mytnaha kodeksa MS na dvuchbakovaj asnovie. Biełaruski premjer na sustreču nie prybyŭ.

Minsk źviazvaje svoj udzieł u Mytnym sajuzie z admienaj abmiežavańniaŭ na pastaŭku rasijskaj nafty i naftapraduktaŭ u Biełaruś. Pry hetym biełaruski bok adznačaje, što ŭ dačynieńni da Kazachstana takija miery nie ŭvodzilisia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?