Pastaŭka rasiejskaj nafty na biełaruskija naftapierapracoŭčyja zavody ŭ 2010 hodzie moža źnizicca da 15,8 miljona tonaŭ — pra heta, jak paviedamlaje «Interfaks», zajaviŭ na presavaj kanferencyi ŭ Miensku namieśnik ministra ekanomiki Biełarusi Anatol Fiłonaŭ.

Jon patłumačyŭ, što nazvanuju kolkaść nafty vyznačyli zavody, zychodziačy z patrebaŭ efektyŭnaj pierapracoŭki i maksymalnaha vychadu śvietłych naftapraduktaŭ. U apošnija hady biełaruskija zavody pierapracoŭvali paradku 20 miljonaŭ tonaŭ nafty za hod.

Pavodle Fiłonava, abjom 15,8 młn tonaŭ całkam uličvaje zaplanavanyja abjomy biazmytnaj nafty — 6,3 młn tonaŭ u 2010 hodzie. «Zavody ličać, što tak možna pracavać: rabić miks, da biazmytnaj nafty dazakuplać mytnuju, što j rabiłasia ŭ pieršym kvartale», — skazaŭ namieśnik ministra ekanomiki.

Pry hetym jon padkreśliŭ, što pierapracoŭka mytnaj nafty ŭ poŭnym abjomie, z ulikam hłybini pierapracoŭki na biełaruskich zavodach, niemetazhodnaja z ekanamičnaha hledzišča.

«U varunkach źmiešanaj pierapracoŭki mytnaj i biazmytnaj nafty ŭ pieršym kvartale Mazyrski NPZ zabiaśpiečyŭ dadatnuju rentabelnaść pierapracoŭvańnia nafty. „Naftan“ zakončyŭ pieršy kvartał ź nievialikimi stratami — admoŭnaja rentabelnaść skłała 0,5%», — paviedamiŭ Fiłonaŭ.

Jon taksama painfarmavaŭ, što na pačatku 2010 hodu dadatnaje dla Biełarusi salda pamiž impartam nafty i ekspartam naftapradukcyi skłała 65 miljonaŭ dalaraŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?