Sud Astravieckaha rajona (Hrodzienskaja vobłaść) 16 červienia spyniŭ sudavodstva pa isku hramadskaha abjadnańnia »Ekadom», jakoje patrabuje abaviazać Dyrekcyju budaŭnictva atamnaj stancyi padać dakumientacyju pa acency ŭździejańnia na navakolnaje asiarodździe (AUNA) budučaj biełaruskaj AES.

Pra heta paviedamiŭ juryst »Ekadoma» Siarhiej Mahonaŭ.

Arhanizacyja maje namier damahčysia padavańnia ekałahičnaj hramadskaści dakumientacyi pa AUNA budučaj biełaruskaj AES u elektronnym abo drukavanym vyhladzie. Hetyja dakumienty zapytvalisia ź listapada 2009 hoda, adnak supracoŭniki Dyrekcyi budaŭnictva AES admovilisia ich dać u zapatrabavanaj formie. 17 lutaha jany prapanavali ekołaham pryjści ŭ ofis dla aznajamleńnia ź infarmacyjaj, što ich cikavić. Pry hetym dakumienty byli dastupnyja tolki ŭ pracoŭny čas, vynosić ich zabaraniałasia. Jak ličyć Mahonaŭ, admova padać dakumientacyju pa AUNA budučaj AES u zapytanym vyhladzie supraćzakonnaja, parušany pałažeńni Orchuskaj kanviencyi i zakona ab achovie navakolnaha asiarodździa Biełarusi.

Jak paviedamiŭ juryst «Ekadoma», padčas ciapierašniaha pasiadžeńnia padstavaj dla spynieńnia spravy sud nazvaŭ jaje niepadviedamnaść sudu ahulnaj jurysdykcyi i parekamiendavaŭ źviarnucca ŭ haspadarčy sud Hrodzienskaj vobłaści. Mahonaŭ nahadaŭ, što ŭ sakaviku HA »Ekadom» užo było admoŭlena ŭ raspačynańni hramadzianskaj spravy, bo, zhodna z pastanovaj suda, sprečka ŭźnikła pamiž jurydyčnymi asobami i ŭ suviazi z haspadarčaj dziejnaściu DU »Dyrekcyja budaŭnictva atamnaj elektrastancyi». Kab sprava była pryznana hramadzianskaj, pry padačy ciapierašniaha isku poruč z »Ekadomam» istcom vystupiŭ Siarhiej Mahonaŭ jak fizičnaja asoba.

Jon miarkuje, što sprava znoŭ spyniena z‑za taho, što sud nie choča pryznavać spraviadlivaść dovadaŭ HA »Ekadom». Bo rašeńnie na jaho karyść budzie mieć rezanans jak pieršy precedent u Biełarusi, što fiksuje parušeńni čynoŭnikami Orchuskaj kanviencyi.

Juryst ličyć, što pry pryniaćci rašeńnia ab spynieńni spravy dapuščany pracesualnyja parušeńni. «Kali ŭžo hramadzianskaja sprava raspačata, to jaje spynić nielha z pryčyny niepadviedamnaści. Treba było raniej abo admović u pryniaćci isku, abo, kali ŭžo pryniali, razhladać da kanca», — skazaŭ jon.

Na praciahu 10 dzion HA «Ekadom» i Siarhiej Mahonaŭ majuć namier padać pryvatnuju skarhu ŭ Hrodzienski abłasny sud na pastanovu suda Astravieckaha rajona i damahacca razhladu spravy ŭ sudzie ahulnaj jurysdykcyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?