Z 1 lipienia 2010 hoda Fiederalnaja słužba pa nahladu ŭ śfiery abarony pravoŭ spažyŭcoŭ i dabrabytu čałavieka budzie pracavać va ŭmovach dziejańnia Mytnaha sajuza. Adpaviedny zahad padpisaŭ 15 červienia kiraŭnik Rasspažyŭnahladu Hienadź Aniščanka, paviedamlaje aficyjny sajt viedamstva.

Zhodna z zahadam sanitarna‑karancinny kantrol za padkantrolnymi tavarami va ŭmovach dziejańnia Mytnaha sajuza z 1 lipienia 2010 hoda budzie ažyćciaŭlacca siłami śpiecyjalistaŭ sanitarna‑karancinnych punktaŭ u punktach propusku na źniešniaj miažy Mytnaha sajuza.

Na asobnyja vidy pradukcyi ŭ adpaviednaści ź Pieralikam tavaraŭ, jakija padlahajuć dziaržaŭnaj rehistracyi, zaćvierdžanym rašeńniem Kamisii Mytnaha sajuza, z 1 lipienia buduć afarmlacca paśviedčańni ab dziaržaŭnaj rehistracyi. Inšyja vidy tavaraŭ padlahajuć siertyfikacyi i dekłaravańniu. Takija tavary pieraličanyja ŭ Adzinym pieraliku pradukcyi, jaki padlahaje abaviazkovaj acency (paćvierdžańniu) adpaviednaści ŭ ramkach Mytnaha sajuza.

Pradukcyja, jakaja nie ŭklučana ŭ Adziny pieralik, padlahaje abaviazkovaj acency adpaviednaści zhodna z zakanadaŭstvam dziaržaŭ 1 členaŭ Mytnaha sajuza, adznačajecca ŭ dakumiencie.

11 červienia na pres‑kanfierencyi ŭ Minsku pasoł Rasii ŭ Biełarusi Alaksandr Surykaŭ zajaviŭ: kali Minsk nie padpiša dakumienty ab farmiravańni MS, to «mytnaja miaža budzie farmiravacca pa terytoryi Rasii i Kazachstana z usimi vynikajučymi nastupstvami». «Jakija składanaści ŭźniknuć pry sprobie jaje [miažu] pierajechać, usim zrazumieła — heta vieterynarnyja, sanitarnyja, mytnyja i inšyja pytańni», — dadaŭ dypłamat.

Pavodle słoŭ Surykava, u ramkach biełaruska‑rasijskaj Sajuznaj dziaržavy dziejničajuć mytnyja damoŭlenaści. Kali ž Biełaruś nie padpiša dakumienty ab farmiravańni Mytnaha sajuza «trojki», pryjarytet budzie addavacca mytnym pahadnieńniam, padpisanym Rasijaj i Kazachstanam u dvuchbakovym paradku, zajaviŭ pasoł RF.

Nahadajem, ab farmiravańni Mytnaha sajuza (MS) Biełarusi, Kazachstana i Rasii było abvieščana 27 listapada 2009 na samicie ŭ Minsku.

1 lipienia 2010 hoda pavinien nabyć moc adziny Mytny kodeks MS, adnak 21 maja ŭ Sankt‑Pieciarburhu kiraŭniki ŭradaŭ Rasii, Biełarusi i Kazachstana nie zmahli ŭrehulavać sprečki ab nabyćci mocy Mytnaha kodeksa.

28 maja ŭ Sankt‑Pieciarburhu premjer‑ministry Rasii i Kazachstana damovilisia ab uviadzieńni Mytnaha kodeksa MS na dvuchbakovaj asnovie, pakolki biełaruski premjer na sustreču nie prybyŭ. Tym nie mienš Mytny kodeks adkryty dla padpisańnia Biełaruśsiu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?