Eks‑prezident Kyrhyzstana Kurmanbiek Bakijeŭ znachodzicca ŭ Minsku. Pra heta zajaviŭ Alaksandr Łukašenka, adkazvajučy na pytańni deputataŭ 20 krasavika.

«Nočču ŭ paniadziełak ja daručyŭ adpaviednym słužbam, kab arhanizavali pierapraŭku Bakijeva ŭ Minsk. Jon pra heta prasiŭ, i nie adnojčy. Unačy ŭ paniadziełak jon byŭ u Minsku», - skazaŭ prezident. Siońnia, pa słovach Łukašenki, "pryznačanaja miedycynskaja kamisija, praviedziena pieršasnaje abśledavańnie siamji Bakijeva.

«Siamja, razumiejecie, u razabranym stanie: dzieci biednyja, piedyjatry zaraz tam pracujuć. Pracujuć usie, chto pavinien tam pracavać, abśledavańnie pravodzim u prezidenta ŭsioj jaho siamji. Karcina nieviasiołaja», — skazaŭ Łukašenka.

«Tolki čatyry čałavieki nam udałosia pryniać u Minsku, i jany ciapier znachodziacca ŭ nas pad abaronaj našaj dziaržavy i asabista vašaha prezidenta», — zajaviŭ biełaruski kiraŭnik.

Kali Kurmanbieku Bakijevu «patrebna budzie nie tolki reabilitacyja, ale i miedycynskaja dapamoha, my jaje abaviazkova akažam», zapeŭniŭ Łukašenka.

7 krasavika Bakijeŭ byŭ zrynuty z pasady kiraŭnika Kyrhyzstana. Adrazu jon źjechaŭ na poŭdzień krainy, dzie znachodzicca jahony rodavy auł. Ale nichto harantavać biaśpieku eks-kandydatu nie moh. 15 krasavika Bakijeŭ vylecieŭ u Kazachstan, ale ŭsio razumieli, što heta časovy prystanak.

U paniadziełak, 19 krasavika, pradstaŭnik MZS Kazachstana Askar Abdrachmanaŭ paviedamiŭ, što eks-kiraŭnik Kyrhyzstana Kurmanbiek Bakijeŭ pakinuŭ Kazachstan, dzie jon — u horadzie Taraz — pierabyvaŭ ad 15 krasavika.

Jašče ŭ niadzielu,

18 krasavika, Alaksandr Łukašenka zajaviŭ, što hatovy pryniać Bakijeva ŭ Minsku: «Heta majo asabistaje rašeńnie jak kiraŭnika dziaržavy».

“Ja chaču źviarnucca da kirhizskaha naroda: nie dapuścicie zdradnictva svajmu prezidentu. Heta budzie samaj žorstkaj pamyłkaj», – zaznačyŭ Łukašenka.

Łukašenka nazvaŭ padziei ŭ Kyrhyzstanie «antykanstytucyjnym dziaržaŭnym pieravarotam» i abvinavaciŭ ZŠA i Rasiju ŭ spryjańni jamu.

U subotu ŭ internecie źjaviłasia, infarmacyja sa spasyłkaj na krynicu ŭ Kazachstanie, što Bakijeŭ vylecieŭ z Taraza ŭ Biełaruś, ale hetaja navina była abvierhnuta Dziaržaŭnym pamiežnym kamitetam i avijakampanijaj «Biełavija».

Rašeńnie pryniać Bakijeva ŭ Biełarusi, imavierna, vykliča novaje abvastreńnie adnosin z Rasijaj.

U adroźnieńnie ad Askara Akajeva, jaki znajšoŭ sabie prytułak u Maskvie, Kurmanbiek Bakijeŭ nie moh na takoje raźličvać. Maskva nie mahła daravać jamu padman u pytańni vyvadu amierykanskaj vajskovaj bazy, za što jon užo atrymaŭ ščodry kuš ad Kramla.

Situacyja ŭ samoj Kirhizii zastajecca napružanaj. Učora ŭ Biškieku ŭ mižetničnych kanfliktach zahinuli prynamsi 5 čałaviek. Milicyjanty dabilisia adstaŭki ministra ŭnutranych spravaŭ časovaha ŭradu. Džałałabadskaja vobłaść ža ŭvohule zachoŭvaje viernaść Bakijevu.

Učora ž u Biškieku adbyŭsia pikiet pratestu suprać hatoŭnaści Biełarusi pryniać apalnaha prezidenta.

* * *

Z katoraj žonkaj i katorymi dziećmi Bakijeŭ prylacieŭ u Biełaruś?

Adkazvajučy na pytańni ŭ Nacyjanalnym schodzie, Alaksandar Łukašenka skazaŭ, što ad paniadziełka ŭ Biełarusi znachodzicca zrynuty prezydent Kyrhyzstanu Kurmanbek Bakijeŭ ź siamjoj. Pry hetym jon zhadaŭ piacihadovaha syna i dzieviacihadovuju dačku Kurmanbeka Bakijeva.

Adnak, aficyjna Bakijeŭ maje tolki adnu žonku. Heta Taciana Viktaraŭna Bakijeva, jakaja naradziłasia ŭ Samary, pavodle adukacyi — inžyner‑technolah. U jaje z Bakijevym dva darosłyja syny, adnaho ź jakich, mierkavałasia, Bakijeŭ rychtavaŭ ŭ pierajemniki.

Adkul mahli ŭziacca niepaŭnaletnija dzieci, jakich zhadaŭ Łukašenka?

Pavodle supracoŭnikaŭ kirhizskaj słužby radyjo «Svaboda», čutki pra najaŭnaść u Bakijeva inšaj siamji chadzili daŭno, ale ŭ pačatku sakavika heta ŭpieršyniu stała pradmietam hramadzkaha abmierkavańnia. Mienavita ŭ sakaviku były ministar dziaržmajomaści Raŭšan Džaimbekaŭ, jaki ciapier žyvie ŭ ZŠA, źviarnuŭsia da Bakijeva z adkrytym listom, u jakim zaklikaŭ prezydenta nie parušać maralnyja normy. U hetym liście było skazana, što,

akramia aficyjnaj žonki ŭ Bakijeva jość i dźvie nieaficyjnyja.

Partyja «Erkindzik Kirhizstan» zajaviła, što časovy ŭrad daŭ «harantyi niedatykalnaści prezydentu, jaho niepaŭnaletnim dzieciam i žonkam».

Vice‑premjer Kirhizstanu ŭ časovym uradzie Azenbek Bahnazaraŭ zajaviŭ na presavaj kanferencyi, što Bakijeŭ pakinuŭ krainu «z treciaj, nieaficyjnaj žonkaj».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?