Hieorhij Kandraćjeŭ — krajni źleva. Fota: abff.by

Hieorhij Kandraćjeŭ — krajni źleva. Fota: abff.by

Kandraćjeŭ ličyć, što fiederacyja nie dała jamu vyvieści zbornuju na Jeŭra, a tamu choča amal 100 tysiač jeŭra kampiensacyi

Na pasadzie hałoŭnaha treniera zbornaj Biełarusi Hieorhij Kandraćjeŭ pratrymaŭsia 701 dzień (z 28 lipienia 2021-ha da 29 červienia 2023-ha) i paśpieŭ za hety čas pravieści 21 matč usich uzroŭniaŭ (aficyjnych i tavaryskich). Pry hetym tolki ŭ adnoj z 17 aficyjnych sustreč «nacyjanałka» zdoleła pieramahčy — 19 červienia 2023-ha była abyhranaja zbornaja Kosava 2:1. Pa ironii losu, akurat hety matč i staŭ dla Kandraćjeva apošnim na pasadzie.

Praz 10 dzion paśla jaho adbyŭsia vykankam ABFF. Na im musiŭ prysutničać i Kandraćjeŭ, adnak da zały pasiedžańniaŭ śpiecyjalist tak i nie dajšoŭ. Jak paźniej stała viadoma, za paŭhadziny da pačatku vykankama Kandraćjeva i jahonych pamočnikaŭ da siabie ŭ kabiniet vyklikaŭ staršynia fiederacyi Mikałaj Šarśnioŭ i abjaviŭ, što ABFF spyniaje ź imi pracoŭnyja adnosiny. Sam Kandraćjeŭ potym kazaŭ, što dla jaho heta byŭ šok i što jon uvohule ničoha nie zrazumieŭ.

Paźniej pieršy namieśnik Šarśniova Andrej Vasilevič kazaŭ, što ŭ ABFF «paličyli, što treba, kab čałaviek syšoŭ hodna i, mahčyma, paśla tvorčaj paŭzy prynios jašče karyść našamu futbołu».

Kandraćjeŭ, adnak, hodnaj svaju adstaŭku nie paličyŭ i praź niekalki miesiacaŭ paśla jaje vyrašyŭ sudzicca ź fiederacyjaj futboła. Pry hetym padrabiaznaściaŭ adnosna hetaj situacyi vielmi mała. Jak vyśvietliła «Trybuna»,

Kandraćjeŭ niekatory čas tamu padaŭ u sud Centralnaha rajona Minska pazoŭ da byłoha pracadaŭcy. Jak udałosia daviedacca, trenier maje namier adsudzić u fiederacyi zarobak, jaki naležała atrymać pa kantrakcie da kanca terminu jahonaha dziejańnia.

U listapadzie 2022-ha na vykankamie ABFF było zaćvierdžana, što supraca z Kandraćjevym praciahniecca, a tamu, pavodle źviestak «Trybuny», pahadnieńnie, jakoje zakančvałasia ŭ śniežni 2022-ha, praciahnuli da kanca 2023-ha.

Ciapier ža śpiecyjalist ličyć, što jamu naležyć kampiensacyja za tyja miesiacy, jakija jon niedapracavaŭ pa kantrakcie pa rašeńni ABFF. A heta, miž inšym, paŭhoda.

Što da pamieru kampiensacyi, to jana naličvaje dziasiatki tysiač dołaraŭ.

Jak paviedamlała raniej «Trybuna», zarobak u Kandraćjeva ŭ zbornaj byŭ 15 tysiač dołaraŭ da spłaty padatkaŭ. Adpaviedna, ciapier trenier choča spahnać z ABFF 90 tysiač dołaraŭ «brudnymi».

Pry hetym, pavodle źviestak «Trybuny», paśla zvalnieńnia Kandraćjeŭ sudom ABFF nie pahražaŭ. Jak paźniej raskazvaŭ sam śpiecyjalist, jon 4 lipienia spačatku zjechaŭ u Polšču, dzie sustreŭsia z dačkoj, a paśla adpraviŭsia na adpačynak u Bałharyju. Viarnuŭsia trenier u Biełaruś u vieraśni, a nieŭzabavie paśla taho, jak vyhladaje, i zapuściŭ razborki z ABFF.

Fiederacyju pra namier iści ŭ sud Kandraćjeŭ, nakolki viadoma, nie papiaredžvaŭ. Bolš za toje, nijakich dakumientaŭ z suda ci ad Kandraćjeva z patrabavańniami ŭ ABFF taksama nie prychodziła. 

Pa źviestkach «Trybuny», trenier dahetul nie padpisaŭ dakumienty ab zhodzie spynić supracu z ABFF. Taksama jon, maŭlaŭ, ličyć, što jamu nie dali vykanać nibyta pastaŭlenuju zadaču — zavajavać pucioŭku na čempijanat Jeŭropy-2024. Pieramoha nad Kosavam pakidała tearetyčnyja šancy na taki vynik.

Łohika ŭ śpiecyjalista takaja: raz nie dali vykanać zadaču i skasavali kantrakt — kali łaska, płacicie. Pry hetym aficyjna takaja zadača ŭ kantrakcie Kandraćjeva, pa źviestkach «Trybuny», prapisanaja nie była.

U 2017 hodzie ź fiederacyjaj pa padobnaj spravie sprabavaŭ sudzicca inšy były trenier nacyjanalnaj futbolnaj zbornaj — Alaksandr Chackievič. Ale pośpiechu jamu heta nie pryniesła. Jak kažuć funkcyjaniery ź biełaruskaha futboła, ź jakimi «Trybuna» pahutaryła na ŭmovach ananimnaści, i ŭ Kandraćjeva šancaŭ na toje, što zaraz udasca spahnać z ABFF jakuju-niebudź kampiensacyju, praktyčna niama.

Čytajcie taksama:

Ministr sportu stvaraje alternatyŭnuju fiederacyju futboła, bo nie moža ŭpłyvać na ABFF — Trybuna

Pryznačany novy hałoŭny trenier zbornaj Biełarusi pa futbole. Papiarednim miescam jaho pracy była zbornaja Ruandy

«Mnie spadabałasia: pravilna hulali» — hałoŭny trenier pra matč z Kosava

Клас
3
Панылы сорам
5
Ха-ха
20
Ого
3
Сумна
0
Абуральна
2