Palityk Aleś Michalevič, jaki źbirajecca ŭdzielničać u prezidenckich vybarach, siońnia prezientavaŭ svaju prahramu ŭ minskaj Ratušy, što na płoščy Svabody.

U Ratušy pa-rasijsku

Prezientacyja prahramy Alesia Michaleviča rychtavałasia ŭ atmaśfiery tajamničaści. Žurnalistam zahadzia paviedamili tolki čas i miesca zboru — 27 traŭnia, a 15-j kala katalickaj katedry na płoščy Svabody. Čakajučy, pakul źbiarucca ŭsie zaprošanyja, žurnalisty žartam vykazvali zdahadki nakont miesca praviadzieńnia. Zhadvałasia kaviarnia «Pravincyja», francuzskaja ambasada, hatel «Jeŭropa». Praŭda apynułasia niedzie pasiaredzinie — u vyznačany čas usich paviali praz darohu ŭ Ratušu. «My prosta pryjšli i zaklučyli damovu», — adkazaŭ palityk na pytańnie, jak udałosia arandavać takoje miesca. Jon vykazaŭ spadziavańnie, što prezientacyi prahramy ŭ rehijonach taksama projduć u najlepšych miescach.

Heta byŭ nie adziny siurpryz, jaki čakaŭ pradstaŭnikoŭ presy. Svaju prahramu palityk, jakoha viedajuć, jak pryncypova biełaruskamoŭnaha, pradstaviŭ pa-rasijsku.

Paźniej jon patłumačyŭ karespandentu «NN», što heta śviedčyć pra ćviarozuju acenku kandydatam moŭnaj situacyi ŭ krainie. «Bolšaja častka maich ahitacyjnych materyjałaŭ budzie padrychtavanaja pa-rasijsku, bo hetuju movu bolšaść biełarusaŭ lepš viedajuć i ŭsprymajuć». Tym nie mienš, kandydat abiacaje, što ŭ vypadku abrańnia jaho prezidentam, dziaržava adkryjecca dla biełaruskaj movy na ŭsich uzroŭniach.

«Maja prahrama antykryzisnaja»

U Ratušy byli prezientavanyja tezisy prahramy. Całkam prahrama, jakaja budzie składacca bolš čym sa sta staronak, źjavicca ŭ vieraśni. «Maja prahrama antykryzisnaja», — adrazu ž adznačyŭ Aleś Michalevič. Nazyvajecca jana «Biełaruś: Stratehija evalucyi». Składajecca prahrama z troch vialikich raździełaŭ: I. Ekanamičny rost. II. Efiektyŭnaja dziaržava. III. Aktyŭnaje hramadstva.

Prahrama kandydata padkreślena akcentujecca na Biełarusi. Nazva krainy sustrakajecca ŭ kožnym padpunkcie raździełaŭ. «Pryvabnaja Biełaruś», «Kankurentazdolnaja Biełaruś», «Enierhietyčnaja Biełaruś», «Dziełavaja Biełaruś», «Ekałahičnaja Biełaruś» i h.d.

I Michalevič, i jaho paplečniki nieadnarazova padkreślivali ciaham aznajamleńnia z prahramaj, što ruchavikom jaje budzie ekanomika. Mocnaja ekanomika, jakaja vyciahnie na sabie ŭsie astatnija śfiery žyćcia. Siońnia popleč z palitykam stajali adrazu dva ekanamisty — Aleś Łukaševič i Viktar Jaŭmienienka. Akramia ich, siońnia žurnalistam pradstavili pravizara Danutu Čyhir, navukoŭca Kanstancina Łukašova dy fiłosafa Ihara Drako.

Zabaranić «čarniły»

Adziny momant, kali ŭ zale prahučali družnyja apładysmienty, byŭ vyklikany zajavaj Michaleviča pra zabaronu vypusku i prodažu pładova-jahadnych vinaŭ. Palityk akurat zhadaŭ zakon pa zabaronu raśpićcia śpirtnych napojaŭ u hramadskich miescach. Jon vitaje novaŭviadzieńnie, adnak pry hetym padkreślivaje nieabchodnaść raźvićcia śfiery adpačynku. Što datyčyć ałkaholu ŭ cełym, padkreśliŭ Michalevič, to najbolšuju škodu biełarusam niasuć «čarniły», tamu ich treba zabaranić.

