Padčas štohadovaha pasłańnia da narodu i parłamientu Łukašenka byŭ surovy. Jon paabiacaŭ dalejšuju ekanamičnuju libieralizacyju, a taksama plažyŭ Rasiju.

Tranślacyja z Avalnaj zały parłamienta pačałasia ŭ toj momant, kali Łukašenki za trybunaj jašče nie było. Apieratary advolna vychoplivali tych, chto źbiraŭsia słuchać užyvuju. Premjer Sidorski razmaŭlaŭ z staršyniom Kanstytucyjnaha suda Piatrom Mikłaševičam. Pieršaja namieśnica kiraŭnika Administracyi prezidenta Natalla Piatkievič pra niešta pieramaŭlałasia ź vice‑premjeram Andrejem Kabiakovym, a pamiž imi siadzieŭ jašče adzin vice‑premjer Uładzimir Patupčyk.

Hledačy mahli pabačyć u novym imidžy staršyniu prezidyuma Akademii navuk Michaiła Miaśnikoviča, jaki adraściŭ baradu‑espańjołku. Źviarnuła ŭvahu, što ministr infarmacyi Aleh Pralaskoŭski i staršynia Biełteleradyjokampanii Alaksandr Zimoŭski siadzieli na adnych ź pieršych šerahaŭ, a voś ministry adukacyi i kultury Alaksandr Radźkoŭ i Pavieł Łatuška — na halorcy.

Łukašenka tradycyjna pačaŭ z ekanamičnaha błoku. Pačynaŭ čytać pa papiercy. Kiraŭnik dziaržavy pačaŭ kazać pra praciah ekanamičnaj libieralizacyi.

Najpierš jon zahadaŭ dać zialonaje śviatło dla zamiežnych inviestaraŭ. «Čamu jany prychodziać sustrakacca asabista sa mnoj? Bo zhubili vieru ŭ tych, chto nižej. Admovy inviestaram buduć usprymacca jak sabataž», — zaznačyŭ kiraŭnik dziaržavy.

Jon spytaŭ u kiraŭnika Administracyi Uładzimira Makieja za biurakratyju, čamu joj nie ŭdajecca dać rady. U jakaści prykłada pryvioŭ vypadak z budaŭnictvam transpartna‑łahistyčnaha centru ŭ aeraporcie, dazvoł na budaŭnictva jakoha kampanija nie mahła atrymać ciaham 2,5 hadoŭ.

Łukašenka pastaviŭ ambitnuju zadaču bližejšym časam vyjści ŭ tryccatku krain z najbolš spryjalnymi ŭmovami dla pradprymalnickaj dziejnaści. «Arandatary pavinny adčuć palohku. Da vosieni pavinna adbycca spraščeńnie padatkovaj sistemy. Kredyty ŭ bankach pavinny być dastupnymi», — viaščaŭ z trybuny lider.

Ekspart svaich tavaraŭ Łukašenka nazvaŭ adnoj z najbolš pryjarytetnych zadač dla ŭradu. Razam z tym, jon paviedamiŭ, što bližejšym časam Makiej razam z kiraŭnikom dziaržkantrolu Łomaciem pavinny zrabić dakład ab vynikovaści dziejańniaŭ uradu pa zasvajeńni novych rynkaŭ.

Kiraŭnik krainy nastojvaje na praciahnieńni palityki mielijaracyi ziamiel, što na jahonuju dumku moža pavysić dachody dziaržavy ad sielskaj haspadarki z troch miljardaŭ dalaraŭ da siami.

Jašče adnoj pastaŭlenaj zadačaj źjaŭlajecca ŭvachodžańnie Biełarusi ŭ top‑50 krain z najvyšejšym indeksam čałaviečaha patencyjału.

«My na kaleniach stajali pierad niekatorymi arhanizacyjami, vyprošvajučy hrošy, — skazaŭ Łukašenka, jaŭna majučy na ŭvazie MVF. — Ciapier nam ichniaja dapamoha ŭžo nie patrebnaja».

Asabliva na arechi dastałasia budaŭničaj śfiery. Na dumku Łukašenki, ceny ŭ hetaj halinie zavyšanyja, a kančatkovy pradukt nie adpaviadaje normam. «Pryjdzie dziaržkantrol i zdymie z vas štany. I vykinie na vulicu biez štanoŭ», — papiaredziŭ kiraŭnik krainy budaŭnikoŭ.

