NN praciahvaje razhladać słabyja i mocnyja baki patencyjnych kandydataŭ u prezidenty ad apazicyi. Aleś Michalevič byŭ pieršym, chto zajaviŭ pra svoj udzieł u kampanii‑2011.
1. Maładość
+ «Prezidenckaha» cenzu (35 hadoŭ) Aleś Michalevič dasiahnie tolki ŭ mai. Užo ciapier možna śmieła havaryć, što heta budzie samy małady kandydat na vybarach. Uzrost daje Michaleviču bolšuju mabilnaść. Jon prahmatyčny, jahonaja rytoryka nie zvodzicca tolki da losu movy ci adkrytaj kanfrantacyi z uładaj Łukašenki. Jon jašče nie stomleny ad palityki, jak niekatoryja jahonyja siabry‑kankurenty pa demakratyčnym łahiery.
— Ale ŭzrost moža być nie tolki stanoŭčym faktaram, ale i admoŭnym. «Małady, kudy jamu jašče ŭ prezidenty», — padumaje niejki vybarščyk. «Dośviedu mała, niachaj spačatku papracuje na mienš adkaznaj pasadzie», — dadaść druhi. Zrešty, maładyja hady (39 hadoŭ) u 1994 nie pieraškodzili Łukašenku stać pieršym prezidentam Biełarusi.
2. Praca ź ludźmi
+ Michaleviču niama roŭnych u biełaruskaj palitycy ŭ pracy z čałaviekam u farmacie «tet‑a‑tet». Zamiest telefonnych ci internet‑razmovaŭ Aleś zaŭsiody addaść pieravahu asabistaj sustrečy. Viedańnie ludskoj psichałohii pryvodzić da taho, što surazmoŭcy Michaleviča amal zaŭsiody zhadžajucca ź jahonymi arhumientami. Michalevič, padobna pavuku, niezaŭvažna rasploŭ svaju pavucinu ŭ rehijonach. Za im stajać aktyvisty ŭ nievialikich haradach, kštałtu Smalavičaŭ, Horak, Haradka, Śvietłahorska. U stalicy ž vialikaj padtrymki palityk pakul nie maje, a Minsk daje bolšaść sabranych za kandydata podpisaŭ. Naprykład, u 2006 hodzie Kazulin sabraŭ u Minsku 50 sa 150, a Milinkievič — 60 z 200 tysiač podpisaŭ u svaju padtrymku.
— Pra Michaleviča jak publičnaha palityka viadoma mała. Jon mocny ŭ cieniavoj pracy, u davierlivych kantaktach z adnadumcami ci z zachodnimi donarskimi arhanizacyjami. Kali ž Michalevič idzie na vybary, to choćki‑niachoćki daviadziecca vychodzić ź cieniu.
3. Adukacyja
+ U Alesia Michaleviča dobraja adukacyja. Jon byŭ adnym ź pieršych vypusknikoŭ Liceja imia Jakuba Kołasa. Skončyŭ BDU pa śpiecyjalnaści «palitałohija». Potym stažyravaŭsia ŭ Varšaŭskim i Oksfardskim univiersitetach. Vučyŭsia ŭ aśpirantury Instytuta dziaržavy i prava Akademii navuk. Michalevič razmaŭlaje pa‑anhlijsku, što dla biełaruskaj palityki nie takaja častaja źjava.
— Zrešty, tołku ad toj adukacyi, kali praktyčna ŭsio śviadomaje žyćcio Michalevič źjaŭlajecca biespracoŭnym. Heta adrazu adšturchoŭvaje ad takoha kandydata častku elektaratu. Na fonie Michaleviča Sańnikaŭ i Milinkievič vyhladajuć u bolš vyhadnaj situacyi, bo ŭ svoj čas papracavali na salidnych pasadach.
4. Sacyjalnyja sietki
+ Tut Michaleviča možna ličyć pieršaprachodcam siarod biełaruskich palitykaŭ. Jon pieršym zavioŭ sabie internet‑dziońnik. Moža, akurat tamu biełaruskaja błahaśfiera stavicca da palityka dosyć pryjazna. Jon tam «svoj» čałaviek, jakomu možna pazyčyć pośpiechaŭ ci paspračacca. Taksama Aleś aktyŭničaŭ na takich papularnych resursach, jak vkontakte.ru, «Adnakłaśniki» i facebook.
— Za Michalevičam ciahniecca šlejf kanfliktaŭ i skandałaŭ. Jašče ŭ 2006 hodzie, napiaredadni tych prezidenckich vybaraŭ, palityka złavili na miažy z Rasijaj z nakładam falšyvaj «Sovietskoj Biełoruśsii». Tady spravu na Michaleviča tak i nie zaviali. A ŭ 2008 hodzie tahačasnaha namieśnika staršyni Partyi BNF Alesia Michaleviča vyklučyli z arhanizacyi za niepadparadkavańnie partyjnaj dyscyplinie.
5. Hołas
+ Naturalnaja biełaruskaść. Dla Michaleviča biełaruskaja mova nie jość «pracoŭnaj», na joj jon havoryć i doma, i paŭsiul. Upieršyniu paśla Paźniaka i Šuškieviča my budziem mieć nastolki biełarusacentryčnaha kandydata.
— U Michaleviča nie kamandny hołas. Nie taki, kab kožnaje jahonaje słova z zamirańniem serca łaviłasia na šmattysiačnym mitynhu. Hołas nie pastaŭleny, słaby, nadryŭny. Zrešty, i kaściumy na Michaleviču siadzieli nie lepšym čynam, ale z časam palityk navučyŭsia apranacca, kali nie biezdakorna, to blizka da hetaha.
