U bližejšyja vychodnyja ŭ Polščy adbudziecca pieršy tur prezydenckich vybaraŭ, u jakich hałoŭnyja kandydaty na pieramohu heta vykanaŭca abaviazkaŭ prezydenta, śpikier Sejmu Branisłaŭ Kamaroŭski dy lider apazycyjnaj partyi «Prava i spraviadlivaść», brat zahinułaha prezydenta Lecha Kačynskaha — Jarasłaŭ Kačynski.

48% — na takuju kolkaść hałasoŭ vybarcaŭ moža raźličvać Branisłaŭ Kamaroŭski pavodle vynikaŭ apošnich apytańniaŭ. Takim čynam, kab pieramahčy ŭ pieršym tury, śpikieru Sejmu nie chapaje zusim niašmat. Kamaroŭski, zrešty jak i inšyja lidery kampanii, sustrakajecca z vybarcami pa ŭsioj krainie:

«Ja razam z vami, kab razam dumać pra Polšču, što treba zrabić, kab našaja kraina išła prostaj darohaj da pośpiechu»

Učora Kamaroŭskaha padtrymaŭ papularny palityk z Padlašša, były premjer i ministar zamiežnych spraŭ va ŭradach postkamunistaŭ Uładzimiež Cimaševič:

«Šmat chto čakaŭ, što i ja budu balatavacca, i ja za heta ŭdziačny. Źviartajusia da ŭsich i asabliva da maich prychilnikaŭ — u bližejšuju niadzielu ja addam svoj hołas za spadara Branisłava Kamaroŭskaha»

Padtrymka Cimaševičam Kamaroŭskaha — heta ŭdar pa kandydacie ad levych siłaŭ Hžehažy Napiaralskim, jaki na hety momant u pieradvybarčych rejtynhach zajmaje treciaje miejsca z padtrymkaj prykładna kožnaha dziasiataha vybarcy.

Miž tym hałoŭny kankurent Branisłava Kamaroŭskaha Jarasłaŭ Kačynski ciaham sioletniaj, pieradusim karotkaj kampanii, jakaja adbyvajecca ŭ cieniu smalenskaj trahiedyi, pavoli, ale amal uvieś čas nabiraje papularnaść — ciapier za jaho hatovyja hałasavać 34% palakaŭ: «Ja zaklikaju da taho, kab heta była surjoznaja vybarčaja kampanija, kab peryjad polska‑polskaj vajny, jaki ciahniecca ŭžo niekalki hadoŭ, u tym liku heta tyčycca i nieprymalnaj leksyki, jakuju palityki vykarystoŭvajuć u sprečkach, skončyŭsia».

Varta adznačyć, što i Branisłaŭ Kamaroŭski i Jarasłaŭ Kačynski — heta palityki, jakija nieabyjakavyja da biełaruskaj spravy. Prykładam, za časoŭ premjerstva Kačynskaha byŭ stvorany spadarožnikavy telekanał Biełsat.

Akramia Kamaroŭskaha, Kačynskaha i Napiaralskaha na najvyšejšuju pasadu ŭ dziaržavie balatujucca jašče siamiora kandydataŭ.

Siarod ich były premjer, a ciapierašni vice‑premjer va ŭradzie Tuska Valdemar Paŭlak, były vice‑premjer kabinetu Jarasłava Kačynskaha Andžej Lepier, były ministar zamiežnych spraŭ Andžej Alachoŭski, adnak ich padtrymlivajuć 1‑2% vybarcaŭ.

Valdemar Paŭlak, adnak, nie hublaje aptymizmu: «Užo katory raz sprabuju znajści žurnalista, kab paspračacca: kali moj vynik budzie nižejšy, čym vyniki apytańniaŭ — ja addaju svoj zarobak na karyść achviaraŭ pavodki, ale kali vyšejšy — to vy hetak zrobicie», — kaža Paŭlak.

Achvotnych siarod žurnalistaŭ, adnak, pakul nie znajšłosia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?