Były achoŭnik Pucina z FSA Vital Bryžaty i spadarožnikavaja vyjava hihanckaha pałacavaha kompleksu Uładzimira Pucina ŭ akupavanym Krymie. Fota: Vital Bryžaty / Google Earth / Business Insider
Pra daču Uładzimira Pucina ŭ pasiołku Alivie, jaki znachodzicca kala Jałty ŭ akupavanym Krymie, stała viadoma niekalki hadoŭ tamu.
Vital Bryžaty dałučyŭsia da FSA ŭ 2021 hodzie i zatym trapiŭ u toj pałac na pracu. Mužčyna mieŭsia dapamahać u arhanizacyi pryjezdaŭ Pucina ŭ pałac albo ŭ inšyja miescy ŭ Krymie.
«Kali Pucin, naprykład, źbiraŭsia pryjechać u škołu, naša słužba miełasia pryjechać za 9 hadzin da vizitu i staranna pravieryć usiu terytoryju», — kaža Vital.
«Pajezdki «Numara adzin» u Krym demanstravali, jak mała toj daviaraje svajoj ułasnaj słužbie biaśpieki. Bolšaść aficeraŭ nie viedała, jak budzie dabiracca prezident i jaki maršrut abiare. Heta mahła być bajavaja hatoŭnaść va ŭsich aeraportach, mnostva achoŭnikaŭ i kartež, jaki jeździć pamiž aeraportami i robić vyhlad, što Pucin znachodzicca ŭ adnoj z mašyn. A mahła być zusim inšaja situacyja: niečakanaje paviedamleńnie ŭ palicyju, što Pucin zaraz niedzie ŭ Krymie, i nichto nie viedaje, jak tak atrymałasia», — apisvaje jon padčas intervju z Business Insider.
Daču ŭ Alivie Vital apisvaje jak fantastyčnaje miesca: za płotam u 6 mietraŭ znachodziacca basiejny, saŭny, zimovy sad, čajnyja domiki i plažy. Akramia hetaha tam prysutničajuć jašče chakiejny katok, pryvatnyja port i viertalotnaja placoŭka.
Uzbrojenyja sałdaty i vadałazy praviarajuć kožny kutok terytoryi.
Adnym z važnych praviłaŭ było toje, što ŭsie supracoŭniki kompleksu pavinny być aficerami FSA, adznačaje Bryžaty.
«Usie, chto tam pracuje, — čałaviek, jaki padstryhaje travu abo ściraje bializnu, — pracujuć na FSA», — kaža eks-achoŭnik. Pavodle jaho słoŭ, usia dača Pucina była padobna da maleńkaha horada.
Bahaćcie dačy ŭ Krymie ŭ paraŭnańni sa zvyčajnym rasijskim žyćciom vyklikała ahidu ŭ Vitala.
Jon nie moh zrazumieć, «čamu rasijanie nie mohuć žyć dobra, i tolki ŭrad moža žyć tak šykoŭna».
Mužčyna zarablaŭ kala 700 dalaraŭ na miesiac, adnak praca ŭ napružanaj atmaśfiery i taksičnym asiarodździ zaŭždy trymała ŭ napruzie. Ludzi navokał, jak jon kaža, brali prykład z Pucina, sprabavali paŭsiul znajści niedachopy, tamu treba było sačyć za ŭsim, što ty kažaš, bo «ŭsio moža vykarystoŭvacca suprać ciabie».
«Reč u tym, što heta toj vid słužby, dzie ŭvohule ničoha nie adbyvajecca. I adziny sposab zrabić karjeru i prasunuć siabie — heta danosić na inšych», — zhadvaje Vital.
Sapraŭdnyja prablemy ŭ eks-achoŭnika źjavilisia adrazu paśla pačatku vajny va Ukrainie.
Mužčyna ŭ pieršy ž dzień rasijskaha ŭvarvańnia padaŭ u adstaŭku, adnak zajavy nie pryniali, parvali i vykinuli ŭ śmietnicu, a jamu samomu pahražali aryštam da 8 hadoŭ. Z taho momantu Vital znachodziŭsia pad mocnym ciskam, i navat psichołah, da jakoha jon źviartaŭsia, adrazu ž dakładvaŭ usio kiraŭnictvu FSA, piša Business Insider.
Adnak nieŭzabavie ŭ Vitala źjaviłasia mahčymaść uciačy z krainy, bo žonka atrymała pracu ŭ Ekvadory.
«Ciapier, znachodziačysia ŭ vyhnańni, ja paraŭnoŭvaju toj płot vakoł pałacu ŭ Alivie z tym, nakolki mocny razryŭ pamiž Pucinam i rasijskim narodam. Jon pracuje na ludziej, i jon pavinien pracavać u intaresach ludziej. Jon nie pavinien abaraniać siabie ad ułasnaha naroda», — padahulniaje Vital.
Čytajcie taksama:
Finskaja telekampanija apublikavała redkija videa Pucina z pačatku 1990-ch
Padčas vajny Pucin zakłapočany novaj jachtaj. U hetym jamu nasustrač iduć jeŭrapiejcy FOTY
U Pucina znajšli jachtu za 700 miljonaŭ dalaraŭ VIDEA
Dla Pientahona stvaryli novy psichałahičny partret Pucina. Raskazvajem, što ŭ im
