Z hoda ŭ hod kolkaść biełarusaŭ, jakija chočuć pajechać na adpačynak u Krym, nie źmianšajecca. A tamu miascovyja žychary zaŭsiody buduć finansava zabiaśpiečanyja, a košt nieruchomaści i ziamli niepadalok ad mora budzie tolki pavialičvacca.

I choć uzrovień servisu tut zastajecca zvykła nievysokim, płyń klijentaŭ nie vyčerpvajecca. Raśpieščanyja zamiežnym servisam hości, adzin raz pryjechaŭšy siudy, redka viartajucca, ale prytok śviežych naiŭnych turystaŭ zaŭsiody byŭ i budzie. Turystyčnych pastak pry vandravańni pa Krymie znojdziecca niamała, ale ich ci niekatorych ź ich možna paźbiehnuć, kali maješ pra ich dakładnuju infarmacyju. Takim čynam:

Nie spadziavajciesia zekanomić

Tak, viadoma, u Krym (i na rasijskaje ŭźbiarežža Čornaha mora) jeduć pa vydatnuju pryrodu i miakki klimat. Ale padspudnaja dumka pra ekanomiju, chaj i dziakujučy admovie ad kamfortu, usio ž pryjemna hreje dušu.

Nasamreč ža adpačynak tut napeŭna moža abyścisia daražej, čym anałahičny ŭ Bałharyi.

Znajści prystojnaje miesca (hatel, sanatoryj, kamfartabielnaja kvatera) dla pražyvańnia ŭ lipieni‑žniŭni mienš čym za 20—40 dalaraŭ u sutki, naŭrad ci atrymajecca, a ŭžo ŭ žniŭni, u samy siezon, ceńnik i zusim uźlataje da niabačanych vyšyniaŭ. Praŭda, pakoi‑skrynački ŭ pryvatnym siektary abyducca vam u davoli nievialikuju sumu — ad 5—7 dalaraŭ na čałavieka, ale tut buduć i ŭsie adpaviednyja «pieravahi»: čerhi ŭ duš i na plitu, prybiralnia na vulicy, pieraboi z vadoj, natoŭp narodu ŭ adnym dvary i h.d. Ale ŭ rešcie rešt kožny vybiraje sam, jak jamu spadručniej.

Nie sprabujcie kupić kvitki ŭ apošni momant

Kvitki na niedarahija i adnosna kamfortnyja ciahniki zvyčajna byvajuć raspradadzienyja jašče za miesiac‑paŭtara da startu vandravańnia. Zastajucca zvyčajna tolki samyja darahija, «firmovyja», sastavy, košt na kvitki ŭ jakich užo nabližajecca da koštu avijapieralotu.

Jak ni dziŭna, palacieć u Krym časta praściej i tańniej,

dy i kupić kvitki ŭ apošni momant zastajecca bolš šancaŭ.

Nie kuplajcie pa darozie čornuju i čyrvonuju «ikru»

Čym bližej ciahnik padychodzić da Kryma, tym čaściej na stancyjach možna ŭbačyć ludziej sa słoikami čornaj i čyrvonaj «ikry» pa davoli humannych cenach. Pradaŭcy, nie saromiejučysia, raspaviadajuć, što zdabyli ikru brakańjerskim sposabam na krymskim uźbiarežžy.

Kuplać jaje kateharyčna nie treba, pakolki ikroj jana ŭ pryncypie nie źjaŭlajecca.

Nasamreč vyrablajuć hety pradukt z reštkaŭ ryby, aleju, soli i farbavalnikaŭ, sposabam, prydumanym jašče ŭ savieckija časy,

kali niejki vynachodnik navat pradavaŭ śpiecyjalnyja bytavyja mašynki dla chatniaj vytvorčaści takoj «ikry».

Nie mianiajcie hrošy ŭ ciahniku i na vakzale

Pra toje, što tut kurs moža być vielmi niavyhadny, viedajuć praktyčna ŭsio. Ale pry abmienie hrošaj u ciahnikach asnoŭnaja prablema składvajecca nie ŭ im. Navat kali čałaviek, jaki padyšoŭ, prapanuje vam dobry abmienny kurs, chutčej za ŭsio,

jon abo padsunie vam falšyvyja kupiury, abo abličyć i niedadaść hrošaj.

U pryncypie, u pryvatnym siektary, u taksi i na rynku možna zapłacić i dalarami, ale majcie na ŭvazie, što kurs budzie zusim nie na vašu karyść.

Nie zhadžajciesia na ceny taksistaŭ

Łavić taksi prama na vakzale — nie samy tanny varyjant. Ale kali ŭžo čamadan nastolki ciažki, što adyści ź im na paru kvartałaŭ — niepasilnaja zadača, źbivajcie pieršy prapanavany vam košt. Jak i ŭsiudy ŭ śviecie, taksisty, karystajučysia niedaśviedčanaściu pryjezdžych pra miascovyja realii, zadzirajuć jaho da niabiosaŭ.

