Paet Uładzimir Niaklajeŭ zajaviŭ ab starcie hramadskaj kampanii «Havary praŭdu». Padkreślivajecca, što hetaja inicyjatyva niepalityčnaja. Tym nie mienš, Uładzimir Niaklajeŭ praciahvaje razhladacca jak patencyjny kandydat u prezidenty. Jakija mocnyja i słabyja baki hetaha kandydata?
Fota Julii Daraškievič.
1. Zdolny abjadnać
+ Niaklajeŭ maje pryjaznyja adnosiny z bolšaściu apazicyjnych palitykaŭ. Jon nikoli nie haniŭ apazicyju za biaździejnaść, iniertnaść, słabaść. Naadvarot, havaryŭ pra toje, što jana robić usio, na što zaraz zdolnaja. U Niaklajeva narmalnyja stasunki ź Milinkievičam, Kazulinym, Barščeŭskim. Navat z Paźniakom jany paru hadoŭ nazad sustrakalisia ŭ Varšavie. Pry peŭnych raskładach Niaklajeŭ moh by stać tym čałaviekam, što abjadnaŭ by apazicyju. Jahonaja asoba nie vyklikaje adčužeńnia jak u nacyjanalistaŭ, tak i kamunistaŭ.
— U Niaklajeva niama samastojnaha dośviedu ŭdziełu ŭ palitycy. Jon braŭ udzieł u vybarčych kampanijach Uładzimira Hančaryka i Alaksandra Kazulina. (Zaŭvažym, nie Domaša i Milinkieviča.) Tym nie mienš, zastavaŭsia tam na druhich rolach. Rolu pieršasnuju ŭ palitycy Niaklajeŭ vykonvaje ŭpieršyniu, tamu pamyłki buduć niepaźbiežnymi. Zrešty, jość dośvied sa śfiery kultury. Niejki čas Niaklajeŭ uznačalvaŭ Sajuz piśmieńnikaŭ i PEN‑Centr.
2. Emacyjnaść
+ Pa enierhietycy vystupaŭ i emacyjnaści znajści roŭnaha Niaklajevu ŭ biełaruskaj palitycy budzie ciažka. Paet viedaje, jak zavabić publiku, prymusić jaho słuchać, kab ludzi hłytali kožnaje jahonaje słova. Kaliści jon vioŭ telepieradaču. A vystup na vuličnaj akcyi dla šmattysiačnaha natoŭpu — heta stychija Niaklajeva.
— Emocyi nie zaŭsiody hrajuć stanoŭčuju rolu. Niaklajevu nie zaŭsiody chapaje pačućcia taktoŭnaści i vytrymanaści. Razam z tym, Niaklajeŭ maje ćviordy charaktar.
3. Hrošy
+ Kali Niaklajeŭ pojdzie ŭ prezidenty, jahonaja kampanija budzie rabicca na biełaruskija hrošy. Dziaržaŭnyja ŚMI nie zmohuć papiknuć kandydata, što jon žyvie za košt zachodnich hrantaŭ.
— Razam z tym, usio jašče nieviadoma, što ž za «niabiednyja» ludzi stajać za Niaklajevym. Jość sumnievy, što Uładzimir Prakopavič sam vyjšaŭ na hetych fundataraŭ. Kali nie jon, to chto? Kazulin? Niechta z pradstaŭnikoŭ namienkłatury? Niaklajeŭ pakul nie ahučyŭ vyraznuju palityčnuju pazicyju. Jon za dyjałoh z uładaj ci za sankcyi? Za sajuz z Rasijaj ci za ŭstupleńnie ŭ Jeŭrasajuz?
4. Ź intelihiencyi
+ Padtrymka intelihiencyi. Za «Havary praŭdu» padpisalisia viadomyja i aŭtarytetnyja ŭ krainie ludzi. Takija, jak Ryhor Baradulin, Hienadź Buraŭkin, Zinaida Bandarenka. Padtrymka takich asobaŭ adrazu dadaje Niaklajevu lišnich punktaŭ. Intelihiencyja padtrymaje paeta, čyje vieršy da hetaha času jość u školnaj prahramie.
— Razam z tym, raźličvać na aktyŭnuju padtrymku intelihiencyi Niaklajeŭ moža naŭrad. Heta chutčej maralnaja simvaličnaja dapamoha. Sam Niaklajeŭ u niadaŭnim intervju «NN» havaryŭ, što čas udziełu intelihiencyi ŭ palityčnaj baraćbie minuŭ. Prezidenckuju ž kampaniju robiać daśviedčanyja aktyvisty i moładź. Ci budzie moładź pracavać na Niaklajeva, skazać ciažka.
5. Paznavalnaść
+ Paznavalnaść. Viadomaść Niaklajeva nie mienšaja, čym u lideraŭ apazicyi. Doŭha tłumačyć, chto taki Uładzimir Niaklajeŭ, vybarcam nie daviadziecca. «Heta toj, što «Siońnia ŭ našaj chacie śviata» napisaŭ», — možna ŭspomnić jašče ź dziasiatak vieršaŭ paeta, što stali chitami.
— Sumnieŭnaje minułaje. Za Niaklajevym ciahniecca chvost skandalnaha minułaha. U 1999 hodzie jon byŭ vymušany źjechać z krainy. Heta było źviazana ź jahonym kanfliktam z unter‑ideołaham Zamiatalinym. Praź niejki čas paet usio ž viarnuŭsia na Radzimu. Nijakich nastupstvaŭ nie było. Tym nie mienš, kampramat na Niaklajeva‑kandydata ŭ prezidenty moža być znojdzieny.
