Vyjšła z druku 18‑ia kniha sieryi «Biblijateka Baćkaŭščyny». Heta daśledavańnie historyka Natalli Hardzijenki «Biełarusy ŭ Vialikabrytanii».
U vydańni razhladajecca historyja biełaruska‑brytanskich kantaktaŭ, šlachi i matyvy pryjezdu naradžencaŭ biełaruskich ziemlaŭ u Vialikabrytaniju. Najbolšaja ŭvaha nadajecca dziejnaści paślavajennaj chvali biełaruskaj imihracyi ŭ hetaj krainie. Padrabiazna razhladajecca historyja asobnych arhanizacyj biełarusaŭ: Zhurtavańnia biełarusaŭ u Vialikabrytanii, CHABR Anhła‑biełaruskaha tavarystva, Biełaruskaj biblijateki imia F. Skaryny i inšych. Admysłovaja ŭvaha nadajecca relihijnamu žyćciu biełarusaŭ, historyi asobnych pravasłaŭnych parafij, dziejnaści Biełaruskaj katalickaj misii ŭschodniaha abradu.
«Biełarusy ŭ Vialikabrytanii» — pieršaja ahulnaja daśledčaja praca, pryśviečanaja roznym aśpiektam biełaruskaj prysutnaści ŭ hetaj krainie.
Ideja stvareńnia takoj knihi naradziłasia ŭ 2005 h. u siabroŭ Zhurtavańnia biełarusaŭ u Vialikabrytanii ŭ tym liku i pa aznajamleńni ź pieršaj knihaj aŭtara - «Biełarusy ŭ Aŭstralii». U arhanizacyi zachavaŭsia značny archiŭ, što patrabavaŭ vyvučeńnia. I mienavita na padstavie infarmacyi z hetaha, a taksama inšych archivaŭ i fondaŭ Biełaruskaj biblijateki imia F. Skaryny ŭ Łondanie była napisana kniha.
Kniha Natalli Hardzijenki — heta sapraŭdnaja encykłapiedyja biełaruskaha žyćcia ŭ Vialikabrytanii. Pačytać jaje cikava budzie nie tolki navukoŭcam, ale i ŭsim, chto cikavicca ajčynnaj historyjaj, biełaruskaj prysutnaściu ŭ śviecie i lubić čytać pra vandroŭki. Da słova pra vandroŭki, kniha «Biełarusy Vialikabrytanii» moža z pośpiecham vykarystoŭvacca ŭ jakaści turystačnaha dapamožnika tymi, chto źbiarecca ŭ padarožža na Brytanskija vyspy.
U kancy knihi źmieščany daviednik pa biełaruskich miaścinach u Vialikabrytanii.
A takich miescaŭ u hetaj krainie šmat. «Heta i Parłamient, jaki naviedvali i raniejšyja dypłamaty, i pradstaŭniki Rečy Paspalitaj, takija jak Stanisłaŭ Paniatoŭski, i dzie paźniej ładzilisia admysłovyja pryjomy ŭ honar biełarusaŭ i 25 Sakavika. Heta i Brytanski muziej, dzie zachoŭvajucca vydańni Francyska Skaryny, łondanskija knihi Alaksandra Rypinskaha i šmat inšaha. Heta i Albert‑Choł dy zała Uestminstarskaj katedry, dzie vystupali biełarusy, u tym liku słavuty Piotra Koniuch», — piša aŭtarka ŭ pradmovie da daviednika pa biełaruskich miaścinach.
A jašče ŭ Vialikabrytańni niamała biełaruskich miescaŭ, stvoranych samimi biełarusami. Akramia taho, u knizie pradstaŭleny źviestki pa biełaruskich mohiłkach u Vialikabrytańni, a taksama padadzienyja bijahrafii biełaruskich dziejačaŭ, čyjo žyćcio źviazana z hetaj krainaj.
Prezientacyja knihi adbudziecca 17 krasavika ŭ Biełaruskim domie ŭ Łondanie (52, Penn Road, London).
***
Biełarusy ŭ Vialikabrytanii / Natalla Hardzijenka ; pad red. A. Hardzijenki. – — Minsk : Miedysont, 2010. — 620 s. — (Biblijateka Baćkaŭščyny ; kn. 18).
***
Knihu možna nabyć u nastupnych minskich kramach:
«Kniharnia piśmieńnika», vuł. Kazłova, 2, teł.: 2849061, pism.belkniga.by
«Akademkniha», pr. Niezaležnaści, 72, teł.: 2920052 akademkniga.by
«Kniharnia «Eŭryka», vuł. Kujbyšava, 75, teł./faks: 2920067, evrica.belkniga.by
Siadziba TBM, vuł. Rumiancava, 13, teł.: 2848511
Uprava BNF, vuł. Varvašeni, 8, teł.: 2133008, 2845012
«Dom knihi «Viedy», vuł. K. Marksa, 36, teł./faks: 2261090, znanie.belkniga.by
KniharniaŬhalerei, pr. Niezaležnaści, 37A, teł. 2906306, ygallery.by
Krama «Podziemka», pr. Niezaležnaści, 43.