Na pytańnie, ci nie baicca jon iści na vybary z takim niepapularnym abiacańniem, palityk adznačyŭ, što aktyŭnyja spažyŭcy padobnych napojaŭ nie ŭvachodziać u jahonuju elektaralnuju hrupu i paprasiŭ pabačeńnia ŭ prysutnych, kali kahości pakryŭdziŭ hetym vykazvańniem.

«Nie baču sensu ŭ vyłučeńni adzinaha»

Paśla aznajamleńnia z prahramaj i kamandaj kandydata Michaleviča paprasili vykazacca pra situacyju vakoł adzinaha kandydata ad apazicyi. Jon zajaviŭ, što nie bačyć sensu ŭ vybarach adzinaha kandydata, bo da vybaraŭ zastałosia vobmal času. Na jaho dumku, vyznačacca z adzinym treba było hady try tamu. «Da vybaraŭ zastałosia zusim mała času. Na maich vizitoŭkach vy bačycie nadpis «Kandydat u Prezidenty — 2011», ale vybary mohuć adbycca ŭžo naprykancy hetaha hodu», — zajaviŭ palityk. Pry hetym jon zhadaŭ kankurentaŭ, adznačyŭšy, što jašče nie aznajomiŭsia z prahramaj Jarasłava Ramančuka ad AHP, i dadaŭšy, što ŭ lubym vypadku ličyć svaju prahramu najbolš realistyčnaj i vykanalnaj.

«Kali niama skradzienaj pieramohi, zmahacca niama za što»

Cikaviła žurnalistaŭ i toje, jakim čynam Michalevič źbirajecca pieramahać na vybarach. Adkul upeŭnienaść, što na vybarach hetym razam budzie inakš, što buduć ličycca hałasy i ahučvacca realnyja ličby, čamu abrany evalucyjny šlach da źmieny ŭłady, sypalisia pytańni. Na heta Michalevič adkazvaŭ dosyć raspłyvista.

Nam vielmi važna, kab ludzi pryjšli na vybary, prahałasavali za nas, pavieryli ŭ nas, kazaŭ palityk. Jon davodziŭ, što kolkaść źniavieranych va ŭładzie ludziej raście štohod, adnak, na žal, nie raście pry hetym kolkaść prychilnikaŭ demakratyčnych palitykaŭ. «Naša zadača, kab było bolš tych, chto za nas. Kali budzie bolš pałovy takich hramadzianaŭ, my pieramožam. Tady prychod da ŭłady budzie vyklučna techničnaj praceduraj».

Palityk tak i nie adkazaŭ na pytańnie, jakim čynam možna budzie daviedacca pra realnyja ličby vynikaŭ hałasavańnia, kab zajavić pra svaju pieramohu. Jon iznoŭ paŭtaryŭ tezu pra nieabchodnaść elektaralnaj padtrymki i dadaŭ, što kali niama skradzienaj pieramohi, zmahacca niama za što.

Nahadajem, što Michalevič pieršym z palitykaŭ abvieściŭ, što kidaje vyklik Alaksandru Łukašenku. Heta adbyłosia jašče 27 studzienia 2010 h. Miesca dla pačatku kampanii Michalevič abraŭ dosyć niečakanaje — płanietaryj u parku Horkaha.

* * *

Aleś Michalevič nar. u 1975. Jon ź siamji navukoŭcaŭ. Skončyŭ BDU pa śpiecyjalnaści palitałohija. Uznačalvaŭ Zadzinočańnie biełaruskich studentaŭ, doŭhi čas uvachodziŭ u Partyju BNF. Byŭ deputatam Puchavickaha rajsavieta. Žanaty, maje dźviuch dačok.

Hladzi jašče:
Piać plusaŭ i piać minusaŭ Michaleviča

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?