Kachajmasia! «Ceks u vialikim horadzie». Źleva-naprava: Miranda, Samanta, Šarłota, Kery
«Seks u vialikim horadzie», «Siabry»/Friends, «Sajnfełd» — oto byli sieryjały! Piša Liza Kavalčyk.

«Ceks u vialikim horadzie — 2», jaki vyjšaŭ ciapier na biełaruskija ekrany, rasčaroŭvaje, bo adzinaje, što chavajecca za niemačnym scenarom — heta śpiekulacyi na byłoj słavie i nieprychavanaja rekłama turystyčnych i handlovych brendaŭ. Hieraini, čatyry bieskampramisnyja ŭ pytańniach seksu ńju-jurkaŭki, zhubili pa darozie svaju dziorzkaść i vyklik hramadstvu dy zrabilisia... jak usie.

Ale vychad sikvełu — samy čas papryhadvać pra šykoŭnaje minułaje: sieryjały kanca 90-ch i pačatku 2000-ch, što zrabili revalucyju na telebačańni i ŭ hałovach ludziej: «Seks u vialikim horadzie», «Siabry»/Friends, «Sajnfełd».

U siaredzinie 90-ch pryśpieŭ čas dla novych sieryjałaŭ. Rejtynhi mylnych opier imkliva padali, ludziam nadakučyła bačyć biaskoncyja siamiejnyja razborki pazašlubnych dziaciej ad piataj žonki i rastańni-sychodžańni Iden i Kruza. Na popyt hodna adkazała amierykanskaja telekampanija NVS i kinakampanija «Braty Ŭornery» – vypuścili niekalki novych sieryjałaŭ. Ichnija hieroi, pierasielenyja z šykoŭnych viłaŭ u zvyčajnyja haradskija kvatery, mienš za ŭsio dumali pra siamiejnyja poviazi, i bolš — pra prablemy ŭładkavańnia svajoj ciapierščyny, nie zabyvajučy pry hetym na zaniadbanuju ŭ 80-ch samaironiju. Čym sieryjały kanca 90-ch i pačatku 2000-ch adroźnivajucca ad mylnych opier 80-ch? Pa-prostu kažučy, čym «Seks u vialikim horadzie» adroźnivajecca ad «Santa Barbary»?


Tolki «Siabry». Źleva naprava: Čendler, Rejčieł, Ros, Monika, Džoŭi, Fibi
1. Kachańnie — ništo, siabroŭstva — usio.
Kachanki ŭ Kery, Samanty, Mirandy, Šarłoty źjaŭlajucca i sychodziać, a niazmušanaja hutarka, «jak heta było», vakoł stolika ŭ ńju-jorkskaj kaviarni zastajecca. Raptam na pieršaje miesca ŭ sieryjałach 2000-ch vychodzić siabroŭstva, i ciapier ichnyja hieroi bolš za ŭsio na śviecie bajacca pakryŭdzić mienavita svaich tavaryšoŭ. I, jak pakazvaje prykład «Siabroŭ», siabry majuć patencyjał zrabicca kachankami (Rejčeł i Ros) i navat supružnikami, jak toje zdaryłasia z Čendleram i Monikaj pry kancy sieryjału. Darečy, i samyja papularnyja sieryjały apošniaha hoda 2000-ch: «D-r Chauz» i «Teoryja vialikaha vybuchu» pajšli pa śladach mienavita prasiaknutych ducham tavarystva papiarednikaŭ.

I, viadoma, zacyklenaść na čatyroch hierojach: I ŭ «Sajnfiełdzie», i ŭ «Seks-harodku» pradukujuć mienavita hetuju kolkaść hałoŭnych dziejučych asobaŭ, a dakładniej, hałoŭnych typažoŭ. U «SuVH» heta: mrojnaja zanuda, iraničnaja razumnica, hullivaja biazładnica i cikaŭnaja daścipnica. Nie, pačakajcie: u «Siabrach» hałoŭnych hierojaŭ usio ž šeść, ale pryncyp vy zrazumieli — staŭka na abmiežavanuju kolkaść jarkich asobaŭ, a nie na niespadziavanyja vykryćci i pryznańni.

2. Tut i ciapier.
Paśla 10 hadoŭ niesupynnaj «Santy-Barbary» ŭsim stała raptam naplavać na radavod. Kaho ciapier chvaluje, čyjoj dačkoj i ŭnučkaj źjaŭlajecca hałoŭnaja hierainia Kery Brendšo i kolkaść jaho kachankaŭ (adkaz: ich — śviet). Biezumoŭna, da hetych źmienaŭ u śviadomaści hladackaj hramadskaści prykłaŭsia Bił Klintan, jaki ŭ pieršym realici-šou sučasnaści, «Sud nad prezidentam», doŭha mulaŭsia ŭ svaich pryznańniach pra intymnuju suviaź z Monikaj Levinski. Ale jak tolki jon toje publična zrabiŭ, usie adrazu stracili da jaho i jahonaha asabistaha žyćcia ŭsialakuju cikavaść: «Tak, jon robić heta na pracy, tak, jon maje kachanku, nu i što?!». Hleba dla saładžavych siamiejnych dramaŭ, zasnavanych na škiletach u šafach i šmatlikich zdradach, była zhublenaja nazaŭždy.

