Palicejskija stajać la stancyi, dzie žančyna pahražała pasažyram ciahnika. Fota: Michel Euler / AP

Palicejskija stajać la stancyi, dzie žančyna pahražała pasažyram ciahnika. Fota: Michel Euler / AP

U Paryžy supracoŭniki adździaleńnia palicyi pa baraćbie z teraryzmam adkryli ahoń pa žančynie ŭ parandžy, jakaja pahražała pasažyram ciahnika, piša Bi-bi-si.

Žančyna admoviłasia padparadkavacca patrabavańniam palicejskich, i pa joj było zroblena vosiem strełaŭ, jana atrymała ranieńni.

Jak vyśvietliłasia paźniej, žančyna nie była ŭzbrojenaja.

Tryvohu padniali pasažyry pryharadnaha ciahnika ŭ XIII akruzie Paryža, na stancyi «Biblijateka imia Fransua Miterana» ŭ spravu ŭmiašałasia palicyja.

Jak mienavita žančyna pahražała pasažyram nie ŭdakładniajecca, adnak viadoma, što jana kryčała «Ałachu akbar».

Pavodle palicyi, supracoŭniki aścierahalisia za svaju biaśpieku i biaśpieku navakolnych, tamu adkryli ahoń. Žančyna była paranienaja ŭ žyvot i znachodzicca ŭ ciažkim, ale stabilnym stanie ŭ balnicy, dzie joj robiać apieracyju.

Pa słovach prefiekta Paryža Łarana Nuńjesa, heta moža być taja samaja žančyna, jakaja ŭ 2021 hodzie ŭžo pahražała supracoŭnikam sił biaśpieki, jakija achoŭvali abjekty ad mahčymych terarystyčnych napadaŭ.

Tady hetuju žančynu na niekatory čas izalavali ŭ suviazi sa stanam psichičnaha zdaroŭja.

Jak adznačyŭ pradstaŭnik urada Aliŭje Vieran, supracoŭniki palicyi, jakija stralali ŭ padazravanuju, mieli zamacavanyja na sabie videakamiery, što dapamoža vyśvietlić dakładnyja abstaviny zdareńnia, u suviazi ź jakim pačaty adrazu dva rasśledavańni. Adno tyčycca dziejańniaŭ samoj padazravanaj, inšaje zaklikana vyśvietlić, nakolki apraŭdanym było prymianieńnie zbroi.

Incydent adbyŭsia na fonie pavyšanaj napružanaści ŭ Francyi, vyklikanaj vajnoj pamiž Izrailem i CHAMAS.

U pačatku miesiaca na poŭdni krainy zahinuŭ školny nastaŭnik i dva čałavieki atrymali surjoznyja ranieńni, pryčym napadnik taksama vykrykvaŭ «Ałachu akbar». Paśla heta vypadku ŭ Francyi była ŭviedzieny samy vysoki ŭzrovień antyterarystyčnaj hatoŭnaści.

Клас
13
Панылы сорам
1
Ха-ха
1
Ого
1
Сумна
1
Абуральна
0