Ukraincy pa-raniejšamu składajuć pieršuju pa kolkaści hrupu zamiežnikaŭ u Litvie. Ale kali ŭ pačatku hoda ŭ krainie ich było bolš za 86 tysiač, to ŭ kancy sakavika stała krychu bolš za 74 tysiačy, piša BNS.
«Na druhim miescy biełarusy, jany ŭsio jašče rastuć, ale ŭ apošnija miesiacy ich rost zapavoliŭsia. Heta źviazana z bolš strohimi pravierkami, jakija my pravodzim, a taksama z tym, što pracadaŭcy aryjentujucca na inšyja krainy», — kaža dyrektar Departamienta mihracyi Evielina Hudzinskajcie.
U kancy sakavika ŭ Litvie było zarehistravana amal 63 tysiačy biełarusaŭ z DNŽ. U paraŭnańni z 1 studzienia minułaha hoda kolkaść našych suajčyńnikaŭ vyrasła amal na 29 pracentaŭ.
Kolkaść rasijskich hramadzian u Litvie zastajecca stabilnaj — krychu bolš za 15 tysiač.
Pa słovach dyrektara Departamienta mihracyi, pozirki litoŭskich kampanij u pošukach patencyjnych supracoŭnikaŭ źmiaścilisia ź Biełarusi i Ukrainy na Siaredniuju Aziju i Indyju.
«Uźbiekistan, Kyrhyzstan, Tadžykistan i Kazachstan — novyja krainy, ź jakich pracadaŭcy viazuć pracoŭnuju siłu. (…) Bolšaść z Uźbiekistana», — skazała E.Hudzinskajcie.
Tak, kolkaść uźbiekaŭ vyrasła za apošni čas z 1800 da 9700. Hramadzianie Kyrhyzstana na pačatak hoda naličvajuć amal 2 tysiačy, kolkaść hramadzian Tadžykistana vyrasła da 6,3 tysiačy, Indyi da 5,2 tys. Ale značnuju častku indusaŭ składajuć studenty.
Bolšaja častka pryjezdžych z Centralnaj Azii — heta nizkakvalifikavanyja rabočyja, jakija pryjazdžajuć pracavać kiroŭcami i budaŭnikami.
Tady jak u Litvie pražyvaje bolš za 6000 vysokakvalifikavanych zamiežnikaŭ, u asnoŭnym hramadzianie Biełarusi i Rasii, jakija pracujuć u IT-kampanijach.
Čytajcie taksama:
Biełarusam u Vilni zvoniać i prosiać pakinuć Litvu. Što adbyvajecca?
