Byłomu kandydatu na pasadu prezidenta i palitviaźniu Alaksandru Kazulinu paviedamili, što ź jaho źniataja kryminalnaja sudzimaść. Heta adkryvaje pierad Kazulinym mahčymaść udziełu ŭ prezidenckich vybarach. Mocnyja i słabyja baki hetaha kandydata.
Turma padarvała zdaroŭje Kazulina, ale nie duch.
1. Rašučaść
+ Na minułych prezidenckich vybarach Alaksandr Kazulin prademanstravaŭ svoj mocny charaktar. Jon bieskampramisna krytykavaŭ Łukašenku i sprabavaŭ abvastryć situacyju ŭ čas akcyj pratestu. Hodny Kazulin z hodnaściu pieranios sud i turemnaje źniavoleńnie. Z toj kampanii jon zasłužyŭ sabie imidž terminatara, marskoha piechacinca. Niezdarma ž z parašutam skakaŭ. Sapraŭdny łoś, a nie kazula.
— Paśla vyzvaleńnia Kazulin tak i nie znajšoŭ svajo miesca ŭnutry apazicyi. Praź niejki čas aktyŭnaści palityk uvohule syšoŭ u cień. «Ja dumaju, što jon vielmi pakryŭdžany, i pakryŭdžany spraviadliva. Jamu hałavu adbivali, u turmu pasadzili, a my ŭsio raźbirali, ci jon staŭlenik Kramla, ci staŭlenik Łukašenki. Kazulin prajšoŭ praz kałoniju, my nie možam jaho paprakać, bo jon prajšoŭ praz heta svaim chrybtom i hałavoj. Heta ŭnikalny čałaviek, ale jon nie z žaleza», — zaznačaŭ paet, lider kampanii «Havary praŭdu» Uładzimir Niaklajeŭ.
2. Rejtynh
+ U Kazulina naraŭnie z Alaksandram Milinkievičam najbolšy rejtynh siarod apazicyjnych palitykaŭ. A paznavalnaść jašče bolšaja. Heta i zasłuha minułaj kampanii, i pamiać pra Kazulina jak rektara BDU. Kazulinu nie daviadziecca zavajoŭvać elektarat z nula, peŭnaja padtrymka ŭ jaho majecca.
— Tym nie mienš, admoŭny rejtynh u Kazulina taksama majecca. Najpierš tut buduć čutnyja hałasy, što čałavieka prosta adahnali ad karmuški. Tamu jon prahnie revanšu i syšoŭ u apazicyju. U svoj čas Kazulin nieadnarazova zajaŭlaŭ, što źjaŭlajecca čałaviekam prezidenta.
3. Aŭtarytet
+ Z turmy Kazulin vyjšaŭ biassprečnym maralnym aŭtarytetam. Za hady źniavoleńnia i paśla śmierci žonki Kazulin nabyŭ vobraz pakutnika. Navat nie schilny da kaalicyj lider KCHP‑BNF Zianon Paźniak i toj sadziŭsia za stoł pieramovaŭ z Kazulinym pierad samitam «Uschodniaha partniorstva». Darečy, kali Kazulin tolki pryjšoŭ u apazicyju, to nie moh źviazać dvuch słovaŭ na biełaruskaj movie, a ciapier vydatna razmaŭlaje na joj.
— Tym nie mienš, niekatoryja ŭsio jašče pomniać časy, kali Kazulin byŭ rektaram BDU. Pry im va ŭniviersitecie pačalisia pieršyja palityčna matyvavanyja vyklučeńni studentaŭ. Častka vykładčykaŭ praz svaju aktyŭnuju hramadzianskuju pazicyju taksama była vymušanaja šukać novuju pracu. Pry Kazulinu rusifikacyja ŭniviersiteta taksama nabirała maksimalnyja pamiery.
4. Administratar
+ Alaksandr Kazulin zasłužyŭ sabie słavu talenavitaha i zdolnaha administratara. BDU pry im dasiahnuła najbolšaha roskvitu. Budavalisia novyja karpusy, internaty. Sam Kazulin u toj čas byŭ pryroŭnieny da ŭzroŭniu ministra. Kazulin i tady nie admaŭlaŭ sabie ŭ epatažy. Naprykład, adnojčy 1 vieraśnia rektar źjaviŭsia da studentaŭ na viertalocie.
— U apazicyi mieniedžerskija i administratarskija zdolnaści Kazulina raśćviści nie zmahli. Mylnymi burbałkami akazalisia jahonyja inicyjatyvy «Vola narodu» i «Biełaruski dom». U Sacyjał‑demakratyčnaj partyi Kazulin taksama nadoŭha nie zatrymaŭsia.
5. Padtrymka
+ Kazulin nie vyklikaje pryncypovaha piarečańnia ŭ bolšaści apazicyjnych kandydataŭ. Kali miechanizm abrańnia adzinaha ŭsio ž zapracuje, to palityk maje šancy ŭznačalić kałonu. Tym bolš, što Kazulin maje niepasrednaje dačynieńnie da Rady intelihiencyi, jakaja i choča ŭznačalić praceduru vyłučeńnia adzinaha.
— Ź minułaj prezidenckaj kampanii navat samyja blizkija paplečniki kandydata Kazulina raźbiehlisia ad jaho, jak tolki skončylisia hrošy. Na siońnia ŭ značnaj stupieni prafiesar — palityk‑adzinočka. Kali, viadoma, za im nie staić trochi tajamničaja kampanija «Havary praŭdu».
Źmicier Pankaviec
Alaksandr Kazulin naradziŭsia 25 listapada 1955 u Minsku. Prafiesar, doktar navuk, akademik Akademii adukacyi. Były lider Biełaruskaj sacyjał‑demakratyčnaj partyi (Hramada). Udzielničaŭ u prezidenckich vybarach 2006. Pavodle niezaležnych sacyjołahaŭ, nabraŭ 6% hałasoŭ. Udzielničaŭ u paślavybarčych akcyjach pratestu. 25 sakavika 2006 aryštavany za arhanizacyju vuličnaha šeścia. Asudžany na 5,5 hoda źniavoleńnia. Pakarańnie adbyvaŭ u kałonii Vićba (Viciebski rajon). Vyzvaleny ŭ žniŭni 2008 pad ciskam Jeŭrasajuza i ZŠA. U lutym 2008 u Kazulina pamierła žonka Iryna. Ad ichniaha šlubu zastalisia dźvie dački — Volha i Julija.
