Biełaruska-rasijskija kanflikty źmianiajuć pohlady rasijskich internaŭtaŭ na dačynieńni ź Biełaruśsiu.

Artykuł «Braterski ŭltymatum», nadrukavany na Hazieta.ru, vyklikaŭ žyvoje abmierkavańnie na forumie. Niekatoryja vykazvańni čytačoŭ hetaha papularnaha internet-vydańnia nakont biełaruska-rasijskich dačynieńniaŭ zasłuhoŭvajuć asobnaha razhladu, bo ŭ peŭnaj stupieni demanstrujuć pastupovyja źmieny ŭ pohladach rasijskich čytačoŭ.

Častka aŭdytoryi Haziety.ru spačuvaje biełaruskamu boku i aburajecca pavodzinam Kramla.

«Pastavili na ličylnik i dali piać dzion. Tak robiać sapraŭdnyja bratki»,
— piša čytač pad nikam 123poehali. Karystalnik trynext25 supakojvaje, niby namiakajučy, što heta nie pieršy i nie apošni kanflikt, dy nahadvajučy pra nadziejny recept Łukašenki pa załahodžvańni braterskich kryŭdaŭ:
«Hetaje kitajskaje papiaredžańnie roŭnaje braterskamu ŭltymatumu. Ale kali baćka ŭ čarhovy raz prykładziecca miakkimi vusnami da zasochłych strupoŭ impierskaha kompleksu — usio samo saboj rassmokčacca».

Naviednik kasatschok miarkuje, što aficyjny Minsk musić płacić za vuhlevadarody palityčnymi rašeńniami. Jon piša, što

«ŭsio b uładziłasia, kab baćka pryznaŭ Abchaziju z Paŭdniovaj Asiecijaj, Nahorny Karabach i Prydniastroŭje».

Usio čaściej čujucca hałasy pra nieabchodnaść pierachodu ŭ adnosinach pamiž krainami na vyklučna rynkavyja rejki. Pry hetym biełarusaŭ pieraścierahajuć, što biez refarmavańnia ekanomiki Biełaruś doŭha nie praciahnie biez rasijskaha plača. Tak, čytač Haziety.ru sky-rotor upeŭnieny, što

«kab vyklučyć takija sprečki, nieabchodna ŭsie adnosiny ź Biełaruśsiu pieravodzić na vyklučna rynkavyja ŭmovy. Rasii nie treba nijakich ilhot ad hetaj krainy, ale i my nie pavinny ich subsidyjavać ni ŭ jakoj formie. Bolš čym upeŭnieny, što biełaruskaja ekanomika ŭ doŭhaterminovym płanie budzie znachodzicca na miažy vyžyvańnia biez rasijskaha subsidyjavańnia, a to i piarojdzie hetuju miažu, kali nie refarmujecca. Bo ŭ joj šmat štučnaha, administracyjnaha, a nie rynkavaha, i takaja kanstrukcyja zaŭsiody nietryvałaja».

Jość i praciŭniki ŭ aŭtaraŭ padobnych mierkavańniaŭ, jakija, zrešty, bačać Biełaruś vyklučna jak bufiernuju zonu pamiž Rasijaj i drapiežnym Zachadam. «A jak nakont rasijskich vajskovych abjektaŭ u Biełarusi, u pryvatnaści sistem SPA?» — pytaje fal-con. — «Jany ŭžo taksama nie patrebnyja? U takim vypadku, kudy vojski vyvodzić budziem — znoŭ u hoły step, jak u 90-ja? I potym — plavać, što Maskva faktyčna zastajecca biez prykryćcia na dalokich rubiažach?» Čytač nahadvaje prykład Druhoj suśvietnaj vajny, kali Hitler nadzvyčaj chutka padabraŭsia da Maskvy i Leninhrada. Kab nie dapuścić padobnaha ciapier, upeŭnieny jon,

«patrebien bufier na Zachadzie, dzie buduć u vypadku čaho razhortvacca bajavyja dziejańni i kudy buduć padać rakiety».
I zadajecca pytańniem, ci kaštuje heta 200 młn?
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?