Ułady praciahvajuć adbivacca ad prośbaŭ hramadstva pryznać status historyka-kulturnaj kaštoŭnaści za bieł-čyrvona-biełym ściaham. Matyvy možna zrazumieć: ściah źjaŭlajecca jaskravym i dynamičnym simvałam apazicyi da ŭłady, i ŭ kahości na čale Biełarusi na jaho, vidavočna, vypracavałasia stojkaja alerhija.

Cikava manitoryć dyskusiju na forumie tut.by: tyja, chto suprać bieł-čyrvona-biełaha ściaha, dahetul zajaŭlajuć pra jaho skampramietavanaść kałabarantami ź niemcami ŭ Druhoj suśvietnaj vajnie. Tut reč nie tolki ŭ tym, što hetaksama možna nazvać «dyskredytavanymi» dziaržaŭnyja ściahi Rasii, Ukrainy, Łatvii, Litoŭskaj Respubliki, Estonii i navat lehiendarny trykałor Francyi.

Sprava ŭ elemientarnaj chranałohii. Paličym hady:

Nacysty dazvolili nieaficyjna (sic!) karystacca bieł-čyrvona-biełym ściaham u 1941, skončyłasia niamieckaja akupacyja ŭ 1944 hodzie — usiaho try hady.

Stvorany i kančatkova pryniaty bieł-čyrvona-bieły ściah byŭ u 1917 hodzie, u 1918—1919 hh. byŭ ściaham Biełaruskaj narodnaj respubliki pierad emihracyjaj Rady BNR — pišam dva hady.

Paśla hetaha bieł-čyrvona-bieły ściah z pačatku 20-ch da 1939 hoda vykarystoŭvaŭsia biełaruskim nacyjanalnym rucham u Zachodniaj Biełarusi, jakuju ŭ 1939 hodzie pryjšła nibyta vyzvalać Čyrvonaja armija. To bok pry žadańni možna skazać, što

bieł-čyrvona-bieły ściah doŭhi čas vykarystoŭvaŭsia prosavieckimi arhanizacyjami ŭ mižvajennaj Polščy.
Tak ci inačaj, pišam dvaccać hadoŭ.

Paśla vajny — sorak piać hadoŭ vykarystańnia ściaha biełaruskaj emihracyjaj na Zachadzie, biełaruskim demakratyčnym rucham u časy «Pierabudovy». Nijakaha nacyzma.

I kaniečnie ž, nadzvyčaj važnymi byli čatyry hady aficyjnaha statusa ściaha ŭ pačatku 1990-ch:

mienavita pad bieł-čyrvona-biełym ściaham Biełaruś adnaviła svaju niezaležnaść, pryniała kanstytucyju, adčyniła svaje pieršyja ambasady, abrała svajho pieršaha i pakul što adzinaha prezidenta.

Paśla sprečnaha refierenduma 1995 hoda, čyje vyniki, miarkujučy pa ŭsim, nasamreč nie majuć jurydyčnaj siły, ściah staŭ simvałam baraćby suprać panujučaha ŭ krainie aŭtarytarnaha režyma, što, padobna, i źjaŭlajecca pryčynaj admovy ŭ statusie kaštoŭnaści. Piatnaccać hadoŭ, ale ładna, nie budziem ich daličvać.

Atrymlivajem

siemdziesiat adzin hod vykarystańnia bieł-čyrvona-biełaha ściaha nacyjanalna-demakratyčnym rucham suprać troch hadoŭ nieaficyjnaha vykarystańnia kałabarantami. Pra jakuju dyskredytacyju moža być razmova?

Dyj kali paraŭnoŭvać bieł-čyrvona-bieły ściah z sučasnym dziaržaŭnym ściaham — čyrvona-zialony ściah nia byŭ prosta «dazvoleny» akupantami da vykarystańnia, ale byŭ hetymi samymi (to bok inšymi, savieckimi) akupantami i stvorany. I da čyrvonaarmiejskaha «ściaha pieramohi», kali ŭžo na toje pajšło, jon taksama dačynieńnie maje vielmi ŭkosnaje, bo jahony saviecki pratatyp byŭ raspracavany tolki ŭ 1951 h.

Taho majem historyju čyrvona-zialonaha ściaha: sorak hadoŭ savieckaha tatalitaryzma
z poźnim stalinizmam i brežnieŭskim zastojem. Paśla hetaha byli jašče piatnaccać hadoŭ postsavieckaha aŭtarytarnaha režyma.
Niaŭžo hety ściah sapraŭdy bolš kaštoŭny za bieł-čyrvona-bieły?

Apošnim časam ułada nie pierastaje dasyłać niedvuchsensoŭnyja PR-sihnały, jakija mohuć śviedčyć pra padrychtoŭku adnosnaj rebiełarusizacyi. Daj boh, kab dajšła sprava i da «rehabilitacyi» bieł-čyrvona-biełaha ściaha.

***

P.S. A čamu sučasnyja biełaruskija nacyjanalnyja arhanizacyi nie karystajucca ściaham Vialikaha kniastva Litoŭskaha — čyrvonaha pałotnišča z Pahoniaju? Taki ściah možna było b vykarystoŭvać na lehalnych kulturnickich, skažam, mierapryjemstvach, raz užo bieł-čyrvona-bieły ściah — palityzavanaja i «niezarehistravanaja simvolika».

Ściah VKŁ

Ściah VKŁ

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?