Jury Karajeŭ Jurij Karajev Yuriy Karaev

Jury Karajeŭ padčas razmovy ź dziećmi. Skryn videa tvr.by / YouTube

U pieradačy «100 pytańniaŭ darosłamu» na BT Karajeva raspytvali padletki. 

Ci jość u Karajeva achoŭnik

Čynoŭnik zaŭvažyŭ, što na ciapierašniaj pasadzie jon nie karystajecca achovaj. «Ja lublu chadzić pa centralnych vulicach pieški, pahladzieć, jak toj kazaŭ, jak žyvie narod».

Karajeŭ kaža, što jaho časta paznajuć i časam padychodziać z pytańniam ci prablemami. Zdarajecca, što ludzi pytajucca, ci možna zapisacca na pryjom. Byvajuć vypadki, kali ludzi zhadvajuć, što słužyli sami ci ich syny razam ź im u niejkim miescy. Ale ŭ asnoŭnym padychodziać, kab pavitacca ci sfatahrafavacca, pierakinucca paraj słovaŭ.

Ci składana prasić prabačeńnia

Pa słovach Karajeva, jamu zusim nie składana prasić prabačeńnia. Jon heta tłumačyć tym, što «prasić prabačeńnia nie mohuć tolki ludzi, u jakich jość taki hrech, jak hordaść». «Napeŭna, ja im nie vałodaju. I paprasić prabačeńnia, jak mnie zdajecca, nie pavinna być składanaj spravaj dla luboha narmalnaha čałavieka. Heta, jak mnie padajecca, naturalna».

Karajeŭ raspavioŭ, kali jon apošni raz prasiŭ prabačeńnia: «Zajšoŭ niadaŭna ŭ atelje ŭšyć detal u kaściumie, i žančyna kaža: «O, a ja vas viedaju. Dva hady nazad vy na mianie nasvarylisia». Ja pytajusia, jak ja nasvaryŭsia. Vyśvietlili, jak heta było. Jana na vulicy mianie spyniła i vykazvała nieabhruntavanyja pretenzii na adras uładaŭ. Jana sama była na ŭzvodzie, bo ŭ jaje adbyłosia niaščaście, źviazanaje z COVID. Nu voś my ciapier ubačylisia. I jana kaža, što choča ŭ mianie prabačeńnia paprasić. Nu i ja skazaŭ, što prašu prabačeńnia, kali niejak nie tak adkazaŭ».

U žniŭni 2020 hoda, paśla źbićcia pratestoŭcaŭ, Karajeŭ vybačaŭsia ŭ efiry ANT. Ale nie pierad usimi:

«Ja biaru adkaznaść i prynošu prabačeńni za traŭmy vypadkovych ludziej na pratestach, jakija trapili pad razdaču».

Pytańnie, na jakoje čynoŭnik nie staŭ adkazvać, — pra pamyłku, za jakuju dahetul škaduje.

Ci zmoža rukoj raźbić cahlinu

Na pytańnie, ci zmoža rukoju raźbić cahlinu, Karajeŭ adkazaŭ, što nie zmoža i nikoli nie sprabavaŭ takoje rabić. «Nie liču heta vializnaj dobleściu. Razumieju, što karateki robiać heta dla ŭmacavańnia duchu i cieła. Zachaplajusia imi, ale nie liču heta karysnym dla zdaroŭja, sustavaŭ, nadkośnicy», — vykazaŭ svajo mierkavańnie były śpiecnazavac i dadaŭ, što na ŭsich pakaznych mierapryjemstvach imknuŭsia hety elemient prybrać.

«Kali bajcy kazali: «Davajcie pakažam dzieciam, uradu, haściam, jak my raźbivajem cahliny», — ja dakazvaŭ: «Heta rozumu nie dadaje» (kali hałavoju). I kułaku heta karyści taksama nie pryniasie. Navošta kułakom raźbivać cahlinu? Dla hetaha možna ŭziać kuvałdu

Jakija knihi čytaje. «Ni Daŭłatava, ni Markiesa»

Adna ź dziaŭčat u studyi spytała ŭ Karajeva, jakija knihi jon zvyčajna biare — Daŭłatava ci Markiesa?

