U toj čas, jak bolšaść ludziej ź nieciarplivaściu čakaje viasnu, jość takija, što ciarpieć nie mohuć hetuju paru hoda. Bo viasna dla ich źviazana sa ślozami, nasmarkam, čchańniem i drennym samaadčuvańniem. Tak prajaŭlaje siabie siezonnaje alerhičnaje zachvorvańnie palinoz.

Chvaroba ŭźnikaje čaściej za ŭsio ŭ druhoj pałovie krasavika, kali źjaŭlajecca pyłok biarozy, volchi, laščyny, duba, klona, jasienia i niekatorych kustoŭ. Usiaho kala 100 raślin mohuć vyklikać siezonnuju alerhiju. Tamu vielmi važna viedać, na pyłok jakich dreŭ i raślin tak vostra reahuje arhanizm i ŭ suviazi z hetym rabić peŭnyja zachady. Varta źviarnucca da alerhołaha dla taho, kab śpiecyjalist pa‑za siezonam ćvicieńnia raślin pastaviŭ skurnyja proby. I na ich padstavie praz 20 chvilin možna vyznačyć, na jakija alerhieny jość admoŭnaja reakcyja.

Za 10—14 dzion da čakanaha pieryjadu abvastreńnia chvaroby nieabchodna pačynać prymać supraćalerhičnyja, u pryvatnaści, antyhistaminnyja preparaty. Heta mohuć być eryus, zirtek, cełfast, kieścin, supraścin, taviehił, dyjazalin i h.d. Jany dapamohuć davoli paśpiachova spravicca ź simptomami chvaroby.

Va ŭmovach Biełarusi adznačajecca try piki ćvicieńnia raślin i try pieryjady ŭ ciačeńni palinozu,

Pieršy — heta t. zv. draŭlany palinoz, kali ćvituć drevy (kaniec krasavika — maj). U našych krajach asnoŭnymi alerhiennymi drevami źjaŭlajucca biaroza, laščyna, jasień, niaredka tapola. Hety draŭlany palinoz moža spałučacca z charčovaj alerhijaj, inakš kažučy, kali ŭ čałavieka jość alerhija na pyłok dreŭ, to ŭžyvańnie biarozavaha soku, ihruš, usich kostačkavych (čarešni, višni, piersiki, abrykosy, ślivy) moža pryvodzić da abvastreńnia chvaroby. Akramia taho, hetamu mohuć spryjać arechi, asabliva funduk, hreckija arechi, mindal. Niehatyŭnuju reakcyju moža vyklikać navat zvyčajnaja morkva, takaja zielanina, jak sielderej, kmien. Nielha lačycca preparatami ź biarozavych pupyšak, alchovych šyšak, kary krušyny.

Druhi pieryjad — ćvicieńnie złakavych kultur i pustaziella (žyta, cimafiejeŭka, miatlik, ježa i inš.). Jość travy, jakich dastatkova nie tolki ŭ sielskaj miascovaści, ale i ŭ horadzie. Jak praviła, jany ćvituć u pačatku červienia i da siaredziny lipienia. Znoŭ‑taki ŭ hety pieryjad moža mieć miesca charčovaja alerhija. Da abvastreńniaŭ palinozu moža pryvodzić užyvańnie takich praduktaŭ, jak krupianyja kašy, makaronnyja i chlebabułačnyja vyraby, pradukty, u skład jakich uvachodzić muka.

Treci pieryjad pačynajecca z druhoj pałovy lipienia i praciahvajecca da vieraśnia. U hety čas ćvicie składanakvietnaje pustazielle. I asnoŭnaj alerhiennaj travoj źjaŭlajecca pałyn. Znoŭ‑taki ceły šerah praduktaŭ moža padtrymlivać prajavy palinozu. U pryvatnaści, heta alej, chałva, majanez, harčyca, pradukty, pryhatavanyja z vykarystańniem pałynu — viermuty, balzamy. Siudy ž adnosiacca sielderej, krop, piatruška, pierac, muskatny arech, karyca, kalandra, mohuć być i morkva, i burak, i špinat.

Praviły, jakich treba prytrymlivacca, kali ŭ vas jość palinoz:

kali pačyrvanieli i zabaleli vočy, pramyjcie ich chałodnaj vadoj, zrabicie chałodnyja prymočki na tvar abo pratrycie lodam;

starajciesia mienš byvać na soncy i nie zaharajcie, hulajcie ŭ syroje nadvorje, kali pyłok prybivajecca da ziamli;

viasnoj nie karystajciesia tuššu dla viejek, farbaj dla paviekaŭ i inšaj kaśmietykaj;

źmianicie režym dnia (pik utvareńnia pyłku — pamiž 5 i10 hadzinami ranicy), pa mahčymaści płanirujcie vychad z domu na inšy čas sutak;

źviarajciesia z prahnozami nadvorja;

mocny doždž vymyvaje pyłok z pavietra, tamu prahułki paśla daždžu najbolš pažadanyja;

aścierahajciesia suchich vietranych dzion, kali pyłok moža być asabliva intensiŭnym;

karystajciesia maskaj padčas pracy ŭ dvary — maska moža zabiaśpiečyć efiektyŭny barjer pamiž pyłkom i miembranami ślizistaj abałonki;

duš i źmiena adzieńnia — dobry srodak ad pyłku, jaki, mahčyma, sabraŭsia ŭ vałasach i tkankach, pakul vy byli na vulicy;

myjcie hałavu na noč. Kupajcie chatnich žyviolin, jakija časta byvajuć na vulicy. Nie sušycie adzieńnie na śviežym pavietry.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?