Časovy ŭrad Kyrhyzstana pazbaviŭ źvierhnutaha prezidenta Kurmanbieka Bakijeva prezidenckaj niedatykalnaści i daručyŭ Hienprakuratury zabiaśpiečyć jaho ekstradycyju ŭ respubliku. Adpaviedny dekret padpisała 4 maja kiraŭnik Kabinieta ministraŭ Roza Atunbajeva, paviedamlaje RIA Novosti sa spasyłkaj na kiraŭnika infarmacyjna‑analityčnaha adździeła časovaha ŭrada Faryda Nijazava.

U tekście dekreta havorycca, što »Bakijeŭ dapuściŭ rasstreł mirnych hramadzian i tym samym sam pazbaviŭ siabie statusu eks‑prezidenta i niedatykalnaści».

Bolš jak tydzień tamu časovy ŭrad na svaim pasiadžeńni ŭ zakrytym režymie razhledzieŭ pytańnie ab adchileńni ad pasady i pazbaŭleńni niedatykalnaści źvierhnutaha prezidenta Bakijeva, adnak šerah pałažeńniaŭ zakonaprajekta, prapanavanaha vice‑premjeram Azimbiekam Bieknazaravym, zapatrabavaŭ udakładnieńniaŭ.

7 krasavika ŭ Biškieku prychilniki apazicyi zaniali Dom urada Kirhizii, ułada pierajšła da časovaha ŭrada. U sutyknieńniach zahinuli bolš jak 80 čałaviek, sotni atrymali ranieńni.

Bakijeŭ 16 krasavika pakinuŭ krainu i napisaŭ zajavu ab składańni paŭnamoctvaŭ. 19 krasavika jon užo znachodziŭsia ŭ Biełarusi, a 21 krasavika vystupiŭ z zajavaj dla presy ab tym, što nie pryznaje svajoj adstaŭki i ličyć siabie prezidentam Kyrhyzstana.

27 krasavika namieśnik staršyni časovaha ŭrada Kyrhyzstana Azimbiek Bieknazaraŭ, jaki kuryruje pravaachoŭnyja orhany, paviedamiŭ, što Bakijeŭ zavočna abvinavačany pa dvuch artykułach Kryminalnaha kodeksa — u arhanizacyi zabojstvaŭ i złoŭžyvańni słužbovym stanoviščam.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?