Nie daviarajcie svaje čamadany padletkam

Viadoma ž, ciahnuć ciažki čamadan pa nie zanadta prystasavanych dla hetaha prystupkach vakzała nie vielmi pryjemna. A ŭsiudyisnych padletkaŭ, hatovych za paru hryŭniaŭ dapamahčy ź ciažkim bahažom, vakoł ujecca zvyšdastatkova. Ale, daviarajučy im svoj čamadan, budźcie hatovyja, u vypadku nieabchodnaści, chutka biehčy, sprabujučy dahnać ułasnuju majomaść, jakaja addalajecca.

Nie raźličvajcie, što mora budzie ciopłym

Kali pahladzieć na reljef dna Čornaha mora, to možna vyśvietlić, što jaho hłybinia ŭ rajonie rasijskaha i ŭkrainskaha ŭźbiarežža ŭ niekalki razoŭ bolšaja, čym, naprykład, u Bałharyi.

A tamu vada prahravajecca tut pavolniej i raźličvać mienavita ŭ červieni na kamfortnaje kupańnie nie davodzicca.

Akramia taho, časam ciačeńnie vynosić da bieraha zusim užo ledzianyja masy vady z hłybini mora, i tempieratura vady stanovicca takoj, što pačynaje zvodzić nohi. Tamu, kali vy pryjšli na plaž u haračy soniečny dzień, nie varta dzivicca tamu, što ŭsie lažać na piasočku, a ŭ chvalach nichto nie ploskajecca.

Nie dumajcie, što atrymajecca nazapasicca vitaminami

Zdavałasia b, čarešnia i kłubnicy pavinny kaštavać tańniej tam, dzie jany rastuć, pakolki vydatki na dastaŭku ŭ hetym vypadku minimalnyja. Faktyčna ž, ceńnik na sadavinu ŭ Minsku i na lubym kirmašy Kryma praktyčna identyčny. Mabyć, dastaŭka da bližejšaha rynku i da Minska abychodzicca pradaŭcam prykładna adnolkava. Praŭda, kali prajścisia pa miascovych dvarach i pašukać abjavy kštałtu «pradaju kłubnicu, čarešniu», dyk, mahčyma, atrymajecca kupić jahady krychu tańniej. I hałoŭnaje, usio budzie śviežaje i vielmi smačnaje.

Nie ješcie ŭ nieznajomych kaviarniach

Zachodzić u pieršuju kaviarniu, jakaja trapiłasia na šlachu, i zakazvać tam usio, što dušy zaŭhodna, vidavočna nie varta. Lepš spačatku pahavaryć z bolš daśviedčanymi tavaryšami i ŭdakładnić, nakolki častyja va ŭstanovie vypadki atručvańnia. Na žal, pieraboi z vadoj na ŭźbiarežžy nie spryjajuć idealnym sanitarnym umovam.

Kali ž jeści sapraŭdy vielmi chočacca, pasprabujcie vybirać tyja stravy, jakija padviarhajucca termičnaj apracoŭcy i nie źjaŭlajucca chutkapsavalnymi. I jašče, pažadana addać pieravahu adnarazovamu posudu.

Nie kuplajcie miascovaje vino z ruk

Papularnaść i tannaść miascovaha ałkaholu, viadoma ž, dajuć šmat spakusaŭ niačystym na ruku pradaŭcam, achvotnikam zarabić na advykłych ad tannaha vina suajčyńnikach dy i lubych inšych turystach. Adnak Krymu daloka da Jeŭropy, dzie možna lohka kupić butelku prystojnaha vina za 1,5—2 jeŭra. Kuplajučy na čarnamorskim uźbiarežžy raźlivanaje i navat butlavanaje vino, varta być aściarožnymi, pakolki šanc narvacca na ałkaholny napoj, zafarbavany cukram i aramatyzatarami, davoli vialiki. Praviły tut usie tyja ž: idzicie da pravieranych pradaŭcoŭ i ŭvažliva prysłuchoŭvajciesia da svajho arhanizma.

***

I tym nie mienš, niahledziačy na ŭsie «padvodnyja kamiani», mnohija z hoda ŭ hod vybirajuć dla adpačynku mienavita Krym, tamu što znajści inšaje miesca z takoj pyšnaj pryrodaj davoli składana. Dy i vykrutlivaść miascovych žycharoŭ časam byvaje karysnaja, choć by tamu, što ź imi zaŭsiody možna damovicca. I pra prachod «sa źnižkaj» na mocna płatny plaž, i pra kupańnie na im u niezapłanavany čas. Kali ŭ Jeŭropie napisana «nielha» i sposabaŭ abyści zabaronu niama, to ŭ Krymie «nielha» za nievialikija hrošy, a to i za prosta dobryja adnosiny, lohka pieratvarajecca ŭ «možna».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?