Jašče adzin prykład zaniadbańnia temy minułaha — sieryjał «Siabry». Čaćviora maładych ludziej pryjechali zavajavać Manheten. Ale nichto nie viedaje tołkam, adkul jany, chto ich baćki. Hałoŭnaje, što ciapier jany razam: im dobra, nam viesieła. I tamu vizity ichnich baćkoŭ u chałaściackija kvatery — nie nahoda dla spadčynnych razboraŭ i pałkich pryznańniaŭ — adno pryłada, jak vykryć słabyja baki hałoŭnych hierojaŭ. Vizit baćkoŭ — chutčej vyprabavańnie, jakoje treba praminuć. Baćkoŭ dla sieryjałaŭ pačali vybirać kamičniejšych. Pryhadajem baćku Džordža Kastenzy ŭ sieryjale «Sajnfiełd» (jaho hraje baćka komika Bena Stylera). Pahadziciesia, «pastaŭlać» dla 30-hadovych hierojaŭ 70-hadovych baćkoŭ, jakija bolš padobnyja da ichnich dziadulaŭ, — nie nadta samavity krok z boku režysiora.

3. Ńju-Jork, Ńju-Jork.
Pieranos dziejańnia z Zachodniaha ŭźbiarežža na Uschodniaje. Z zacišna-zamožnych pradmieściaŭ Łos-Anželesa ŭ ńju-jorkski tłum. Ciapier hieroi žyvuć u horadzie dzivakoŭ: bieznadziejna aptymistyčnych aktoraŭ-pačatkoŭcaŭ, niepryznanych hienijaŭ. Tut usim plavać, chto ty i jak vyhladaješ, a taksama z kim baviš nočy — poŭnaja svaboda dla piersanažaŭ.

Miłyja niaŭdaki: «Sajnfełd». Źleva naprava: Džery Sajnfiełd, Elejn Benies, Džordž Kastenza, Kosmo Kramier
4. Samaironija jak zbroja suprać niespraviadlivaściaŭ śvietu.
Niama ni admoŭnych, ni stanoŭčych hierojaŭ, ni złydnia Mejsana, ni padstupnaj Džyny. Supakojciesia, nichto nikoha nie choča atrucić, kab prysabiečyć mahnackija miljony! Voś da prykładu, «Siabry»: patałahičny nieščaśliviec Ros, miły niaŭdacha-aktor Džoŭi, adviečnaja aficyjantka ź vialikim sercam Rejčeł, našto im hrošy — dajcie im śpiarša razabracca sa svaim žyćciom!

Ale varta zaŭvažyć, što niahledziačy na ŭvieś realizm novych sieryjałaŭ, realistyčnaha ŭ ich nie dadałosia. Heta my najpierš pra «Seks u vialikim horadzie». Pošuki seksualnaha ščaście na biaskoncych spatkańniach? Hledzišnaja niapraŭda.

«Voj, nu, viadoma heta nierealna, — amal kožny viečar maja hierainia vychadzić na spatkańnie i śpić s chłopcam, — kaža aktorka Sintyja Niksan, jakaja hrała ŭ sieryjale rolu advakatki Mirandy Hobs. — Viadoma, što i ja sama nie takaja i što ja ŭvohule ź ciažkaściu ŭjaŭlaju žančynu z padobnym ładam žyćcia».

5. Kamu patrebna Papiałuška? Dy nikomu.
Ścipłaja zmaharka na luboŭnym froncie, što ŭsie hetyja hady kachała adnaho čałavieka, dy jakaja bavić svaje sieryjalnyja dziańki ŭ pradčuvańni ščaślivaj raźviazki ciapier biez patreby. Ciažka dapuścić, što hałoŭnuju hierainiu sieryjału «Sajnfiełd» Elejn Bienies (aktorka Džulija Łuis-Drejfus): śmiašlivuju, daścipnuju, ale biazładnuju — čakajuć kazačny prync abo takaja ž karjera. Aŭtary prazrysta namiakajuć, što zor jana ź nieba nie ŭchopić. Tamu ŭ sieryjałach nacisk na bahataje padziejami i śmieškami žyćcio-byćcio. Pahatoŭ ad žartaŭ Elejn trasucca ścieny studyi i teleskryni. Ludzi pierastali saromiecca być adnačasova razumnymi i nieŭładkavanymi, i pa-va-li-ła!

P.S. A film «Seks u vialikim horadzie-2» nie hladzicie, lepiej vaźmicie padborku niekalkich siezonaŭ sieryjału.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?