Błok pra kulturu byŭ tradycyjnym. Łukašenka patrabavaŭ novych šedeŭraŭ. «Ja prašu: dajcie mnie «Vajnu i mir», dajcie «Padniatuju calinu», ja vam za heta zapłaču. Niama ni vajny, ni miru».

Dźviuchmoŭje było nazvanaje vializnaj kaštoŭnaściu, a hvałtoŭnaj biełarusizacyi nie budzie. «Štučna admaŭlacca ad rasijskaj movy — heta duraść, tupaść».

Paśla kultury pačałosia vystupleńnie pra zamiežnapalityčnaje stanovišča krainy. I tut najpierš havorka zajšła pra Rasiju.

«Rasija, biezumoŭna, zastajecca našym asnoŭnym partnioram, — tradycyjna pačaŭ Łukašenka. — My padpisvali sotni damovaŭ z Rasijaj. I nam plaskali ŭ Kramli. Ciapierašniaje ž kiraŭnictva Rasii pajšło na tak zvanuju prahmatyzacyju adnosinaŭ. Uviedzienyja myty na naftu. Usio heta padryvaje padmurki sajuznaj dziaržavy. Nas vydušvali z rasijskaha rynku».

Tym nie mienš, lider Biełarusi nie adčajvajecca. «Nafta amal u dva razy padaražała. Nam dajuć 6 miljonaŭ tonaŭ, ale našy zavody štohod pierapracoŭvajuć 22‑25 miljony tonaŭ. I što, ciapier treba spynić zavody? Ja jedu damaŭlacca pa nafcie. Užo pajšła nafta ź Vieniesueły, pačali zdabyvać u Iranie. A čamu my heta nie možam rabić u Rasii? Z nas śmiajucca, što my viaziom naftu praz akijan. Ja ŭsio daŭno praličyŭ. Kali b nam heta vyhadna nie było, to nichto nie vaziŭ».

«Nachilać, vyśpiatkaŭ sabie davać ja nie dazvolu. Kali nachilajuć mianie, to nachilajuć uvieś biełaruski narod. Kiraŭnictva Rasii dumaje, što my nikudy nie dzieniemsia. Dzieniemsia! U centry Jeŭropy kraina pustavać nie budzie. Ja nie mahu dazvolić sabie prynižać ułasny narod. U ziamlanki pojdziem, ale vyžyviem!» — kaža Łukašenka.

«Ja nie Rasii mušu dziakavać, svaim «voraham» z MVF, Jeŭropy, Zachadu, što nam hrošy dali, kab my vyžyli. My prajšli ŭžo toj punkt, kali nas mohuć pastavić na kaleni. Rasija, kali zhubić Biełaruś, zhubić svoj pryvabny vyhlad. Nichto Rasii bolej nie pavieryć. Ja nie chaču kanfrantacyi z Rasijaj. My jašče nie razyšlisia kančatkova, jašče nie pozna viarnucca. Ale ad zaležnaści i dyktatu my pavinny syści», — zaznačyŭ lider.

Łukašenka zadavoleny «adkrytamu i pradmietnamu» dyjałohu ź Jeŭrasajuzam. Asabliva rady, što jaho inicyjujuć takija krainy, jak Francyja, Hiermanija, Italija. Uzhadaŭ Łukašenka i pra «Jeŭranest». Jon zaznačyŭ, što tam pavinny być deputaty parłamienta, a nie apazicyjaniery.

Pakryŭdžanym lider dziaržavy byŭ za toje, što Biełaruś nie zaprasili ŭ Vašynhton na samit pa jadziernaj biaśpiecy. «Nie zaprasili, bo nie stancavali pad dudku ZŠA i Rasii. Rasijanie paabiacali amierykancam, što vyviezuć adsiul uran. Ničoha jany adsiul nie vyviezuć. Hraznyja jadziernyja bomby my stvarać nie budziem».

Było ŭ vystupie i pra apazicyju. Pra Kazulina było zaznačana: «Niachaj radujecca, što vyzvalili, siadzić i nie viakaje».

Kali atamnuju stancyju admoviacca budavać rasiejcy, to pojdziem u Kitaj, zaznačyŭ lider.

«Nie zusim dobra, kali Piatkievič i Zimoŭski kamunikujuć pamiž saboj praź internet. Ale i jon, i jana majuć racyju. Lepš sustreńciesia asabista i pahavarycie. Ale takaja sprečka taksama nadaje novy kałaryt», — adhuknuŭsia Łukašenka na niadaŭniuju dyskusiju pamiž čynoŭnikami ab roli ideałohii.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?