Jaŭka vybarščykaŭ na vybary ŭ miascovyja saviety 25 krasavika skłała 79,1%, paviedamiła Centralnaja kamisija pa vybarach i praviadzieńni respublikanskich refierendumaŭ. Heta na 0,1% mienš, čym na miascovych vybarach 2007 hoda.

Na ŭčastki pryjšło 5.560.418 čałaviek, jakija majuć prava hołasu. Najbolšaja jaŭka zafiksavana ŭ Viciebskaj vobłaści — 90,9%. Dalej iduć Mahiloŭskaja vobłaść — 85,7%, Homielskaja — 84,4%, Minskaja — 81,7%, Hrodzienskaja — 80,6%, Bresckaja — 78,7% i horad Minsk — 58,7%. U dzień vybaraŭ u śpisy vybarščykaŭ było ŭklučana 21.385 čałaviek (ad 650 u Hrodzienskaj vobłaści da 6.232 u Bresckaj; u Minsku — 2.853).

Jaŭka na daterminovaje hałasavańnie skłała 29,3% (ad 23,5% u Minsku da 34,3% u Mahiloŭskaj vobłaści), što na 4,4 pracentnyja punkty vyšej, čym na papiarednich miascovych vybarach u 2007 hodzie.

Jaŭka ŭ dzień asnoŭnaha hałasavańnia ŭ cełym pa krainie skłała 49,8%, u Viciebskaj vobłaści — 57,7%, Hrodzienskaj — 55,2%, Bresckaj — 52,3%, Minskaj — 51,6%, Mahiloŭskaj — 51,4%, Homielskaj — 50,5%, u Minsku — 35,2%.

Kamientujučy vysokuju jaŭku vybarščykaŭ, sakratar Centralnaj kamisii pa vybarach i praviadzieńni respublikanskich refierendumaŭ Mikałaj Łazavik zajaviŭ, što jaje zabiaśpiečyli

«dobraja arhanizatarskaja praca pradstaŭnikoŭ vybarčych kamisij», a taksama «vysokaja hramadzianskaja śviadomaść vybarščykaŭ».

Pavodle słoŭ Łazavika, padčas daterminovaha i asnoŭnaha hałasavańnia nie było zafiksavana parušeńniaŭ, jakija mahli b paŭpłyvać na vyniki. Jon padkreśliŭ, što heta adznačali jak arhanizatary vybaraŭ, tak i naziralniki i sami kandydaty ŭ deputaty.

«Viadoma, niedapracoŭki byli, ale pad sumnieńnie vyniki vybaraŭ jany pastavić nie mohuć», — skazaŭ Łazavik.

Sakratar CVK paviedamiŭ, što kampanija sioleta aktyvizavałasia tolki da kanca pieryjadu ahitacyi. «Byli i sutyčki kandydataŭ, jakija psavali ahitacyjnyja płakaty, ale ŭ cełym pa Biełarusi vybary prajšli biez kataklizmaŭ i rezkich palityčnych uspleskaŭ», — adznačyŭ Łazavik. Pavodle jaho słoŭ, kampanija była nie tolki dziejnaj, «ale i davoli spakojnaj, jakaja nie paŭpłyvała niehatyŭna na sacyjalna-palityčnaje stanovišča ŭ hramadstvie».

Łazavik taksama zajaviŭ, što na chod vybaraŭ stanoŭča paŭpłyvali źmianieńni ŭ vybarčym zakanadaŭstvie, pryniatyja ŭ kancy minułaha hoda. «Źmianieńni byli istotnymi, jany byli realizavanyja na praktycy. U pryvatnaści, dadatkovyja pravy byli dadzieny ŭdzielnikam vybaraŭ, pašyrany mahčymaści dla ahitacyi. Ale, na žal, u baraćbie nie ŭsie akazalisia stojkimi. U niekatorych rehijonach pradstaŭniki palityčnych partyj całkam admovilisia ad udziełu ŭ vybarach», — adznačyŭ Łazavik.

U 2007 hodzie jaŭka na vybary ŭ miascovyja saviety skłała 79,2% (ad 60% u Minsku da 90,4% u Viciebskaj vobłaści). Daterminova prahałasavała 24,9% vybarščykaŭ (ad 16,7% u Minsku da 30,7% u Homielskaj vobłaści). Na ciapierašnich vybarach jaŭka źniziłasia ŭ Bresckaj vobłaści (na 1,8%) i Minsku (na 1,3%), vyrasła ŭ Minskaj (na 0,1%), Hrodzienskaj (na 0,3%), Viciebskaj (na 0,5%), Mahiloŭskaj (na 1,2%) i Homielskaj (na 1,3%) abłaściach.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?