Kiraŭnik Administracyi Prezidenta Biełarusi Uładzimir Makiej zaklikaŭ ŚMI ŭstanavić maralnyja abmiežavalniki. Pra heta jon zajaviŭ u piatnicu na plenarnym pasiadžeńni V Biełaruskaha mižnarodnaha miedyjaforumu «Partniorstva ŭ imia budučyni».

Na dumku kiraŭnika Administracyi, apošnim časam ŚMI časta sadziejničajuć razbureńniu maralnych asnoŭ hramadstva. «Toje, što zdavałasia niepachisnym, siońnia źniščajecca, što myśliłasia jak śviatynia, źnievažajecca, tajnaje, patajemnaje padymajecca na śmiech», — skazaŭ Uładzimir Makiej, padkreśliŭšy, što heta niedapuščalna. Kali ŚMI nie mohuć adnavić bałans u hramadstvie i prytrymlivacca tradycyjnych maralnych kaštoŭnaściej, to jany, prynamsi, nie pavinny ich hubić i taptać.

Uładzimir Makiej sa škadavańniem adznačyŭ, što mnohija ŚMI nie dajuć maralnaj apory čałavieku, jany prasiaknuty ducham usieahulnaha admaŭleńnia, skiepsisu i złoby.

Heta pryviało ŭžo da taho, što, jak śviedčać sacapytańni, u mnohich krainach źnižajecca davier da ŚMI. Niemałuju rolu ŭ hetym adyhryvaje i toje, što mnohija žurnalisty prytrymlivajucca palityki dvajnych standartaŭ. Mienavita tak možna traktavać sposab padačy infarmacyi ab niekatorych padziejach. Naprykład, publičnaje pakarańnie śmierciu prezidenta Iraka padnosiłasia ŭ šerahu ŚMI jak akt demakratyi, baraćby z teraryzmam, choć jadziernaja zbroja (a heta była hałoŭnaja pryčyna raźviazvańnia vajny ŭ Iraku) tak i nie była znojdziena. U toj ža čas krainy, dzie jość vyklučnyja vypadki prymianieńnia śmiarotnaha pakarańnia da mańjakaŭ i zabojcaŭ, abviaščajucca haniebnymi i druharadnymi. «Dachodzić da taho, što navat asoby, asudžanyja za ekanamičnyja złačynstvy, abviaščajucca zmaharami za svabodu i palityčnymi źniavolenymi. Heta datyčycca i Biełarusi», — adznačyŭ Uładzimir Makiej.

Kiraŭnik Administracyi asabliva źviarnuŭ uvahu ŭdzielnikaŭ miedyjaforumu na isnavańnie roznych traktovak svabody słova.

Dla adnych — heta mahčymaść havaryć toje, što jany dumajuć. Dla inšych — mahčymaść biessaromna chłusić, uzvodzić paklop, zvodzić asabistyja rachunki i zarablać hrošy na plotkach i pravakacyjach. Charakterna, što kožny praduhledžvaje svabodu słova tolki dla siabie. Uładzimir Makiej pierakanany: siońnia z asablivaj vastrynioj staić pytańnie ab ekałohii infarmacyjnaj prastory. «Svaboda pavinna być nie «ad», a «dla», — ličyć jon.

Hłyboka pamyłkovym, na jaho dumku, źjaŭlajecca mierkavańnie, što ŚMI — heta nibyta prablema numar 1 dla ŭłady. Tolki słabaja ŭłada baicca presy. Dla mocnaj ułady bojkaja presa, žyvyja ŚMI i nieabyjakavyja žurnalisty — heta dapamoha, krynica viedaŭ aktualnych prablem hramadstva, prablem ludziej. Siońnia svabodzie słova nie stolki pieraškadžajuć ułada i dziaržaparat, ale ŭ bolšaj stupieni joj pahražajuć hrošy i praźmiernaść infarmacyi, padkreśliŭ Uładzimir Makiej.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?