Vyručka

Za lipień-vierasień EPAM atrymaŭ 1,15 miljarda dalaraŭ vyručki — prykładna stolki, kolki i płanavałasia. Ale heta minimalnaja kvartalnaja vyručka sioleta. Akramia taho, jana mienšaja, čym u trecim kvartale letaś.

EPAM skaračaje vyručku ŭžo dva kvartały zapar, pry hetym raście temp padzieńnia jak u hrošach, tak i pracentach.

Kali ŭ druhim kvartale vyručka źniziłasia adnosna takoha ž kvartała 2022 hoda na 25 miljonaŭ dalaraŭ, abo na 2%, to ŭ trecim kvartale — užo na 75 miljonaŭ dalaraŭ, abo na 6%.

Vyručka EPAM u 2022—2023 hadach

U vyniku za dzieviać miesiacaŭ vyručka EPAM upała ŭ paraŭnańni z takim ža pieryjadam minułaha hoda bolš čym na 1,5% abo na 60 miljonaŭ dalaraŭ i skłała 3,53 miljarda dalaraŭ.

Uličvajučy ŭ tym liku situacyju na rynku kampanija čakaje atrymać pa vynikach usiaho 2023 hoda 4,66-4,67 miljarda dalaraŭ vyručki. Heta na 3% abo na 160-170 miljonaŭ dalaraŭ mienš, čym pa vynikach minułaha hoda, jaki staŭ dla kampanii rekordnym pa pamiery atrymanaj vyručki.

Čysty prybytak

U trecim kvartale ŭpaŭ i čysty prybytak kampanii. Kali ŭ lipieni-vieraśni minułaha hoda kampanija atrymała 156 miljonaŭ dalaraŭ čystaha prybytku, to ciapier za hety ž pieryjad — 97 miljonaŭ dalaraŭ ci amal na 40% mienš.

Miarkujučy pa spravazdačnaści, na čystym prybytku admoŭna adbiłasia źnižeńnie dachodu kampanii ad apieracyjnaj dziejnaści. Za treci kvartał dachod skłaŭ 114 miljonaŭ dalaraŭ — na 36% mienš, čym u trecim kvartale 2022 hoda. Jak skazana ŭ spravazdačnaści, apieracyjnyja dachody ŭpali z-za strat ad prodažu pakinutych aktyvaŭ u Rasii ŭ pamiery 25,9 miljona dalaraŭ.

U pačatku žniŭnia stała viadoma, što EPAM pradaŭ rasijskuju jurasobu TAA «Epam Sistemz» rasijskaj hrupie «Reksoft». Suma ŭhody nie ahučvałasia.

Usiaho za dzieviać miesiacaŭ EPAM atrymaŭ 319,5 miljona dalaraŭ čystaha prybytku — na 21% bolš, čym za taki ž pieryjad minułaha hoda.

Vydatki na rełakiejt

Pavodle infarmacyi supracoŭnikaŭ EPAM, u kampanii sioleta rełakiejt faktyčna zamarožany. Heta adlustroŭvajecca i ŭ finansavaj spravazdačnaści. Za dzieviać miesiacaŭ kampanija vydatkavała na rełakacyju ŭsiaho kala 900 tysiač dalaraŭ. Za taki ž pieryjad minułaha hoda vydatki byli ŭ 40 razoŭ bolšyja — 37,5 miljona dalaraŭ.

Hłabalny štat

Na minułym tydni EPAM paviedamiŭ supracoŭnikam biełaruskaha ofisa ab skaračeńni 2% kamandy. Pavodle našaj infarmacyi heta nie pieršaje zvalnieńnie śpiecyjalistaŭ u Biełarusi za apošnija miesiacy. Akramia taho kampanija skaračaje piersanał i ŭ inšych łakacyjach, što vidać u tym liku i pa spravazdačnaści.

Pa danych kampanii, na kaniec vieraśnia va ŭsich łakacyjach EPAM pracavała 54,6 tysiačy śpiecyjalistaŭ. Za treci kvartał hłabalny štat skaraciŭsia amal na 2%, a z pačatku hetaha hoda amal na 10% abo na 5 tysiač śpiecyjalistaŭ (na kaniec 2022 hoda ŭ kampanii pracavała 59,3 tysiačy čałaviek).

Štat supracoŭnikaŭ EPAM va ŭsich łakacyjach u śviecie (tysiač čałaviek)

Praciahvaje skaračacca i štat vytvorčych śpiecyjalistaŭ u EPAM. Na kaniec vieraśnia ich było 48,5 tysiačy va ŭsich łakacyjach (52,9 tysiačy — na kaniec 2022 hoda).

Čytajcie taksama:

«Ciažkoje rašeńnie». EPAM zvolnić častku kamandy ŭ Biełarusi

Za hod aktyvy EPAM u Biełarusi skaracilisia na 17%

EPAM abyšła Wargaming pa vypłacie padatkaŭ u Litvie

Клас
3
Панылы сорам
1
Ха-ха
1
Ого
2
Сумна
13
Абуральна
2