Na heta pytańnie čynoŭnik adkazaŭ, što nivodnaha ź ich nie čytaŭ: «Ja ŭvohule čałaviek taki knižny, jaki čytaje. Ale ni Siarhieja Daŭłatava ni Habryela Markiesa ja nie čytaŭ. Niejak voś prajšło mima majoj uvahi».

Karajeŭ raspavioŭ, što ciapier jon pieračytvaje «Załatoje ciala» Ilfa i Piatrova, a na tumbačcy kala łožka ŭ jaho nibyta lažyć Amar Chajam. A ŭ tym miescy, dzie jon žyvie ŭ Hrodnie, — «Padniataja calina» Šołachava.

Jakuju muzyku lubić słuchać

Na pytańnie pra lubimuju muzyku Karajeŭ adkazaŭ, što słuchaje papularnyja radyjostancyi. «Tam usio — ad chitoŭ nulavych hadoŭ da Paliny Haharynaj. Ad sučasnych biełaruskich vykanaŭcaŭ da «Pieśniaroŭ», starych narodnych pieśniaŭ».

Siarod lubimych pieśniaŭ nazvaŭ «Vals baston» i «Čarha pa chleb» Razienbauma. I dadaŭ, što lubić narodnyja pieśni, pieśni kazakoŭ i hurta «Lube». U jakaści dokazu praśpiavaŭ kuplet pieśni hurta «Lube» «Koń».

Nahadajem, na kancercie ŭ Hrodnie da 9 Maja Karajeŭ razam z Karanikam śpiavali z rasijskim śpievakom Aleham Hazmanavym pieśniu «Dień Pobiedy». 

Dzie pracujuć dzieci

Karajeŭ kaža, što chacieŭ, kab syny słužyli ŭ siłavych strukturach, ale tyja abrali inšaje.

Jaho starejšy syn zajmajecca trenierskaj rabotaj pa karate. Jon viadzie zaniatki ŭ niekalkich hrupach dziaciej 1-4 kłasaŭ.

«Jon lubić ich navučać, vychoŭvać. I ŭ jaho heta dobra atrymlivajecca. Navat baćki časam zvoniać i prosiać, kab trenier uhavaryŭ dzicia pajeści kašy», — raskazaŭ Karajeŭ.

Małodšy syn — supracoŭnik stadyjona «Dynama».

Ci karystalisia syny jaho suviaziami? Karajeŭ śćviardžaje, što małodšy «naohuł paźbiahaje razmovy [pra dapamohu], jon zaŭsiody trymaŭ u tajamnicy, chto jaho baćka». A voś starejšy syn časam prasiŭ dapamohi ŭ vyrašeńni «niejkich trenierskich pytańniaŭ», i baćka jamu dapamahaŭ.

«Ale ničoha takoha, kab było. U intaresach ahulnaj spravy. Jon vydatna viedaje, što dla mianie dzieści prajavić svaju ŭładu, vykarystać znajomstva — tabu. Ja starajusia hetym nie karystacca», — śćviardžaje były siłavik.

Čytajcie jašče:

Kačanava nie hatovaja być prezidentam, u jaje niepieraadolnaja pieraškoda

Saładucha raskazaŭ, kolki zarabiŭ na pieśni «Zdravstvuj, čužaja miłaja». Suma niemaleńkaja

Karajeŭ abvinavaciŭ biełarusaŭ tymi ž słovami, jakimi Hitler abvinavačvaŭ jaŭrejaŭ i marksistaŭ

Клас
4
Панылы сорам
9
Ха-ха
9
Ого
3
Сумна
1
Абуральна
27

Chočaš padzialicca važnaj infarmacyjaj ananimna i kanfidencyjna?