Aryštavanaja kvatera Viktoryi Aviarjanavaj. Fota: e-auction.by
Na aŭkcyjonie «Bielurzabieśpiačeńnie» pradali aryštavanuju kvateru biznesvumien Viktoryi Aviarjanavaj. Pradali kvateru z druhoj sproby — padčas pieršaha aŭkcyjonu achvotnych jaje kupić nie znajšłosia. Pačynalisia tarhi z pačatkovaj cany ŭ 396 tysiač rubloŭ. Pradali jaje za 437,58 tysiačy rubloŭ, piša «Lusterka».
Naležyć kvatera Viktoryi Aviarjanavaj — pradprymalnicy i dačce viadomaha biznesoŭca Juryja Aviarjanava. U joj zarehistravana niepaŭnaletniaje dzicia.
U 2020 hodzie Viktoryju Aviarjanavu asudzili pa artykule ab uchileńni ad vypłaty padatkaŭ u asabliva bujnym pamiery. U červieni 2020-ha sud asudziŭ pradprymalnicu da 3 hadoŭ pazbaŭleńnia voli ŭ kałonii ahulnaha režymu.
Joj adrazu ž skaracili termin na 1 hod pa amnistyi z nahody 75-hodździa Pieramohi ŭ Vialikaj Ajčynnaj vajnie. Z ulikam času, praviedzienaha ŭ SIZA, paśla suda joj zastavałasia adbyć u kałonii kala hoda. Ź jaje taksama pastanavili spahnać u dachod biudžetu škodu ŭ pamiery 711,7 tysiačy rubloŭ.
Viktoryja Aviarjanava ŭznačalvała kampaniju «Inteks», jakaja kiravała šeraham zabaŭlalnych kłubaŭ u Minsku. Pa danych suda, kampanija ŭ 2009-2016 hadach nie zapłaciła ŭ biudžet Biełarusi padatki ŭ sumie zvyš 892 tysiač rubloŭ. Zajaŭlałasia, što kiraŭnica «Inteksa» pry dapamahańni padnačalenych ŭniesła ŭ padatkovyja dekłaracyi (raźliki) zahadzia łžyvyja źviestki.
U 2017 hodzie Śledčy kamitet paviedamiŭ pra zatrymańnie šaści čałaviek, u tym liku dyrektara ZAT «Handlovy śviet — «Kalco» i TAA «Park zabaŭ Drymłend». Ich padazravali va ŭchileńni ad vypłaty padatkaŭ. Usie hetyja biznesy kantralavaŭ Juryj Aviarjanaŭ.
Paśla pretenzij z boku siłavikoŭ jon pakinuŭ Biełaruś i pierajechaŭ u Niamieččynu. Jaho starejšaja dačka Viktoryja — u Rasiju, dzie vychoŭvała dvuch dziaciej. U kancy 2019 hoda Viktoryju Aviarjanavu ekstradavali ŭ Biełaruś.
Čytajcie taksama:
Za daŭhi pradajuć kvateru dački biznesoŭca Juryja Aviarjanava
