Biełarusbank

Najbujniejšy bank Biełarusi robić pieravody ŭ Polšču ŭ jeŭra i dalarach ZŠA.

Kamisija za pieravod pa numary rachunku składaje 2% ad sumy, ale nie mieniej za 100 biełaruskich rubloŭ. SWIFT-płaciež ažyćciaŭlajecca pa pašparcie ŭ adździaleńni banka.

Dadatkova treba budzie zapłacić 8 rubloŭ za płaciežnaje daručeńnie. Sam Biełarusbank nie maje abmiežavańniaŭ na adpraŭku hrošaj, ale dakładna daviedacca, ci dojduć jany, možna budzie tolki paśla taho, jak u Biełarusbanku pravierać heta pa rekvizitach banka atrymalnika.

Pry pieravodzie z kartki na kartku spahaniajuć kamisiju ŭ pamiery 2,5% ad sumy pieravodu.

Pry pryjomie hrošaj z Polščy ŭ Biełaruś kamisija składaje 1% ad sumy pry pieravodzie na rachunak i 1,5% pry pieravodzie na kartku.

Alfa-Bank

Pieravody ŭ Polšču ažyćciaŭlaje taksama Alfa-Bank. Adzinaja dasiažnaja valuta dla pieravodu — jeŭra. SWIFT-pieravody ad hetaha biełaruskaha banka prymajuć tolki dva polskija: najbujniejšy bank krainy PKO Bank Polski i mBank.

Suma kamisii za pieravod u pieršuju čarhu zaležyć ad taho, chto źjaŭlajecca atrymalnikam — fizičnaja abo jurydyčnaja asoba.

Kab adpravić hrošy polskaj firmie z Alfa-Banka, daviadziecca zapłacić kamisiju ŭ pamiery 2% ad sumy, ale nie mieniej za 200 rubloŭ. Zrabić taki pieravod možna tolki ŭ bankaŭskim adździaleńni.

Pieravod z kartki biełaruskaj fizičnaj asoby na kartku polskaj fizasoby možna rabić bieź vizitu ŭ bank, praz dadatak InSync. Naturalna, što dla hetaha treba mieć rachunak u Alfa-Banku.

U takim vypadku kamisija za apieracyju budzie składać 150 rubloŭ u niezaležnaści ad sumy pieravodu.

Biełaruski narodny bank

Hety bank hatovy adpraŭlać SWIFT-pieravody ŭ jeŭra z kamisijaj 1,9% ad sumy, ale nie mieniej za 100 jeŭra za płaciež. Taksama mahčymy pieravod u dalarach ZŠA, ale tolki ŭ Nest Bank, u inšyja polskija banki Biełaruski narodny bank moža adpravić pieravod tolki ŭ jeŭra.

Pryjorbank

Pieravody ŭ Polšču taksama ažyćciaŭlaje Pryjorbank. Adzinaja mahčymaja valuta pieravodu — polski złoty. Pieravodzić hrošy možna jak pa numary kartki, tak i pa numary rachunku.

Kamisija za pieravod pa numary kartki składaje 1,2% ad sumy. Maksimalnaja suma adnaho pieravoda razam z kamisijaj banka składaje 2962 rubli. Usiaho za miesiac ź biełaruskaj karty na polskuju takim čynam možna adpravić nie bolš za 19 749 rubloŭ razam z kamisijaj za pieravod.

Kali havorka idzie pra SWIFT-pieravod pa numary bankaŭskaha rachunku, to kamisija budzie składać 0,5% ad sumy pieravodu, ale nie mienš za 50 rubloŭ. Maksimalnaja suma kamisii — 2500 rubloŭ. Umovy adnolkavyja pry pieravodzie jak jurydyčnaj, tak i fizičnaj asobie.

Pryjorbank hatovy adpravić vašy hrošy ŭ luby polski bank, ale pierad praviadzieńniem finansavaj apieracyi raić samastojna ŭdakładniać, ci bank-atrymalnik prymie hrošy.

Kamisija za pryjom hrošaj z Polščy ŭ Biełaruś praz Pryjorbank składaje 3% ad sumy pieravodu, ale nie mieniej za 15 rubloŭ.

