Jany vydali jaho, kab dapamahčy paranienym u Iraku i Afhanistanie.
Žonki i siabroŭki brytanskich vajskoŭcaŭ, pakul ich kachanyja niasuć słužbu na vajennych abjektach Złučanaha Karaleŭstva i za jaho miežami, vyrašyli dapamahčy tym, chto byŭ paranieny, udzielničajučy ŭ vajennych apieracyjach u Iraku i Afhanistanie. Kab sabrać hrošy na dabračynnyja mety, žančyny vyrašyli, źniaŭšy ź siabie ŭsio adzieńnie, sfatahrafavacca aholenymi dla kalendara.
Na jaho prodažy zarabili 26 tys. funtaŭ sterlinhaŭ (kala 40 tys. dalaraŭ ZŠA), paviedamlaje The Daily Mail.
Ahułam 50 žonak i siabrovak vajskoŭcaŭ uziali ŭdzieł u fotasiesijach, jakija pravodzilisia na vajennych bazach i ŭ navučalnych centrach padrychtoŭki ŭ Chempšyry.
Niahledziačy na toje, što na žančynach na bolšaści fatahrafij nasamreč nie było ničoha z adzieńnia, ich zdymali tak, kab intymnyja miescy byli prykrytyja pradmietami, časta vajennaha pryznačeńnia, jakija jany vykarystoŭvali dla zdymak.
20‑hadovaja Kieli Monk — adna ź dziaŭčat, jakija ŭziali ŭdzieł u stvareńni kalendara. Jak raskazała dziaŭčyna, ideju takoha kalendara prapanavaŭ jaje 21‑hadovy siabar Endru Mejsan, jaki słužyć u 2‑m bataljonie Karaleŭskaha pałka pryncesy Uelskaj. Razam ź siastroj Endru Sem dziaŭčyna z zadavalnieńniem paŭdzielničała ŭ adkrytaj fotasiesii.
Na fotazdymkach dziaŭčaty zajmajucca ŭ trenažornaj zale, pieraadolvajuć pałasu pieraškodaŭ, siadziać za šturvałam samalota i zaharajuć na jaho kryle. Na adnym sa zdymkaŭ čatyry dziaŭčyny pazirujuć u mašynnym adździaleńni adnaho z vajennych karabloŭ. Na inšych fota — u sałdackich čaravikach namyvajuć vadoj ź pienaj armiejski BTR, a taksama, pamachvajučy źniatymi stanikami, sustrakajuć tank.
Źnialisia ŭ kalendary nie tolki maładyja dziaŭčyny, ale i žančyny za 40.
Tak, 43‑hadovaja Łajza Fełoŭs‑Petel, jakaja paziravała dla krasavickaj staronki kalendara, skazała, što dla jaje było honaram źniać ź siabie adzieńnie, kab padtrymać vieteranaŭ. Pa słovach Łajzy, jaje školny siabar ciapier niasie słužbu ŭ Afhanistanie. Adzinym sposabam, jakim Łajza mahła jaho padtrymać, znachodziačysia doma, jana ličyć udzieł u stvareńni kalendara.
Fatohraf Roj Hudvin, jaki dapamoh dziaŭčatam vypuścić kalandar, skazaŭ, što ŭsie 50 dziaŭčat prajavili vialikaje ciarpieńnie, kab paziravać. Pa słovach fatohrafa, na adnu bazu žančyn dla fotazdymak navat daviałosia pryvozić tajemna.
