Ministr abarony Todar Taharaŭ (na fota sprava) rašuča padtrymlivaje Ukrainu. Fota: Virginia Mayo / AP
Parłamient Bałharyi bolšaściu hałasoŭ uchvaliŭ pradastaŭleńnie dadatkovaj vajennaj dapamohi Ukrainie, u pryvatnaści rakiet typu 5B55P dla zienitna-rakietnaha kompleksu S-300, piša Bi-bi-si.
U Maskvie nieadkładna vykazali abureńnie hetaj pastanovaj i zapatrabavali ad Bałharyi ŭstrymacca ad pieradačy rakiet Kijevu.
Debaty pamiž kiroŭnaj bolšaściu i apazicyjnymi palityčnymi abjadnańniami pa hetym pytańni praciahvalisia kala troch hadzin. Apazicyjnyja deputaty abvinavačvali svaich kalehaŭ u zdradzie nacyjanalnym intaresam i patrabavali adstaŭki ministra abarony Todara Taharava, a bałharskija sacyjalisty bajkatavali pasiadžeńnie.
Častka pasiadžeńnia prajšła ŭ zakrytym režymie z-za pradstaŭleńnia deputatam słužbovaj infarmacyi ab stanie supraćpavietranaj abarony krainy i kolkaści ŭstanovak S-300.
Rasijskaja fiederalnaja słužba pa vajenna-techničnym supracoŭnictvie ŭ adkaz na hetaje rašeńnie bałharskaha parłamienta zajaviła, što jano idzie nasupierak dvuchbakovamu pahadnieńniu pamiž Maskvoj i Safijaj ab vajenna-techničnym supracoŭnictvie ad 2002 hoda, zhodna ź jakim pieradača treciamu boku ŭzbrajeńnia i vajennaj techniki, atrymanych z Rasii, niedapuščalnaja bieź jaje papiaredniaj zhody.
«Havorka idzie pra čarhovuju sprobu hrubaha parušeńnia bałharskim kiraŭnictvam svaich mižnarodnych abaviazacielstvaŭ u halinie kantrolu za ŭzbrajeńniem, niahledziačy na nieadnarazovyja tłumačeńni rasijskaha boku», — havorycca ŭ zajavie rasijskaha viedamstva.
FSVTS śćviardžaje, što hety krok «niepaźbiežna pryviadzie da dadatkovaj eskałacyi kanfliktu i niavinnych čałaviečych achviar».
«Zaklikajem bałharski bok pierahledzieć pryniataje rašeńnie ŭ metach niedapuščeńnia parušeńnia normaŭ mižnarodnaha prava ŭ halinie vajenna-techničnaha supracoŭnictva», — zajavili ŭ słužbie.
Čytajcie taksama:
U Bałharyi zatrymali mužčynu, jaki chacieŭ zabić ministra abarony praz padtrymku Ukrainy
Cichanoŭskaja abmierkavała z premjer-ministram Bałharyi prajekt «pašparta novaj Biełarusi»
Z Bałharyi vysyłajuć troch čałaviek, źviazanych ź Biełaruskaj pravasłaŭnaj carkvoj. Chto jany?