Technabank

U hetym banku mohuć zrabić pieravod u Polšču tolki ŭ jeŭra. Adpraŭlajuć va ŭsie polskija banki, aproč ING Bank. Niezaležna ad taho, chto budzie atrymalnikam, fizičnaja abo jurydyčnaja asoba, kamisija za SWIFT-pieravod składaje 55 jeŭra plus 1,5 pracenta ad sumy. 

BSB-Bank

SWIFT-pieravody ŭ dalarach i jeŭra robić i BSB-Bank. U zaležnaści ad taryfu, kamisija za pieravod u dalarach ZŠA składaje 1,7%, ale nie mieniej za 100 jeŭra i nie bolej za 300.

Ź jeŭra kamisija anałahičnaja, jak i z dalarami, ale ŭ adroźnieńnie ad amierykanskaj valuty jeŭra treba abaviazkova nabyvać u samoha BSB-Banka. Tamu, kali ŭ bank vy prychodzicie ź jeŭra ci dalarami, vam usio adno daviadziecca zhubić peŭny pracent na kursie.

Pry pieravodzie pa numary kartki bank adpraŭlaje ŭ inšyja krainy biełaruskija rubli, tamu praličyć straty na taki pieravod niemahčyma, bo nieviadoma, pa jakim kursie budzie ličyć bank-karespandent.

Važnyja niuansy 

Pierad tym, jak iści ŭ bank dla adpraŭki SWIFT-pieravodu abo pieravodu pa numary kartki praz dadatak, varta zahadzia ŭdakładnić, u jakoj mienavita valucie kankretny bank moža zrabić pieravod. Taksama varta ŭdakładniać, ci pracuje bank-adpraŭnik z bankam, u jaki vy adpraŭlajecie hrošy. 

Na praktycy vyhladaje, što šansy paśpiachova adpravić hrošy ŭ Polšču davoli vialikija. Naprykład, adzin z čytačoŭ niadaŭna raźličvaŭsia za nabyty ŭ Polščy aŭtamabil SWIFT-pieravodam u jeŭra ź biełaruskaha Alfa-Banka ŭ PKO Bank Polski. Hrošy na rachunku polskaj firmy źjavilisia ŭ dzień adpraŭki ź Biełarusi.
Inšy čytač raźličvaŭsia takim ža čynam za aŭtamabilnyja zapčastki. Pradaviec atrymaŭ hrošy na nastupny dzień paśla pieraliku ź Biełarusi.

Adna z surazmoŭnic napačatku vosieni pieravodziła hrošy za moŭnyja kursy z kartki na kartku. Hrošy pryjšli na nastupny dzień. Va ŭsich vypadkach u atrymalnikaŭ byli rachunki ŭ PKO Bank Polski.

Kali kazać pra pieravody ŭ inšyja krainy ź Biełarusi, to byvajuć składanaści. Adzin z čytačoŭ niaŭdała raźličyŭsia za aŭtamabil, jaki chacieŭ nabyć u Hiermanii. Mužčyna adpraviŭ hrošy, ale atrymalnik zamiest hrošaj ź Biełarusi atrymaŭ ad svajho banka paviedamleńnie, što hrošy prychodzili, ale bank ich nie prymaje. U vyniku čytač straciŭ hrošy, vydatkavanyja na kamisiju banku, i šmat niervaŭ, pakul biez małoha dva miesiacy čakaŭ, kali hrošy viernucca na jahony rachunak.

Čytajcie taksama:

Polšča spyniła vydaču humanitarnych viz, adnosna jakich chadajničaŭ Biełaruski dom u Varšavie

Čamu ŭ Biełarusi adbyvajecca bum na rynku nieruchomaj majomaści? Tłumačyć ekanamist

Litva ŭzmocnić kantrol za ekspartam u Biełaruś, kab supraćstajać abychodu sankcyj

Клас
13
Панылы сорам
10
Ха-ха
4
Ого
10
Сумна
11
Абуральна
20

Chočaš padzialicca važnaj infarmacyjaj ananimna i kanfidencyjna?